ރައީސް އިބްރާހިމް މުހައްމަދު ސޯލިހާ ދެމެދު މައްސަލަތަކެއް ޖެހިފައިވާ ކަމަށާއި ވެރިކަން ކުރާ އެމްޑީޕީ ތެރޭގައި ވެސް މައްސަލަތަކެއް އުޅޭ ކަމަށް ކުރީގެ ރައީސް މުހައްމަދު ނަޝީދު ފުރަތަމަ ފަހަރަށް މިއަދު ވިދާޅުވެއްޖެ އެވެ.
ލޯކަލް ކައުންސިލްތަކުގެ އިންތިހާބަށްފަހު ބަލި ގަބޫލު ކުރެއްވުމަށް އެމްޑީޕީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ނަޝީދު ވިދާޅުވީ އެމަނިކުފާނާއި ރައީސް ސޯލިހާ ހިޔާލުތަފާތުވެވަޑައިގަންނަވަނީ "މިސާލަކަށް ވެންޓިލޭޓަރު މައްސަލައިގައި" ކަމަށެވެ.
"ތިކަމާ ގުޅޭ ގޮތުން އަޅުގަނޑު ވިސްނާ ވިސްނުމަކީ، އަޅުގަނޑު އަމިއްލައަށް ހިތަށް ގެންނަ ކަމަކީ، އަޅުގަނޑުމެން ދެމީހުންގެ ދޭތެރޭގައި މައްސަލަ ހުރެގެން..، މިހާރު މައްސަލަ މި ހުންނަނީ މިސާލަކަށް ވެންޓިލޭޓަރު މައްސަލައިގައި. އަޅުގަނޑުމެން ދެ މީހުންގެ ދޭތެރޭގައި މައްސަލައެއް ނުހުންނާނެ ވެންޓިލޭޓަރުގެ މައްސަލަ ނެތް ނަމަ،" ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ނަޝީދު ވިދާޅުވި އެވެ.
ރައީސް ސޯލިހާ ދެމެދު މައްސަލައެއް ޖެހިފައިވާ ކަމަށް އިޝާރާތް ކުރައްވާ މިއީ ނަޝީދު ވާހަކަ ދެއްކެވި ފުރަތަމަ ފަހަރެވެ.
އޭގެ އިތުރުން މާލެއިން އެމްޑީޕީ ނާކާމިޔާބުވީ ޕާޓީ ތެރޭގައި އުފެދިފައިވާ މައްސަލަތަކެއްގެ ސަބަބުން ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވިދާޅުވެފައިވާތީ، އެކަމަށް އެއްބަސްވެވަޑައިގެން ނަޝީދު ވިދާޅުވީ މައްސަލަތައް އުފެދެންޖެހޭ ސަބަބަކީ ކޮރަޕްޝަން ކަމަށެވެ.
"އާދެ. ކޮރަޕްޝަން. ދެން އަޅުގަނޑު ދަންނަވައިފިން އަޅުގަނޑުމެން އިތުރަށް ވިސްނާނަމޭ. އެމްޑީޕީގެ ގިނަ މެންބަރުން ނޭދޭނެ ރާއްޖޭގައި ކޮރަޕްޝަން އެހެން އޮންނާކަށް އަދި ފާޅުގައި ސަރުކާރު ތެރޭގައި އެކަހަލަ ކަންތައް ހިނގާކަށް. އެހެންވެ އެކަހަލަ ކަންތައް ހިނގާ ކަމަށްވަނީ ނަމަ އެއްބަޔަކު ހިތްހަމަނުޖެހޭނެ. ދެން އެކަން ފާހަގަވަމުން، ހާމަވަމުން ވެސް ބައެއް ފަހަރު ދާނެ،" އެމަނިކުފާނު ވިދާޅުވި އެވެ.
މިހާތަނަށް ގުނި ވޯޓުތަކުން ގާތްގަނޑަކަށް 60 ޕަސެންޓަށް ވުރެ ގިނަ ވޯޓު ހޯދައިގެން މާލޭ މޭޔަރު ކަމުގެ ގޮނޑި ކާމިޔާބުކޮށްފައި ވަނީ ކުރީގެ ހައުސިން މިނިސްޓަރު ޑރ. މުހައްމަދު މުއިއްޒެވެ. އަދި މާލޭ ސިޓީ ކައުންސިލްގެ ވެސް ފަސް ގޮނޑި އިދިކޮޅު ޕީޕީއެމުން ވަނީ ކާމިޔާބު ކޮށްފަ އެވެ.
