ޒިއުރިކް (އޭޕްރީލް 13) - މެޗުތަކުގެ ތެރެއިން ރެފްރީން މަޝްހޫރު ކުޅުންތެރިންގެ އޮޓޯގްރާފް ހޯދުމަކީ ބަލައިގަނެވޭނެ ކަމެއް ނޫން ކަމަށް ޔުއެފާގެ ރެފްރީސް ޗީފް ރޮބާޓޯ ރޮސެޓީ ވިދާޅުވެއްޖެ އެވެ.
ރޮސެޓީ މިހެން ވިދާޅުވެފައިވަނީ ދާދި ފަހުން ޗެމްޕިއަންސް ލީގުގެ ކުއާޓާ ފައިނަލުގައި މެންޗެސްޓާ ސިޓީ އާއި ބޮރޫޝިއާ ޑޯޓްމަންޑް ކުޅުނު މެޗަށް ފަހު ޓަނަލް ތެރެއިން އެ މެޗުގެ ލައިންސްމަން ރުމޭނިއާގެ އޮކްޓާވިއަން ސޯވްރޭ، ޑޯޓްމަންޑަށް ކުޅޭ އާލިން ބްރައުޓް ހާލަންޑްގެ އޮޓޯގްރާފް ހޯދުމުންނެވެ. ސޯވްރޭ ލައިވް ޓީވީގައި ހާލަންޑްގެ އޮޓޯގްރާފް ހޯދަން އެދުމުން އެކަމަށް ގިނަ ބަޔެއްގެ ފާޑުކިޔުން އަމާޒުވި އެވެ.
ޔުއެފާގެ ރެފްރީސް ޑިޕާޓްމަންޓުން މެމްބަރު ގައުމުތަކާއި ރެފްރީންނަށް ފޮނުވި އީމެއިލެއްގައި ބުނެފައިވަނީ ޕްރޮފެޝަނަލް އުސޫލުގެ ތެެރެއިން އަމަލުކުރުމަށާއި އެގޮތުން ބަލާއިރު މެޗުގެ ލައިވް މަންޒަރުތަކުގެ ތެރެއިން ކުޅުންތެރިން ކައިރިން ރެފްރީން އޮޓޯގްރާފަށް އެދުން ބަލައިނުގަނެވޭނެ ކަމަށެވެ. ރޮސެޓީ ވަނީ ޕްރޮފެޝަނަލް އުސޫލު ހިފެހެއްޓުމަށް ރެފްރީންނަށް ނަސޭހަތްތެރިވެފަ އެވެ.
"ޔުއެފާގެ މިޝަންއެއްގައި އުޅޭއިރު މަސައްކަތްކުރަން ޖެހޭނީ އެތިކްސްގެ ތެެރެއިން. ރެފްރީންނަކީ މެޗުގެ ތެރެއިން އެންމެ އިސް ފަރާތް މެޗު ނިމުނު ކަމުގައި ވިޔަސް ރެފްރީ ޖޯޒީގައި ހުންނައިރު އޭގެ ހައިބަތު ހިފަހައްޓަންވާނެ. އެހެންވީމަ މި ފަދަ ކަންކަމަށް ރެފްރީން ވަރަށް ރަނގަޅަށް ވިސްނާލަންޖެހޭ،" ރޮސެޓީ ވިދާޅުވި އެވެ.
އޭނާ ވިދާޅުވީ މެޗުތަކުގައި އަންނަ ހާލަތްތަކުގެ ސަބަބުން ރެފްރީންނާ މެދު އެކި ގޮތްގޮތަށް ފާޑުކިޔުން އަމާޒުވާއިރު، އެ ފަދަ ޒިންމާދާރު މަގާމެއްގައި ތިބި ބަޔަކު އަމަލުކުރަން ޖެހޭނީ އެންމެ އިންސާފުވެރިކަމާ އެކު ވީހާ ވެސް ބޮޑަށް ފާޑުކިޔުން ކުޑަކުރެވޭނެ ގޮތަށް ކަމަށެވެ.
"ޔަގީނުން ވެސް ރެފްރީއެއްގެ އޮޓޯގްރާފް ހޯދަން ކުޅުންތެރިއަކު ނުދާނެ. އެއީ ރެފްރީންނަށް އިހުތިރާމް ކުރަންޖެހޭތީ. އެކަމަކު ރެފްރީން ގޮސް ކުޅުންތެރިންގެ އޮޓޯގްރާފް ހޯދަން ފަށައިިފިނަމަ މި ޕްރޮފެޝަންގެ މުސްތަގުބަލަށް އެދެވެނީ ވަރަށް ނުރަނގަޅު މެސެޖެއް،" ރޮސެޓީ ވިދާޅުވި އެވެ.
ހާލަންޑް އޮޓޯގްރާފް ނެގި ލައިންސްމަން ސޯވްރޭ އެކަން ކުރީ ރުމޭނިއާގެ އޯޓިޒަމް ސެންޓަރަށް ފަންޑް ހޯދުމުގެ ގޮތުން އެ އޮޓޯގްރާފް ވިއްކާލުމަށް ކަމަށް ރުމޭނިއާގެ އެފްއޭ އިން ވަނީ ޔުއެފާ އަށް އަންގައިފަ އެވެ. ޖަވާުބުގައި ޔުއެފާ އިން ބުނީ އޮޓޯގްރާފް ހޯދަން ޖެހޭ އުސޫލުތަކެއް ވެސް ހުންނާނެ ކަމަށާއި އޭގެ އެންމެ ރަނގަޅު ގޮތަކީ މެޗުގެ މާހައުލު ނޫން ތަނެއްގައި އެ ފަދަ ކަންކަން ކުރުން ކަމަށެވެ.
