ކޮވިޑްގެ އެންމެ ގޯސް ހާލަތަށް ތައްޔާރުވުމުގެ ގޮތުން ރާއްޖެ ގެންނަން ހަވާލުކުރި ވެންޓިލޭޓަރުތަކުގެ މައްސަލާގައި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދާ ދެމެދު ހިޔާލު ތަފާތުވުން އެބަ އޮތް ކަމަށާއި ނަމަވެސް، އެކަން އެ ދެ ބޭފުޅުންގެ ދެމެދުގެ ގުޅުމަށް އަސަރު ނުކުރާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް ސޯލިހު މިހެން ވިދާޅުވީ މަޝްރަހު ހޫނުކޮށްލި، ވެންޓިލޭޓަރުގެ މައްސަލަ ނެތްނަމަ، ރައީސް ސޯލިހާ އެއްވެސް މައްސަލައެއް ނެތް ކަމަށް އިއްޔެ ރައީސް ނަޝީދު ވިދާޅުވެފައިވަނިކޮށެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ރައީސް ސޯލިހު ވިދާޅުވީ، ވެންޓިލޭޓަރަށް އެމަނިކުފާނާއި ރައީސް ނަޝީދާ ދެމެދަށް ނުވަދެވޭނެ ކަމަށެވެ.
"ވެންޓިލޭޓަރަކަށް ނުވެދެވޭނެ އަޅުގަނޑުމެން ދެމީހުން ދޭތެރެއަކަށް އިނގޭތޯ،"
ރައީސް ސޯލިހު ވިދާޅުވި ގޮތުގައި، ދެ ބޭފުޅުންގެ ދެމެދުގައި ހިޔާލު ތަފާތުވުން ހުއްޓަސް އެމްޑީޕީއަށާއި ގައުމަށް ގެއްލުންވާނެ ކަމެއް ނުކުރައްވާނެ ކަމެވެ. އެމްޑީޕީއަކީ އަބަދުވެސް ހިޔާލު ތަފާތުވުންތަކާއެކު ކުރިއަށްދާ ޕާޓީއެއް ކަމަށެވެ.
"އެމްޑީޕީއަކީ ތަފާތު ވިސްނުމަށް ތަފާތު ފިކުރަށް ޖާގަދޭ ޕާޓީއެއް، އެހެންވީމަ އެމްޑީޕީ އަބަދުވެސް ކުރިއަށް ދާނީ އެ ފިކުރިގަ، އެހެންނަމަވެސް ޕާޓީއަށް ގެއްލުންވާނެ އެއްވެސް ކަމެއް އަޅުގަނޑުމެން އެއްވެސް މީހަކު ނުކުރާނެ،" ރައީސް ސޯލިހު ވިދާޅުވި އެވެ.
ހިޔާލު ތަފާތުމުގެ މައްސަލާގައި ފުރަތަމަ ފަހަރަށް ވާހަކަފުޅު ދައްކަވަމުން އިއްޔެ ނަޝީދު ވިދާޅުވީ ވެންޓިލޭޓަރު މައްސަލާގައި، ދެ ބޭފުޅުންގެ ދޭތެރޭގައި މައްސަލައެއް ނުހުންނާނެ ކަމަށެވެ.
ވެންޓިލޭޓަރު މައްސަލާގައި ސަރުކާރަށް މީގެކުރިން ވެސް ނަޝީދު ފާޑުވިދާޅުވި އެވެ. އެގޮތުން ވަގު ސަރުކާރާއެކު އޮންނަން އެމްޑީޕީ ބޭނުން ނުވާނެ ކަމަށް ވެންޓިލޭޓަރު މައްސަލާގައި ދައުވާނުކޮށް ދެވަނަ ފަހަރަށް ޕްރޮސިކިއުޓާ ޖަނެރަލް (ޕީޖީ)ގެ އޮފީހުން ބޭރުކޮށްލުމާ ގުޅިގެން ނަޝީދު ވިދާޅުވެފައިވެ އެވެ.
އެ މައްސަލާގައި މިހާތަނަށް ދައުވާ ކުރެވިފައިނުވާއިރު އޭސީސީއިން ވަނީ ތަހުގީގުން 11 މީހެއްގެ މައްޗަށް ދައުވާ ކުރެވޭ މިންވަރަށް ހެކި ލިބިފައިވާ ކަމަށް ބުނެފަ އެވެ. ނަމަވެސް މިހާރު ވެސް ޕީޖީއިން ވަނީ އެ މައްސަލާގައި ބައެއް ކަންކަން އިސްލާހު ކުރުމަށް އޭސީސީއަށް އަންގާފަ އެވެ.
ރާއްޖޭގައި ކޮވިޑްގެ ހާލަތު ގޯސްވެގެންދާނެ ކަމުގެ ބިރު އޮތް ވަގުތެއްގައި ދުބާއީގެ އެގްޒެކިއުޓާސް ކުންފުންޏާ ހަވާލުކުރީ 75 ވެންޓިލޭޓަރު ހޯދުމަށެވެ. އެކަމަށް އެދުނު މުއްދަތު ހަމަވިތާ އެތައް ދުވަހެއް ފަހުން އެ ކުންފުނިން ރާއްޖެއަށް ފޮނުވީ 15 ވެންޓިލޭޓަރެވެ. ބާކީ 60 ވެންޓިލޭޓަރު އަދިވެސް ނުލިބެ އެވެ.
އެ ކުންފުނިން ވެންޓިލޭޓަރުތައް ފޮނުވުމަށް 34 މިލިއަން ރުފިޔާގެ ބިޑެއް ހުށަހެޅުމުން މާލިއްޔަތު ގާވައިދާ ހިލާފަށް އެއްބަސްވުމުގައި ސޮއިނުކޮށް 30 މިލިއަން ރުފިޔާ، އެ ކުންފުންޏަށް ދޫކުރި އެވެ. އެ ކުންފުންޏަށް އެ މަސައްކަތް ހަވާލުކޮށްފައިވަނީ ޑަބްލިއުއެޗްއޯގެ ލަފާގެ މަތިން ކަމަށް ހެލްތު މިނިސްޓްރީއިން ބުނެފައިވާއިރު އެފަދަ ލަފާއެއް ދީފައިނުވާނެ ކަމަށް ޑަބްލިއުއެޗްއޯއިން ވަނީ ބުނެފަ އެވެ.
އޭރުގެ ހެލްތު މިނިސްޓަރު އަބްދުﷲ އަމީން ވެސް ވަނީ ޕްރެޝަރުތަކާއި ފާޑުކިޔުންތަކާއެކު އިސްތިއުފާ ދެއްވާފަ އެވެ.
