ދިރާގު ދިވެހި ޕްރިމިއާ ލީގުގެ ފުރަތަމަ ބުރުގައި ދަ ގްރާންޑޭގެ ފަރާތުން ފެނުނު ކުޅުން ފަހަކަށް އައިސް އެ ޓީމަށް ތަކުރާރު ކުރެވިފައިނުވާއިރު، ލީގުގައި މިރޭ ކްލަބް ވެލެންސިއާއާ ދެކޮޅަށް ކުޅޭ މެޗުގައި ކޮންމެ ނަތީޖާއެއް ނުކުތް ކަމުގައި ވިޔަސް ދަ ގްރާންޑޭ އިތުރަށް ފަހަތަށް ނުވެއްޓޭނެ ކަަމުގެ އިތުބާރު އެބައޮތް ކަމަށް އެ ޓީމުގެ ކޯޗު އިސްމާއިލް މަހަފޫޒް (އިންމަ) ބުނެފި އެވެ.
ލީގުގެ ދެ ވަަނަ ބުރު ފެށިގެން އަދި ހާއްސަކޮށް ކޮވިޑްގެ ކޭސްތައް ގިނަވާތީ ލީގު ހުއްޓާލަން ޖެހުމުން މި އައި ބްރޭކަށް ފަހު މިދިޔަ މަހު ފަހު ކޮޅު ލީގު ފެށި ފަހުން ދަ ގްރާންޑޭގެ ހާލަތު އަންނަނީ ދަށްވަމުންނެވެ. އޭގެ އަސަރު ޓީމުގެ ނަތީޖާތަކަށް ވެސް ވަނީ ކޮށްފަ އެވެ.
ވެލެންސިއާއާ ދެކޮޅަށް މިރޭ ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި އިންމަ ބުނީ ހާލަތު އޮތްގޮތުން ނަތީޖާތަކަށް އަސަރުކުރުމުން އޭނާ ވެސް ކަންބޮޑުވާ ކަމަށާއި މިކަމުން އަަރައިގަންނަން ވެލެންސިއާ މެޗު މިއީ ރަނގަޅު ފުރުސަތެއް ކަމަށެވެ.
"މި ކަހަލަ މުހިއްމު މެޗަކުން އަޅުގަނޑުމެންނަށް ޕޮއިންޓެއް ލިބިއްޖިއްޔާ ކުރިއަށް އޮތްތަނުގައި އަޅުގަނޑުމެންގެ ޓާނިން ޕޮއިންޓަކަށް ވުން ވެސް އެކަށީގެންވޭ. އަޅުގަނޑުމެން މި ހާލަތުގައި ވިނިން މެންޓަލިޓީ އަކަށް ޕްލޭޔަރުން އެރި ކަމުގައި ވިޔަސް ސަބަބުތަކާ ހުރެ މެޗުތަކުން ތިން ޕޮއިންޓް ނުނެގިން މި އުޅެނީ. މި މެޗަކީ ކުރިއަށް އޮތްތަނުގައި އަޅުގަނޑުމެން ރަނގަޅު ފޯމަކަށް ޓީމު ބައްޓަން ކުރަން މުހިއްމު މެޗެއް،" އިންމަ ބުންޏެވެ.
"ކޮންމެ ގޮތެއް ވިޔަސް ބަލިވި ކަމަށްވިޔަސް އެވަރަކަށް ޓީމު ވެއްޓުނަނުދޭނަން. ދެން މޮޅުވެޖިއްޔާ ކުޅުންތެރިންނަށް ހިތްވަރެއް. އެކަަމަކު އެހެން އިތުރު ކަމެއް ދިމާވިޔަސް އަޅުގަނޑުމެން އެވަރަށް ވެއްޓުނުނަދޭން،"
ދަ ގްރާންޑޭ އިން ވަނީ ލީގުގެ ފުރަތަމަ ބުރުގައި 2-1 އިން ވެލެންސިއާ ބަލިކޮށްފަ އެވެ.
އިންމަ ބުނީ ދަ ގްރާންޑޭގެ ޕާފޯމަންސް ދަށްވަމުން އަންނަ އެންމެ ބޮޑު ސަބަބަކީ ޓީމުގެ ޕްރެކްޓިސް ސެޝަންތައް އެންމެ ރަނގަޅަށް ނުދިއުން ކަމަށެވެ. އަދި އެކަން ބަދަލުކުރުމަށް މަސައްކަތް ކުރަމުން އަންނަ ކަމަށާއި ދުވަހެއް ދުވަހަކަށް އެކަންތައްތަކަށް ވެސް ބަދަލެއް އަންނާނެ ކަމަށް އުއްމީދުކުރާ ކަމަށް އިންމަ ބުންޏެވެ.
