ހޮންކޮންގުގެ ޑިމޮކްރަސީ ހަރަކާތުގެ އެންމެ އިސް އެކްޓިވިސްޓު، ޖޯޝުއާ ވޮންގް، ބޭރުގެ ބާރުތަކާ ގުޅިގެން މަސައްކަތް ކުރި ކަމުގެ ކުށުގައި 10 އަހަރަށް ޖަލަށްލުމަށް ކޯޓަކުން ހުކުމްކޮށްފި އެވެ. އޭނާގެ މައްޗަށް މި ހުކުމް އިއްވީ އެ ސިޓީގައި އަލަށް ތައާރަފުކުރި ގައުމީ ސަލާމަތާ ބެހޭ ހަރުކަށި ގާނޫނުގެ ދަށުންނެވެ.
ބެއިޖިންގެ ނުފޫޒު ހޮންކޮންގަށް ގަދަވަމުންދާތީ އެކަމާ ދެކޮޅަށް 2020 ވަނަ އަހަރު ކުރި ވަރުގަދަ މުޒާހަރާތަކާ ގުޅިގެން ތައާރަފުކުރި މި ގާނޫނުގެ ދަށުން، ވޮންގްގެ އިތުރުން އެތައް ސަތޭކަ އެކްޓިވިސްޓުންނާއި އާންމު ރައްޔިތުން ވަނީ ހައްޔަރުކޮށްފަ އެވެ.
މި ގާނޫނުގެ ސަބަބުން ހިޔާލުފާޅުކުރުމުގެ މިނިވަންކަން ހުއްޓުމަކަށް އައިސްފައިވާ ކަމަށް ފާޑުކިޔާ ފަރާތްތަކުން ބުނި ނަމަވެސް، ކަމާބެހޭ އިދާރާތަކުން ބުނަމުންދަނީ މިއީ ހަމަޖެހުން ގާއިމުކުރުމަށް ކޮންމެހެން ބޭނުންތެރި ގާނޫނެއް ކަމަށެވެ. އަދި މި ގާނޫނުގެ ސަބަބުން ހޮންކޮންގަށް ލިބިފައިވާ އަމިއްލަ އިސްތިގުލާލަށް އެއްވެސް އުނިކަމެއް ނާންނަ ކަމަށް ސަރުކާރުން ބުނެއެވެ.
ވޭތުވެދިޔަ ހަ އަހަރު ދުވަހު ޖަލުގައި ހޭދަކުރުމަށް ފަހު، އަންނަ ޖެނުއަރީ މަހު މިނިވަންވާން އޮތް ވޮންގް، މި ހުކުމާއެކު އިތުރު 10 އަހަރު ޖަލުގައި ހޭދަކުރަން ޖެހޭނެ އެވެ.
މިދިޔަ މަހު 30 އަހަރު ފުރުނު ވޮންގް އަކީ ފުރާވަރު އުމުރުން ފެށިގެން ސިޔާސީ ހަރަކާތްތަކުގައި އުޅުމުގެ ސަބަބުން މީގެ ކުރިން ވެސް އެތައް ފަހަރަކު ޖަލަށްލާފައިވާ މީހެކެވެ.
ދައުލަތާ ދެކޮޅަށް ރޭވުންތައް ރޭވި ކަމުގެ ކުށުގައި މިހާރު ވެސް ޖަލު ހުކުމެއް ތަންފީޒު ކުރަމުންދާ ވޮންގް، އަންނަ އަހަރުގެ ކުރީކޮޅު މިނިވަންވާން އޮތް ނަމަވެސް، އޭނާގެ މައްޗަށް މި ފަހުން ކުރި ދައުވާތަކަށް މިދިޔަ ސެޕްޓެމްބަރު މަހު އޭނާ ވަނީ އިއުތިރާފުވެފަ އެވެ.
ބުރާސްފަތި ދުވަހު ފަނޑިޔާރު ވިދާޅުވި ގޮތުގައި، އަލަށް އިއްވި 10 އަހަރުގެ ހުކުމުގެ ތެރެއިން ދެ މަހާއި ދެ ދުވަސް ހިނގާނީ މިހާރު އޭނާ ތަންފީޒު ކުރަމުންދާ ހުކުމާ އެކުގަ އެވެ.
ޕްރޮސެކިއުޓަރުން ބުނި ގޮތުގައި ވޮންގް ވަނީ އަމިއްލައަށް އަރުވާލެވިގެން އުޅޭ އެކްޓިވިސްޓް ނޭތަން ލޯ ފަދަ އެހެން ފަރާތްތަކާ ގުޅިގެން، ބޭރުގެ ދަތިކުރުމުގެ ފިޔަވަޅުތައް އެޅުމަށް ބާރުއަޅައި ވަކާލާތުކޮށްފަ އެވެ.
ކޯޓަށް ހުށަހެޅި މައުލޫމާތުތަކުން އެނގޭ ގޮތުގައި، މި ހަރަކާތްތައް ހިންގާފައިވަނީ 2020 ވަނަ އަހަރުގެ ޖުލައި މަހުން ފެށިގެން ނޮވެމްބަރު މަހުގެ ނިޔަލަށެވެ.
ވޮންގް އާއި ލޯ އަކީ މިހާރު އުވާލާފައިވާ ޑިމޮކްރަސީއަށް ވަކާލާތުކުރާ ސިޔާސީ ޕާޓީއެއް ކަމަށްވާ "ޑެމޯސިސްޓޯ" އުފެއްދި ދެ ބާނީންނެވެ.
ވޮންގްގެ މައްޗަށް ކުރި މި ހުކުމާ ގުޅިގެން އިންސާނީ ހައްގުތަކަށް މަސައްކަތްކުރާ އެމްނެސްޓީ އިންޓަނޭޝަނަލުން ބުނީ، މިއީ ސަރުކާރާ ދެކޮޅަށް އަޑުއުފުލާ އިސް ފަރާތްތަކަށް އޮތް ބިރުވެރިކަން ހާމަވާ ކަމެއް ކަމަށާއި، އެފަދަ މީހުން ވީހާވެސް ގިނަ ދުވަހު ޖަލުގައި ބޭތިއްބުމަށް ސަރުކާރުން ކޮންމެ ފަދަ ކަމެއްވެސް ކޮށްފާނެކަން މިކަމުން އެނގޭ ކަމަށެވެ.
