މޫސުމަށް އަންނަ ބަދަލުތައް ކުޑަ ކުރަން ޗައިނާ އާއި އެމެރިކާ އެކުގައި އެހެން ގައުމުތަކާ އެކު މަސައްކަތް ކުރަން އެއްބަސްވެއްޖެ އެވެ.
އެގޮތަށް އެއްބަސްވެފައި ވަނީ ޗައިނާގެ ކްލައިމެޓް މަންދޫބު ޝީ ޒެންހުއާ އާއި އެމެރިކާ ކްލައިމެޓް މަންދޫބު ޖޯން ކެރީ މިދިޔަ ހަފްތާގައި ބޭއްވި ބައްދަލުވުންތަކަށް ފަހު އެވެ.
ދެ ގައުމުން އެކުގައި މިއަދު ނެރުނު ބަޔާނެއްގައި ބުނީ ދުނިޔެ ހިމާޔަތް ކުރާ އޯޒޯން ފަށަލައަށް ގެއްލުންދޭ ވިހަ މާއްދާތައް ބޭރު ކުރުން މަދު ކުރަން އަޅާނެ ވަކި ފިޔަވަޅުތަކާ މެދު އެއްބަސްވެފައިވާ ކަމަށެވެ.
އެމެރިކާގެ ރައީސް ޖޯ ބައިޑެން ގެންދަވަނީ ވާޗުއަލްކޮށް ބާއްވާ ބައިނަލްއަގްވާމީ ކްލައިމެޓް ސަމިޓަކަށް ތައްޔާރުވަމުންނެވެ. ޗައިނާއިން އެ ބުނީ އެ ބައްދަލުވުމުގައި ފުރިހަމައަށް ބައިވެރިވާނެ ކަމަށެވެ.
ނަމަވެސް ދުނިޔޭގެ ގައުމުތަކުގެ އެންމެ އިސްވެރިން ބައިވެރިވެ ވަޑައިގަންނަވާ އެ ސަމިޓުގައި ޗައިނާގެ ރައީސް ޝީ ޖިންޕިން ބައިވެރިވެ ވަޑައިގަންނަވާނެ ކަމެއް ސާފެއް ނޫނެވެ.
"އެމެރިކާ އާއި ޗައިނާއިން މި އޮތީ އެކުގައި އެހެން ގައުމުތަކާ އެކު މޫސުމީ ކާރިސާ ހައްލު ކުރަން މަސައްކަތް ކުރަން ތައްޔާރަށް. މިއީ ސީރިއަސްކަމާ އެކު ހަލުވި ދުވެލީގައި ކުރަން ޖެހޭ މަސައްކަތެއް،" ދެ ގައުމުގެ ޖޮއިންޓް ބަޔާނުގައި ވެއެވެ.
އޭގެ އިތުރުން ޕެރިސް އެއްބަސްވުމުގެ ދަށުން ދުނިޔެ ހޫނުވާ މިންވަރު ކޮންޓްރޯލް ކުރަން ކަނޑައެޅި ޓާގެޓުތަކަށް ވާސިލްވާން ހުއްޓުމެއް ނެތި ދެ ގައުމުން މަޝްވަރާ ކުރާނެ ކަމަށް ބުނެފައި ވެއެވެ.
ތަރައްގީވަމުން އަންނަ ގައުމުތަކުން ކާބަން މަދު ހަކަތައާ ގާތަށް ގެންދިޔުމަށް ފައިސާ ފޯރުކޮށްދޭން ވެސް އެމެރިކާ އާއި ޗައިނާއިން ނިންމާފައިވާކަން ބަޔާނުގައި ފާހަގަކޮށްފައި ވެއެވެ.
ކްލައިމެޓް ސައިންސްވެރިން އިންޒާރު ދީފައިވާ ގޮތުގައި ދުނިޔެ ހޫނުވާ މިންވަރު ބަހައްޓަން ޖެހެނީ ދެ ޑިގްރީ ސެލްސިއަސްއަށް ވުރެ ދަށުގަ އެވެ.
