މާލޭ ސިޓީއަށް އިންތިހާބު ކުރި މެމްބަރުންގެ ތެރެއިން ޑެޕިއުޓީ މޭޔަރުކަމަށް އައްޔަން ކުރާނެ ބޭފުޅެއްގެ ވާދަވެރިކަން އިދިކޮޅު ކޯލިޝަންގެ ތެރޭގައި ބޮޑުވެއްޖެ އެވެ.
މާލޭ ސިޓީ ކައުންސިލްގެ މޭޔަރު ހިމެނޭ ގޮތަށް 19 މެމްބަރުން އިންތިހާބު ކޮށްފައިވާއިރު އޭގެ ތެރެއިން 12 ގޮނޑި ކާމިޔާބު ކޮށްފައިވަނީ އިދިކޮޅު ކޯލިޝަން ޕީޕީއެމް/ޕީއެންސީ އިންނެވެ. އެ ކޯލިޝަނަށް ސިޓީ ކައުންސިލްގެ މެޖޯރިޓީ ލިބިފައިވާއިރު މިހާރު އެންމެ ބޮޑު ވާދަވެރިކަމެއް އޮތީ ޑެޕިއުޓީ މޭޔަރުގެ މަގާމަށެވެ.
ޑެޕިއުޓީ މޭޔަރުކަމަށް މިހާތަނަށް ޝައުގުވެރިކަން ފާޅުކުރައްވާފައިވަނީ ވިލިމާލެ ދާއިރާގެ ގޮނޑި ކާމިޔާބު ކުރެއްވި ނަހުލާ އަލީ އާއި މާފަންނު ދެކުނު ދާއިރާގެ ގޮނޑި ކާމިޔާބު ކުރެއްވި އަބްދުﷲ ނާސިރު (ހެރިންސް އައްލޮ) އެވެ. އޭގެ އިތުރުން ޕީޕީއެމްގެ ބައެއް ސަޕޯޓަރުން އަންނަނީ ހުޅުމާލެ ދާއިރާގެ ގޮނޑި ކާމިޔާބު ކުރެއްވި އަދި ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އިބްރާހިމް ޝުޖާއު ޑެޕިއުޓީ މޭޔަރަކަށް ގެނައުމަށް ކެމްޕެއިން ކުރަމުންނެވެ.
ސޯޝަލް މީޑިއާގައި ޕީޕީއެމްގެ ސަޕޯޓަރުން އަންނަނީ އެ ތިން ކެންޑިޑޭޓުންނަށް ފޯރިގަދަ ކެމްޕެއިންތަކެއް ކުރަމުންނެވެ.
ޑެޕިއުޓީ މޭޔަރުކަމަށް އޭނާ އައްޔަން ކުރަން ޖެހޭ ސަބަބާ ގުޅޭގޮތުން، ނަހުލާ "އަދަދު" އަށް ވިދާޅުވީ ކުރިއަށް އޮތް ރިޔާސީ އިންތިހާބަށް ޕީޕީއެމްއަށް ތާއީދު ހޯދުމަށް ވެސް އޭނާ ފަދަ ޒުވާން އަންހެނަކު މާލޭގެ ޑެޕިއުޓީ މޭޔަރު ކަމަށް އައްޔަން ކުރުމަކީ ރައީސް އަބްދުﷲ ޔާމީނާއި ޕީޕީއެމުން ވެސް ހިތްވަރު ދޭނެ ކަމެއް ކަމަށް ގަބޫލު ކުރައްވާ ކަމަށެވެ.
"އަންހެނުންނާއި ފިރިހެނުންނަށް ހަމަހަމަ ފުރުސަތު އަދި ހަގީގީ ބާރުވެރިކަން ދެ ޖިންސަށް ހަމަހަމަ އަށް ލިބިދިނުމަކީ މި ދައުރުގައި ޕީޕީއެމްއިން ވެސް ތަރުހީބު ދެއްވާނެ ކަމެއް ކަމުގައި ޔަގީން ކުރަން،" ނަހުލާ ވިދާޅުވި އެވެ.
އޭނާ އަކީ މާލެއަށް ދިމާވެފައިވާ މައްސަލަތައް ހައްލު ކުރުމަށް މޭޔަރުގެ މަގާމަށް އިންތިހާބުވި ޑރ. މުހައްމަދު މުއިއްޒާއެކު މަސައްކަތް ކުރުމުގެ ގާބިލުކަމާއި ތައުލީމު ވެސް ލިބިފައި ހުރި މީހެއް ކަމަށް ވެސް ނަހުލާ ވިދާޅުވި އެވެ.
އަބްދުﷲ ނާސިރު ކުރި ޓްވީޓެއްގައި ވިދާޅުވެފައިވަނީ ރައްޔިތުންނަށް ހިދުމަތް ކުރަން ދިން ފުރުސަތުގެ ބޭނުން އެންމެ ހެޔޮގޮތުގައި ހިފާނެ ކަމަށެވެ. އެގޮތުން މާލޭ ޑެޕިޔުޓީ މޭޔަރުގެ މަގާމަށް އޭނާގެ ޝައުގުވެރިކަން އެބަ ހުރި ކަމަށް ޓްވީޓުގައި ވިދާޅުވެފައިވެ އެވެ.
ޑެޕިއުޓީ މޭޔަރުގެ މަގާމާ ގުޅޭގޮތުން "އަދަދު" އިން ސުވާލު ކުރުމުން ޝުޖާއު ވިދާޅުވީ އެކަމާ މެދު އެއްޗެއް ވިދާޅުވާން އަދި ބޭނުން ނުވާ ކަމަށެވެ.
ކުރިން ބާރަށު ދާއިރާގެ މަޖިލިސް މެމްބަރުކަން ކުރެއްވި ޝުޖާއުއަށް ތާއީދުކޮށް ވާހަކަދައްކާ އިދިކޮޅު ކޯލިޝަންގެ ސަޕޯޓަރުން ބުނަނީ ޝުޖާއުއަކީ ޕީޕީއެމް އެންމެ ހާލުގައި ޖެހުނު ދުވަހު ގިނަ މަސައްކަތްތަކެއް ޕާޓީއަށްޓަކައި ކޮށްދެއްވި ބޭފުޅެއް ކަމަށެވެ. އެހެންކަމުން ޑެޕިއުޓީ މޭޔަރު ކަމަށް އޭނާ ގެނައުމަށް އެ ސަޕޯޓަރުން އަންނަނީ ގޮވާލަމުންނެވެ.
ޕީޕީއެމްގެ ސަޕޯޓަރުންގެ މެދުގައި ޑެޕިއުޓީ މޭޔަރުންގެ ވާދަވެރިކަން ބޮޑު ނަމަވެސް އެ ޕާޓީން އަދި ރަސްމީކޮށް އެކަމާމެދު ގޮތެއް ނުނިންމަ އެވެ. ޑެޕިއުޓީ މޭޔަރު ކަނޑައަޅާނީ ޕާޓިންކަމެއް ނުވަތަ ނޫން ކަމެއް ވެސް އަދި ނޭނގެ އެވެ.
މިއީ މާލޭން އިންތިހާބެއް އިދިކޮޅު ޕީޕީއެމް/ޕީއެންސީއަށް ކާމިޔާބުވި ފުރަތަމަ ފަހަރެވެ. މީގެ ކުރިން ހުރިހާ އިންތިހާބެއްގައި މާލޭގެ އަގުލަބިއްޔަތު ނަގަނީ ވެރިކަން ކުރާ ކޯލިޝަންގެ މައި ޕާޓީ އެމްޑީޕީންނެވެ.