އަޔާ ޕްރެކްޓިހުގައި ބައިވެރިއެއްނުވޭ: އިންމަ
ލީގުގެ މެޗެއްގެ ވޯމްއަޕްގެ ތެރެއިން އަޔާ.-- ފޮޓޯ: އިބްރާހިމް ފާއިދު/ އެފްއޭއެމް
މި ފަހަރު ލީގުގައި ދަ ގްރާންޑޭ ކޮޅަށް ގިނަ މެޗުތަކުގެ ނަތީޖާ އެނބުރިފައި ހުރީ އެ ޓީމުގެ ހުނަރުވެރި ފޯވާޑް އަޔާޒް އަހުމަދު (އަޔާ)ގެ ގޯލުތަކުންނެވެ. އެކަމަކު އެ ކްލަބްގެ ޕްރެކްޓިހުގައި އަޔާ ބައިވެރިނުވާ ކަމަށް އިންމަ ވަނީ ބުނެފަ އެވެ.
"އަޔާ ޕްރެކްޓިހަށް ނުނިކުންނަތާ މިހާރު ގާތްގަނޑަކަށް 10 ވަރަކަށް ދުވަސް ވެދާނެހެން އަޅުގަނޑަށް ހީވަނީ. މެނޭޖްމަންޓުން އޭނައާ ޑީލްކުރަމުން އެބަދޭ. ހަމަގައިމު ވެސް (އަޔާ) ޓްރެއިނިން ސެޝަން އަށް ނުނިކުންނަތަން ގާތްގަނޑަކަށް 10 ދުވަސް ވެދާނެ ހެން ހީވަނީ،" އިންމަ ބުންޏެވެ.
އަޔާ ޕްރެކްޓިހަށް ނުނިކުތް ނަމަވެސް މެޗުގައި ބޭނުންކުރާނެތޯ ނޫސްވެރިއަކު ސުވާލުކުރުމުން އިންމަ ބުނީ "ޕްރެކްޓިސް ކުރާ މީހުން ބޯޅަ ކުޅޭނެ. ޕްރެކްޓިސް ނުކުރާ މީހުން ބޯޅައެއް ނުކުޅޭނެ. އެކަން އޮންނާނީ އެހެންދޯ،" މިހެނެވެ.
ލީގުގައި އެންމެ ފަހުން ދަ ގްރާންޑޭ ކުޅުނު މެޗުން ޔުނައިޓެޑް ވިކްޓްރީ އަތުން ބަލިވިއިރު، އިންމަ ވަނީ އެ މެޗަށް ފަހު އޮތް ނޫސްވެރިންގެ ބައްދަލުވުމުގައި ދަ ގްރާންޑޭގައި ރަނގަޅުކުރަން ޖެހޭ މައްސަލަތަކެއް ހުރި ކަމަށް ބުނެފަ އެވެ. އަދި އެ ކަންތައްތަކަށް ހައްލެއް ހޯދައި ހާލަތު ބަދަލުކުރެވޭތޯ ކުރެވެން ހުރި މަސައްކަތެއް ކުރާނެ ކަމަށް އިންމަ ބުންޏެވެ.
އެ ކަންތައްތަކަށް އިޝާރާތްކޮށް އިންމަ ބުނީ ކޯޗަކަށް ހުންނަ މީހަކަށް ކުރިމަތިވާނެ އެންމެ ބޮޑު އުނދަގުލަކީ ދަނޑުމަތީގައި ތިބޭ ކުޅުންތެރިން ޓީމެއްގެ ގޮތުގައި ނުކުޅުން ކަމަށެވެ.
"ކުރިން މެޗުގައި ދަނޑުމަތީގައި އަޅުގަނޑުމެންގެ ޕްލޭޔަރުންގެ ތެރޭގައި ހަމަނުޖެހުންތަކެއް ހިނގަމުންދިޔަ. އެއްޗެކޭ ބުނީމަ އޭގެ ރައްދުގެ ގޮތުގައި ބަސްމަގުތައް ރަނގަޅުނޫން ކަންތައްތައްތަކެއް ވެސް އައި. މި ކަހަލަ ކަންތައްތަކާ ހުރެ އަޅުގަނޑުމެންގެ ޓީމުގެ ޕާފޯމަންސް ވެއްޓިގެންދިޔައީ. ޓީމެއްގެ ގޮތުގައި ނުކުޅެވި އެކަކު އަނެކަކަށް ބޯޅަތަކުގައި އެއްޗެހި ބުނުމާ އެއަށް އަޅުގަނޑު އެޑްރެސް ކުރާ ވާހަކަ ބުނީ،" ކުރިން މާޒިޔާ އާއި ގައުމީ ފުޓްބޯޅަ ޓީމުގެ ހެޑް ކޯޗެއްގެ ޒިންމާ ވެސް އުފުލި އިންމަ ބުންޏެވެ.
"އެއީ އެއްކޮށް ހުއްޓަން ޖެހޭ ކަންތައްތައް. ޓީމެއް މޮޅުވާން ބޭނުންވަންޏާ މި ކަންތައްތައް ހިނގައިގެންނުވާނެ."
ލީގުގައި ވެލެންސިއާ އާއި ދަ ގްރާންޑޭ ކުޅޭ މެޗު ފަށާނީ މިރޭ 22:00 ޖަހާއިރު އެވެ.
