ރޯދަ މަހު ވެކްސިން ޖަހާދޭ ގަޑި މިއަދުން ފެށިގެން އިތުރު ކޮށްފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފި އެވެ.
އެގޮތުން މިހާރު ވެކްސިން ޖަހާ ދޭން ހަމަ ޖެހިފައިވަނީ ރޭގަނޑު ނުވަޔަކުން 11:45 އަށެވެ.
ކުރިން އެޗްޕީއޭ އިން ކުރި އިއުލާނުގައި ވަނީ ރޯދަ މަހު ވެކްސިން ޖަހައިދޭނީ ރޭގަނޑު 9-11 އަށް ކަމަށެވެ. ނަމަވެސް މާލެ ސަރަހައްދުގައި ވެކްސިން ޖަހަން ތިބި މީހުން ގިނަވުމުން މި ވަނީ ވަގުތު އިތުރުކޮށްފަ އެވެ.
ފުރަތަމަ ޑޯޒް ޖަހާ މިހުންނަށް ވެކްސިން ދޭން ހަމަ ޖެހިފައިވަނީ ޓްރީޓޮޕް ހޮސްޕިޓަލުންނެވެ. ފުރަތަމަ ޑޯޒް އަށް މިހާރު ޖަހަމުން ދަނީ ހަމަ އެކަނި ސިނޮފާމް ވެކްސިނެވެ.
ކޮވިޝީލްޑް ވެކްސިންގެ ދެވަނަ ޑޯޒް ޖަހަން ހަ ސެންޓަރެއް އެޗްޕީއޭ އިން ވަނީ ކަނޑައާޅާފަ އެވެ. އެއީ ސޯޝަލް ސެންޓަރާއި ނޭޝަނަލް އާޓް ގެލަރީއާއި ރައްޔިތުންގެ މަޖްލިހާއި ހުޅުމާލެ ވެކްސިނޭޝަން ސެންޓަރާއި ވިލިމާލެ ޒުވާނުންގެ މަރުކަޒުގެ އިތުރުން ސެނެހިޔާ އިންނެވެ.
ރާއްޖެއިން މިހާތަނަށް ވަނީ 273،660 މީހުން ވެކްސިން ޖަހާފަ އެވެ.
