ހުޅުމާލޭގައި ކުރީގެ ސަރުކާރުން ފަށައި އެކި ސަބަބުތަކާ ހެދި ހުއްޓިފައި ވަނިކޮށް މި ސަރުކާރުގައި އަލުން އިމާރާތްކުރަމުން އަންނަ މަތީ ފެންވަރުގެ 1،344 ފްލެޓް ސަރުކާރު ހިއްސާވާ ކުންފުނިތަކުގެ އިތުރުން އާއްމުންނަށް ވެސް ވިއްކަން ވިސްނަމުން އަންނަ ކަމަށް ހުޅުމާލެ ޑިވެލޮޕްމަންޓް ކޯޕަރޭޝަން (އެޗްޑީސީ)ން ބުނެފި އެވެ.
އެޗްޑީސީގެ މެނޭޖިން ޑިރެކްޓަރު އަހްމަދު ސުހެއިލް "އަދަދު" އަށް ވިދާޅުވީ ކުރީގެ ސަރުކާރުގައި ހައުސިން މިނިސްޓްރީން ކުރިއަށް ގެންދާ ގޮތަށް ނިންމި މަޝްރޫއު ފަހުން އެޗްޑީސީއަށް ބަދަލުކޮށްފައިވާ ކަމަށެވެ.
ކޮންޓްރެކްޓަރާ އެކު އޭރު ހައުސިން މިނިސްޓްރީން އެ މަޝްރޫއު ހިންގަން އެއްބަސްވެފައިވާ އަގުތައް ވަރަށް ބޮޑު ކަމަށާއި އެކަމަކު އެ އިމާރާތްތައް ހުރީ މި ފަހުން ހުޅުމާލޭގައި އުސްކޮށް ހަދާ ތަންތަނުގެ އުސޫލަށް ފެތޭ ގޮތަށް ނޫން ކަމަށް ވެސް ވިދާޅުވި އެވެ.
ސުހެއިލް ވިދާޅުވި ގޮތުގައި ހުޅުމާލޭގައި ފަހުން އިމާރާތްތައް ހަދަމުން އަންނަނީ ޕާކިން އާއި ކޮމާޝަލް ބޭނުންތަކަށް ވެސް ޖާގަ ހުސްކޮށްގެންނެވެ. އެކަމަކު އެ މަޝްރޫއުގައި އެކަން ހިމަނާފައި ނެތްއިރު، އެކަން ކުރެވެން އޮތީ އިތުރު ހަރަދުތަކާ އެކުގައި ކަމަށް އޭނާ ވިދާޅުވި އެވެ.
"އަޅުގަނޑުމެން ނިންމީ އެއަކަށް އިތުރު ލާރިއެއް [ކުންފުންޏަށް] ނުދޭނަމޭ. ޕްރޮޖެކްޓް ސްކޭލް ޑައުންކޮށްލާނީއޭ. ކުރިން އިނީ 1،500 ފްލެޓް އަޅާ ގޮތަށް. އަޅުގަނޑުމެން ގްރައުންޑް ފްލޯއަށާއި ފަސްޓް ފްލޯއަށް ކޮމާޝަލް އާއި ޕާކިންލާން ވެގެން ފްލެޓުގެ އަދަދު މަދުކުރީ 1،344 އަށް،" ސުހެއިލް ވިދާޅުވި އެވެ.
އޭނާ ވިދާޅުވީ މި ސަރުކާރުގައި ޖުލައި، 2019 ގައި އަލުން ފެށި މަޝްރޫއުގައި ހައެއްކަ މަސް ކޮވިޑާ ހެދި މަސައްކަތް ނުކުރެވި ގެއްލިގެން ހިނގައްޖެ ކަމަށެވެ. އެކަމަކު އަންނަ މާޗަށް ނިމޭނެ ކަމުގެ ޔަގީންކަން ކޮންޓްރެކްޓަރު ދީފައިވާ ކަމަށް ސުހެއިލް ވިދާޅުވި އެވެ.
