މިދިޔަ ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިހާބަކީ އެހެން އިންތިހާބުތަކާ އަޅާބަލާއިރު އޮފިޝަލުންނާ ގުޅޭ ޝަކުވާތައް ގިނަ އިންތިހާބެއް ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފި އެވެ.
އީސީގެ ރައީސް އަހުމަދު ޝަރީފް، "އަދަދު" އަށް ވިދާޅުވީ އެންމެ ގިނައިން ހުށަހަޅާފައިވަނީ ޑޭޓާ އެންޓްރީ އޮފިޝަލުންނާ ގުޅޭ ޝަކުވާ ކަމަށެވެ. ވޯޓު ފޮށިތަކުގެ ނަތީޖާ އީސީގެ ވެބްސައިޓަށް ލުމަށް ޑޭޓާ އެންޓްރީ އޮފިޝަލުންތަކެއް މިފަހަރު ނަގާފައިވާއިރު ނުބައި ޝީޓުތައް ސައިޓަށް ލައިފައިވާ ކަމުގެ ޝަކުވާ ބޮޑު ކަމަށް ޝަރީފް ވިދާޅުވި އެވެ.
އެފަދަ ޝަކުވާތައް އިލެކްޝަންސް ކޮމިޝަނުން އަންނަނީ ބަލަމުންނެވެ.
އިންތިހާބުގެ 2،000 އޮފިޝަލުން ތަމްރީންކުރަން ލިބުނީ ހަފުތާއެއް. މި މުއްދަތުގައި އެކަށީގެންވާ މައުލޫމާތު ދެވި ތަމްރީން ފުރިހަމައަށް ނުގެންދެވޭ. -- ޝަރީފް
ވޯޓުލާ މަރުކަޒުތަކުގައި ފޮށީގެ ވެރިން އަމަލު ކޮށްފައިވާ ގޮތްތަކާ ގުޅޭގޮތުން ވެސް ޝަކުވާ ހުށަހަޅާފައިވާ ކަމަށް ޝަރީފް ވިދާޅުވި އެވެ. އެގޮތުން މަޖިލިސް މެމްބަރުން ވޯޓުލާ މަރުކަޒުގައި ހަރަކާތްތެރިވުން ނުހުއްޓުވުމާއި ވޯޓުލާން ގޮސް ހުއްދަ ނެތި ފޮޓޯ ނެގިއިރު ނުހުއްޓުވައިގެން ވެސް ޝަކުވާ ހުށަހަޅާފައިވާ ކަމަށް އޭނާ ވިދާޅުވި އެވެ. އަދި ކޮވިޑަށް ޕޮޒިޓިވް ވެފައިވާ މީހުން ވޯޓުލީ ވަގުތު އެހެން މީހުންނަށް ވޯޓު ލާން ފުރުސަތު ދީގެން ވެސް ޝަކުވާ ހުށަހަޅާފައިވާ ކަމަށް ޝަރީފް ވިދާޅުވި އެވެ.
އެހެން އިންތިހާބުތަކަށް ވުރެން މިފަހަރު އޮފިޝަލުންނާ ގުޅޭ ގޮތުން ހުށަހެޅުނު ޝަކުވާ އިތުރުވި ސަބަބެއް ކަމަށް ޝަރީފް ވިދާޅުވީ ކޮވިޑުގެ ސަބަބުން އޮފިޝަލުން ތަމުރީނު ކުރުމަށް އެކަށީގެންވާ ވަގުތު ނުލިބުމެވެ.
"ޕެންޑަމިކް ވީމަ އޮފިޝަލުންނަށް ދޭން ޖެހޭ ވަގުތު ދެވުންލެން މަދުވި. ދޭން ބޭނުންވާ މައުލޫމާތާއި ތަމްރީނުތައް ދިނުމަށް އުނދަގޫތައް ކުރިމަތިވި. 2000 އެއްހާ މީހުން ޓްރެއިން ކުރަން ލިބުނީ ހަފުތާއެއް. ޓްރެއިން ކުރާނެ އެކަށީގެންވާ ވަގުތެއް ނުލިބުނު،" ޝަރީފް ވިދާޅުވި އެވެ.
ލޯކަލް ކައުންސިލްތަކުގެ އިންތިހާބުގެ ނަތީޖާ އެންޓާ ކުރުމުގައި ދިމާވި އޮޅުންތަކެއްގެ ސަބަބުން ވަގުތީ ނަތީޖާ އިއުލާން ކުރުން ވެސް ވަނީ ފަސް ވެފަ އެވެ. ނަތީޖާ އޮޅުން އަރާ 18 ފޮއްޓެއް އަލުން ގުނަން އީސީން އިއްޔެ މަސައްކަތް ކުރުމުން އިދިކޮޅާއި އެމްޑީޕީގެ ސަޕޯޓަރުން އިލެކްޝަންސް ކޮމިޝަންގެ އިންތިހާބާ ގުޅޭ މައި މަރުކަޒު ހިންގާ ބާ ޖަމާލުއްދީނަށް އެއްވެ ވަނީ މުޒާހަރާ ކޮށްފަ އެވެ.
