ކަޝްމީރު މައްސަލާގައި ހައްލެއް ލިބޭތޯ އިންޑިއާ އާއި ޕާކިސްތާނުގެ ޖާސޫސީ އޮފިޝަލުން މިދިޔަ ޖެނުއަރީ މަހު ޑުބާއީގައި ސިއްރުން މަޝްވަރާ ކުރި ކަމަށް ރޮއިޓާޒްއިން ރިޕޯޓުކޮށްފި އެވެ.
އިންޑިއާ އާއި ޕާކިސްތާނުގެ ހަމަނުޖެހުން ބޮޑުވީ 2019 ވަނަ އަހަރު ކަޝްމީރުގައި އަމިއްލައަށް މަރުވެގެން އިންޑިއާގެ އަސްކަރީ އުޅަނދުތަކެއް ގޮއްވާލުމުގެ ފަހަތުގައިވަނީ ޕާކިސްތާނުގެ ހަނގުރާމަވެރިން ކަން ހާމަވުމުންނެވެ.
އެކަމާ ހިތްހަމަނުޖެހިގެން އިންޑިއާއިން ވަނީ އެ ގައުމުން ކޮންޓްރޯލް ކުރާ މުސްލިމުން ގިނަ އަދަދަކަށް ދިރިއުޅޭ ކަޝްމީރުގެ ސަރަހައްދަށް އަމިއްލައަށް ވެރިކަން ހިންގުމަށް ދީފައިވާ ހުއްދަ އަތުލާފަ އެވެ. އެއާއެކު އިންޑިއާ އާއި ޕާކިސްތާނުގެ ގުޅުމަށް އަސަރުކޮށް، ވިޔަފާރި އަށް ވެސް ބުރޫއެރި އެވެ.
ނަމަވެސް މިހާރު ދެ ގައުމުން މަސައްކަތް ކުރަނީ އަލުން ޑިޕްލޮމެޓިކް ގުޅުން ހަމައަކަށް އަޅުވަން ކަމަށް ރޮއިޓާޒް ނޫހުން އޮފިޝަލުންނާ ހަވާލަދީ ރިޕޯޓުކޮށްފައި ވެއެވެ.
އިންޑިއާ އާއި ޕާކިސްތާނުން ވެސް ދެކެނީ މުޅި ކަޝްމީރަކީ އެ ގައުމެއްގެ ބަޔެއްގެ ގޮތުގަ އެވެ. އަދި ދެ ގައުމުން އަންނަނީ ކަޝްމީރު ދެ ފަޅިކޮށް، އެ ގައުމެއްގެ ފަޅި އެ ގައުމަކުން ކޮންޓްރޯލް ކުރަމުންނެވެ.
މަޝްވަރާތަކާ ގުޅޭ ގޮތުން ރޮއިޓާޒް އިން ރިޕޯޓުކުރީ ކީކޭ؟
ރޮއިޓާޒް އިން ބުނި ގޮތުގައި އިންޑިއާގެ ޖާސޫސީ އިދާރާއެއް ކަމަށްވާ ރިސާޗް އެނެލިސިސް ވިންގް އަދި ޕާކިސްތާނުގެ އިންޓަ ސާވިސަސް އިންޓެލިޖެންސުގެ އޮފިޝަލުން ޖެނުއަރީ މަހު ޑުބާއީއަށް ދަތުރުކޮށް ބޭއްވި މަޝްވަރާތަކުގެ މެދުވެރިއަކަށް އުޅުނީ ޔުނައިޓެޑް އަރަބް އެމިރޭޓްސް (ޔޫއޭއީ) ސަރުކާރުންނެވެ.
އެކަމާ ގުޅޭ ގޮތުން އިންޑިއާ އަދި ޕާކިސްތާނުން ވެސް މިހާތަނަށް ރަސްމީކޮށް އެއްޗެއް ބުނެފައެއް ނުވެ އެވެ.
އިންޑިއާ އާއި ޕާކިސްތާނުން މީގެ ކުރިން ވެސް މިފަދަ މަޝްވަރާތައް ކޮށްފައި ވެއެވެ. ނަމަވެސް މަޝްވަރާއަށް ފަހު ރަސްމީކޮށް ދުވަހަކު ވެސް އެކަން ހާމައެއް ނުކުރެ އެވެ.
މި ފަހަރުގެ މަޝްވަރާތައް ޖެނުއަރީގައި ބޭއްވުމަށް ފަހު ދެ ގައުމުން ވެސް ނިންމީ ކަޝްމީރު ދެ ފަޅިކޮށްލާ "ލައިން އޮފް ކޮންޓްރޯލް" ސަރަހައްދުގައި ހަމަލާ ބަދަލު ކުރުން މެދުކަނޑާލުމަށެވެ. އަދި އެ ގައުމަކުން ކޮންޓްރޯލް ކުރާ ސަރަހައްދުގައި މި އަހަރު އިންތިހާބު ބާއްވަން ވެސް ނިންމާފައި ވެއެވެ.
އޭގެ އިތުރުން އިންޑިއާއިން ކޮންޓްރޯލް ކުރާ ސަރަހައްދުގައި ކަޝްމީރު ރައްޔިތުންނަށް ވެރިކަން ހިންގުމަށް އޮތް ހުއްދަ އަތުލުމުން ފާޑުކިޔުން ހުއްޓާލާނެ ކަމަށް ޕާކިސްތާނުން އެއްބަސްވެފައި ވެއެވެ.
ބަދަލުގައި އިންޑިއާއިން އެއްބަސްވީ އެ ގައުމުން ކޮންޓްރޯލް ކުރާ ސަރަހައްދުގައި އުޅޭ އިންޑިއާ ސިފައިންނަށް އަމާޒުވާ ހަމަލާތަކުގެ ތުހުމަތު ޕާކިސްތާނަށް ނުކުރުމަށެވެ.
