ނޯވޭގެ ރަސްގެފާނު ހާކޮންގެ ދޮންދަރިކަލުން މާރިއަސް ބޯގް ހޮއިބީގެ މައްޗަށް ސާބިތުވެފައިވާ ރޭޕްގެ މައްސަލަތަކުގެ އިސްތިއުނާފު މަރުހަލާ ނިމެންދެން، އޭނާގެ ފައިގައި އިލެކްޓްރޯނިކް މޮނިޓަރިން ޑިވައިސްއެއް ހަރުކޮށް ގޭބަންދުގައި ބެހެއްޓުމަށް އެ ގައުމުގެ ކޯޓަކުން ބުދަ ދުވަހު ހުކުމްކޮށްފި އެވެ.
މި ނިންމުމަކީ ހޮއިބީ ބަންދުން ދޫކޮށްލެވިދާނެ ކަމަށް ބުނެ މިދިޔަ ހޯމަ ދުވަހު ދަށު ކޯޓަކުން ނެރުނު އަމުރު ބާތިލުކޮށް ނިންމި ނިންމުމެކެވެ.
އުމުރުން 29 އަހަރުގެ ހޮއިބީގެ މައްޗަށް ރޭޕްގެ ދެ މައްސަލައަކާއި، ގެވެށި އަނިޔާގެ އިތުރުން އެހެނިހެން ކުށްތައް ސާބިތުވެ، މި އަހަރުގެ ޖޫން މަހު ވަނީ ހަތަރު އަހަރުގެ ޖަލު ހުކުމެއް އިއްވާފަ އެވެ. ނަމަވެސް އޭނާގެ ފަރާތުން ވަނީ އެ ހުކުމް އިސްތިއުނާފު ކޮށްފަ އެވެ.
އޭނާ މިހާރު ވެސް ހުރީ ފައިގައި މޮނިޓަރިން ޑިވައިސްއެއް ހަރުކޮށް، އޮސްލޯގެ ބޭރުގައި އޮންނަ ޝާހީ ގަނޑުވަރުގެ ސަރަހައްދުގައި ހުންނަ އޭނާގެ އަމިއްލަ ގޭގައި ބަންދުކޮށްފަ އެވެ.
ޕްރޮސެކިއުޓަރުން ކޯޓުގައި އެދިފައިވަނީ ހޮއިބީ ބަންދުގައި ބަހައްޓާފައި ހުރި މުއްދަތު އިތުރުކޮށްދިނުމަށެވެ.
ހޮއިބީގެ އިސްތިއުނާފީ މައްސަލައިގެ ޝަރީއަތްތައް އަންނަ ފެބްރުއަރީ މަހު ފެށުމަށް ވަނީ ތާވަލުކޮށްފަ އެވެ.
ހޮއިބީއަކީ ރަސްގެފާނު ހާކޮންގެ އަނބިކަނބަލުން، ރާނީ މެޓޭ-މާރިޓް ކުރީގެ ކައިވެންޏަކަށް ލިބިވަޑައިގެންފައިވާ ދަރިކަލެކެވެ.
