އެމެރިކާގެ ކޮންގްރެސްގެ އަޣުލަބިއްޔަތު ޑިމޮކްރެޓުން ހޯދުމާ އެކު، އިޒްރޭލުގައި ބޮޑު ވަޒީރު ބެންޖަމިން ނަތަންޔާހޫ ނުހިމެނޭ އާ ސަރުކާރެއް އެކުލަވައިލުމުގެ ފުރުސަތަކަށް މަސައްކަތް ފަށައިފި އެވެ.
އިދިކޮޅު ފަރާތްތަކުން ބުނާ ގޮތުގައި، އެމެރިކާގެ ދެ ޕާޓީން ޒަމާނުއްސުރެ އިސްރާއީލަށް ދެމުން އައި އެއްބާރުލުން ނަތަންޔާހޫގެ ސިޔާސަތުތަކުގެ ސަބަބުން ވަނީ ބޭކާރުވެފަ އެވެ.
އަންގާރަ ދުވަހު އެމެރިކާގައި ބޭއްވި މިޑްޓާމް އިންތިޚާބުގައި، އެމެރިކާގެ ސެނެޓާއި ހައުސް އޮފް ރެޕްރެޒެންޓެޓިވްސްގެ އަޣުލަބިއްޔަތު ޑިމޮކްރެޓުން ވަނީ ހޯދާފަ އެވެ.
މިއީ ރައީސް ޑޮނަލްޑް ޓްރަމްޕަށް ލިބުނު ބޮޑު ނާކާމިޔާބީއެއްގެ ގޮތުގައި ބެލެވޭއިރު، މި ނަތީޖާ ނުކުތުމުގެ އެއް ސަބަބަކީ އެމެރިކާ އާއި އިސްރާއީލުން ގުޅިގެން އީރާނާ ދެކޮޅަށް ކުރަމުންދާ، އާންމުންގެ މެދުގައި މަގުބޫލުކަން ކުޑަ ހަނގުރާމައާ މެދު އުފެދިފައިވާ ނުރުހުމެވެ.
އެމެރިކާގެ މި އިންތިޚާބު ބާއްވާފައި މިވަނީ އިސްރާއީލުގެ އިންތިޚާބު ބޭއްވިތާ އެންމެ ހަފުތާއެއް ފަހުންނެވެ. އިސްރާއީލުގެ އިންތިޚާބުގައި ނަތަންޔާހޫގެ ކަނާތު ފިޔައިގެ އިއްތިހާދަށް ޕާލަމެންޓުގެ އަޣުލަބިއްޔަތު ގެއްލުނު ނަމަވެސް، އޭނާގެ މައިގަނޑު ވާދަވެރިޔާ ގަޑީ އައިޒެންކޮޓަށް ސަރުކާރެއް އެކުލަވައިލުމަށް ބޭނުންވާ ފުރުސަތު ހަނިވާ މިންވަރަށް ނަތަންޔާހޫ ވަނީ ގޮނޑި ކާމިޔާބުކޮށްފަ އެވެ.
އިސްރާއީލުގެ ރައީސް އައިޒަކް ހަރުޒޮގް ބުދަ އަދި ބުރާސްފަތި ދުވަހު ސިޔާސީ ޕާޓީތަކުގެ މަންދޫބުންނާ ބައްދަލުކުރައްވައި، އާ ސަރުކާރު އެކުލަވައިލުމުގެ ފުރުސަތު ނަތަންޔާހޫ ނުވަތަ އައިޒެންކޮޓް، މީގެ ތެރެއިން އެކަކާ ހަވާލުކުރައްވާނެ އެވެ. އާ ސަރުކާރެއް އެކުލަވައިލެވެންދެން ނަތަންޔާހޫ މިހާރު ހުންނެވީ ވަގުތީ ބޮޑުވަޒީރުގެ މަގާމުގަ އެވެ.