ސުހެއިލް "އަދަދު"އާ ވާހަކަ ދައްކަވަނީ: އޭނާ ވިދާޅުވި ގޮތުގައި މަތީފެންވަރުގެ 1344 ފްލެޓް އާއްމުންނަށް ވެސް ގަތުމުގެ ފުރުސަތު ހުޅުވާލަން އަންނަނީ ވިސްނަމުން. -- ފޮޓޯ: ހުސެއިން ވަހީދު / އަދަދު
އެ ފްލެޓްތައް ގަތުމުގެ ފުރުސަތު އެޗްޑީސީން ވަނީ ސަރުކާރު ހިއްސާވާ ކުންފުނިތަކަށް މިހާރު ހުޅުވާލައިފަ އެވެ. އެގޮތަށް ނިންމީ، އޭނާ ވިދާޅުވި ގޮތުގައި، އަގުބޮޑުކޮށް އިމާރާތްކޮށްފައިވާ ފްލެޓްތަކަކަށް ވެފައި ބޭންކު ލޯނު ނަގައިގެން ފްލެޓް ގަންނަ ނަމަ އަގު ބޮޑުވާނެތީ އެވެ.
ހުޅުމާލޭގެ ދެ ވަނަ ފިޔަވަހީގައި އިމާރާތްކޮށްފައިވާ ތިން ކޮޓަރީގެ މި ފްލެޓްތަކުގެ އަގު އުޅެނީ 2.5-2.7 މިލިއަނާ ދެމެދުގަ އެވެ.
"ބޭންކުން މި އޮންނަ ރޭޓުން ކުރަންޏާ ވަަރަށް ބޮޑު އެއްޗެއް ދަައްކަން ޖެހޭ. ބެލީ ބޭންކަށް ނުވަދެ އެމްޕްލޯޔަރުން މެދުވެރިކޮށް ކޮންމެވެސް ކަހަލަ ގެރެންޓީއެއް ދީގެން އެކަން ކުރެވިދާނެ ކަމަށް. އޭރަށް މިސާލަކަށް އަޅުގަނޑު ސްޓާފެއްގެ ގޮތުގައި އުޅޭތީ އެމްޕްލޯޔާ މި ބުނަނީ އެޗްޑީސީން ޔަގީންކޮށްދޭނަމޭ މުސާރައިން ކަނޑާފައި މަހުން މަހަށް ދައްކައިދޭން،" ސުހެއިލް ވިދާޅުވި އެވެ.
"ކްރެޑިޓް ސްކީމް އޮންނަ ކަހަލަ ގޮތަކަށް. އަޅުގަނޑުމެން މިހާރު މިބަަލަނީ ޕަބްލިކަށް ހުޅުވާލައިގެން ވެސް ބޭންކަށް ނުވަދެ އެކަން ވާނެ އޮޕްޝަނެއް އޮތްތޯ. އަޅުގަނޑުމެން މިގޮތަށް ދާން ނިންމި މަގްސަދަކީ ވީހާވެސް ކުޑަ އަގެއްގައި ދިނުން."
އޭނާ ވިދާޅުވި ގޮތުގައި ކުރިއަށް އޮތް މަހެއްހާ ދުވަހުގެ ތެރޭގައި އެކަމަށް ގޮތެއް ކަނޑައެޅޭނެ އެވެ.
ސަރުކާރުގެ ބައެއް ކުންފުނިތަކުން ވެސް ވަނީ މި ފްލެޓްތައް ގަތުމަށް ޝައުގުވެރިކަން ފާޅުކޮށްފަ އެވެ. ކުރީގެ ސަރުކާރުގައި ހިޔާ މަޝްރޫއުގެ ދަށުން ކުންފުނިތަކުގެ މުވައްޒަފުންނަށް ހާއްސަކޮށްގެން މަޝްރޫއެއް ކުރިއަށް ގެންދިޔަ ނަމަވެސް ބައެއް ތަންތަނުގެ މަސައްކަތް ވަނީ ހުއްޓިފަ އެވެ.
ސުހެއިލް ވިދާޅުވީ ގިނަ ކުންފުނިތަކަކުން ޝައުގުވެރިކަން ފާޅުކޮށްފައި ވިޔަސް އެއްވެސް ބަޔަކާ އެކު މިހާތަނަށް އެގްރިމެންޓެއްގައި ސޮއި ނުކުރާ ކަމަށެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ފެށި މި މަޝްރޫއުގައި ފްލެޓްތައް އެޅީ ޗައިނާ މެޝިނަރީ އިންޖިނިއަރިން ކޯޕަރޭޝަން (ސީމެކް) އިންނެވެ. މިއީ، ހުޅުމާލޭގެ ފުރަތަމަ ފިޔަވަހީގައި 1،000 ފްލެޓް އަދި އޭގެ ފަހުން ވެސް ހުޅުމާލޭގައި 700 ފްލެޓްގެ މަޝްރޫއަކާއި އަތޮޅުތަކުގައި ވެސް ބޯހިޔާވަހިކަމުގެ ބައެއް މަޝްރޫއުތައް ހިންގި ކުންފުންޏެކެވެ.
