ދޫނިދޫ ޖަލުގެ ގޮޅިއަކުން ނެރެ ގައިދީއަކަށް ފުލުހުން އަނިޔާ ކުރި ކަމަށް ބުނާ މައްސަލައިގައި ހިއުމަން ރައިޓްސް ކޮމިޝަނުން ޖަލަށް ގޮސް ގައިދީގެ ބަޔާން ނަގައިފި އެވެ.
ފުލުހުން އަނިޔާ ކުރި ކަމަށް ބުނަނީ ޓެރަރިޒަމްގެ މައްސަލައެއްގައި ތ. ތިމަރަފުށިން ހައްޔަރުކޮށްފައިވާ ގުރޫޕުގެ ތެރެއިން އެ ރަށު، އަސްރަފީވިލާ، އަހުސަން މުހައްމަދަށެވެ.
ފުލުހުންގެ ބަންދުގައި ދޫނިދޫގައި ހުރި މީހަކަށް ފުލުހުން އަނިޔާ ކުރިކަމަށް ބުނާ މައްސަލައަކީ އެޗްއާރުސީއެމުން ބަލަމުންދާ މައްސަލައެކެވެ.
"އަނިޔާ ލިބުނުކަމަށް ބުނާ ފަރާތާ [މި ކޮމިޝަނުން] ބައްދަލުކޮށް ވަނީ މައުލޫމާތު ސާފުކޮށްފަ. ކޮމިޝަނުން މި މައްސަލަ ބަލަމުންދާކަން އާއިލާއަށް ވެސް ވަނީ ސާފްކޮށްދެވިފަ. މި މައްސަލަ އެންޓި-ޓޯޗަރ ގާނޫނުގެ ދަށުން އެޗްއާރުސީއެމުން ތަހުގީގު ކުރާނެކަމުގައި ދަންނަވަން،" އެޗްއާރްސީއެމުން ޓުވިޓަރުގައި ބުނެފައިވެ އެވެ.
އަހްސަން ހައްޔަރުކުރީ، އައިސިސްއާ ގުޅިގެން އެ ޖަމާއަތުގެ އިރުޝާދުގެ ދަށުން ރާއްޖޭގައި ޓެރަރިޒަމްގެ އަމަލުތައް ހިންގަން ހިތްވަރުދީ ރާވަމުން ދިޔަ ކަމުގެ ތުހުމަތަށެވެ. އޭނާއާ އެކު ހައްޔަރުކުރި ހަތް މީހެއްގެ މައްޗަށް ޕްރޮސިކިއުޓަ ޖެނެރަލްގެ އޮފީހުން ވަނީ ޓެރަރިޒަމްގެ ދައުވާ އުފުލައިފަ އެވެ.
ޖަލުގައި އަހްސަންއާ ދޭތެރޭގައި އަމަލުކުރި ގޮތާއި ގޮޅިއަށް ވެއްދުމުގައި ބާރުގެ ބޭނުންކުރުމުން އާއިލާ އިން ކުރި ޝަކުވާ ސާފުކޮށްދެމުން ފުލުހުން ރޭ ބުނީ އަހްސަން ގޮޅިން ބޭރަށް ނެރެން ޖެހުނީ ގޮޅީގައި ހަރުކޮށްފައި ހުރި ކެމެރާއަށް ނުފެންނަ ގޮތް ހެދުމަށް އެކި މަސައްކަތްތައް ކުރަމުން ދިއުމުންނެވެ. ތަކުރާރުކޮށް ކެމެރާ ބްލައިންޑް ކުރި ކަމަށް ފުލުހުން ބުންޏެވެ.
މި މައްސަލައިގައި އޭނާ ގޮޅިން ބޭރަށް ނެރުނީ ފުލުހުން ބުނިގޮތުގައި މިދިޔަ ހޮނިހިރުދުވަހުގެ ރޭ އަށެއް ޖެހި އިރެވެ. އޭނާ އަށް ފުލުހުން އެންގީ ކެމެރާގައި އުނގުޅާފައި ހުރި ދަތް އުނގުޅާ ބޭސް ސާފުކުރުމަށާއި ކެމެރާ ބްލައިންޑް ކުރަން ބޭނުންކުރާ ތަކެތި ގޮޅިން ނެރުމަށެވެ.
