އިއްޔެގެ ވަގުތެއްގައި ރޯވެގެން އަޑިއަށް ދިޔަ ތެޔޮ ބޯޓުން ތިމާވެއްޓަށް ނުރައްކަލެއް ނެތް ކަމަށް އީޕީއޭ އިން ބުނެފި އެވެ.
ފަސްދޮޅަސް ޓަނުގެ ޑީސަލާ އެކު އަޑިއަށް ދިޔައީ ބްރޯ ފިއުލް ނަމަކަށް ކިޔާ ކުންފުންޏެއްގެ "ސީ ސްޓާ" ބޯޓެވެ. މި ބޯޓު އަޑިއަށް ދިޔައީ އެނބޫދޫފިނޮޅު ފަޅުގެ އިރުން 1.5 ނޯޓިކަލް މޭލު އޮންނަ ސަރަހައްދަކަށެވެ. މި ސަރަހައްދުގެ ފުންމިނަކީ 1000 މީޓަރާ 1400 މީޓަރާ ދެމެދެވެ.
މި ހާދިސާގައި ބޯޓުގައި ތިބި ހަތަރު މީހުންގެ ތެރެއިން އެއްވެސް މީހަކަށް އަނިޔާއެއް ލިބިފައެއް ނުވެ އެވެ.
މިއަދު ބޭއްވި ޕްރެސް ކޮންފަރެންސެއްގައި، މި ހާދިސާގެ ސަބަބުން ތިމާވެއްޓަށް ކުރިމަތިވެދާނެ ނުރައްކަލަކާ ގުޅޭގޮތުން ހުރި ކަންބޮޑުވުންތަކާ ގުޅިގެން އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް ވިދާޅުވީ، އެ ފުން މިނުން ތިމާވެއްޓަށް ފާހަގަކުރެވޭ ވަރުގެ ނުރައްކަލެއް ނެތް ކަަމަށެވެ.
ނަމަވެސް، ދިމާވެދާނެ ކަމަކަށް ރައްކާތެރިވުމުގެ ގޮތުން އެ ސަރަހައްދު މޮނީޓާ ކުރަމުން ދާނެ ކަމަށް އޭނާ ވިދާޅުވި އެވެ.
މި ހާދިސާއާ ގުޅިގެން މިހާތަނަށް އެމްއެންޑީއެފުން ވެފައިވާ ތައްޔާރިތަކާ ގުޅިގެން ކޯސްޓުގާޑުގެ ކޮމާންޑަންޓް މުހައްމަދު ސަލީމް ވިދާޅުވީ، އެ ސަރަހައްދުން ތެލުގެ އަސަރު ފެނޭތޯ މޮނީޓާ ކުރަމުން އަންނަ ކަމަށެވެ.
އަދި މިއަދު ހެނދުނުގެ ވަގުތެއްގައި ކޮންމެވެސް ވަރަކަށް "އޮއިލް ފިލްމް" ގެ އަސަރު ހުރި ނަމަވެސް، ފާހަގަކުރެވޭ ވަރަކަށް ތެޔޮ ލީކުވެފައި ނުވާކަމަށް ވިދާޅުވި އެވެ.
މިއަދު އީޕީއޭ އާއި އެމްއެންޑީފުގެ ކޯސްޓުގާޑު ގުޅިގެން ބޭއްވި ނޫސްވެރިންގެ ބައްދަލުވުން. -- ފޮޓޯ: އެމްއެންޑީއެފް
ޑީސަލް އަކީ ސާފު ނުކުރާ ތެލޭ ހިލާފަށް ފަސޭހައިން ފެނުން މައްޗަށް އެރުމާ އެކު ކުޑަ ވަގުތުކޮޅެއްގެ ތެރޭގައި ނެތިދާ އެއްޗެއް ކަމުން ލީކެއް ވިޔަސް މާ ބޮޑު ނުރައްކަލެއް ނެތް ކަމަށް ސަލީމް ވިދާޅުވި އެވެ.
ލިބިފައިވާ މައުލޫމާތަށް ބަލާއިރު މި ހާދިސާ ހިނގަން މެދުވެރިވީ ބޯޓުގައި ހިނގި އަލިފާނުގެ ހާދިސާއެއްގެ ސަބަބުންނެވެ.
މި އަލިފާން ރޯވި ސަބަބާ ގުޅޭގޮތުން ކުރި ސުވާލަކަށް ޖަވާބު ދެމުން ސަލީމް ވިދާޅުވީ، އެ ސުވާލުގެ ޖަވާބު ދޭން އަދި މާ އަވަސް ކަމަށާއި، ސަބަބު އިނގޭނީ ތަހުގީގު ނިމުމުން ކަމަށެވެ.
ހަރަދު ބޮޑުކަމުން ބޯޓު ނުނަގައި ދޫކޮށްލަނީ
މި ތެޔޮ ބޯޓު ދިޔަ ފުން މިނުގެ ސަބަބުން ބޯޓު އަޑިން ނެގުމުގެ މަސައްކަތް ނުކުރާނެ ކަމަށް ސަލީމް ވިދާޅުވި އެވެ.
އެހާ އަޑިން ބޯޓު ނެގުމުގެ ގާބިިލިއްޔަތުކަން ލިބިފައި ވަނީ މަދު ގައުމަކަށް ކަން ފާހަގަކުރައްވައި އޭނާ ވިދާޅުވީ، ސެލްވޭޖް އޮޕަރޭޝަނެއް އެހާ ކޮސްޓް އިފެކްޓިވް ނުވާނެ ކަމަށެވެ.
ނަމަވެސް، ރާއްޖޭގެ ތިމާވެއްޓަކީ ނާޒުކު ތިމާވެއްޓެއް ކަމުން އެމްއެންޑީއެފް އިން މި ސަރަހައްދުން އެއްވެސް ވަރަކަށް އެތެރެވަރިިޔަށް ތެޔޮ އާދޭތޯ ބަލަމުންދާނެ ކަމަށް ވިދާޅުވި އެވެ. އަދި މިއީ ގިނައިން ބޯޓު ދަތުރުކުރާ ސަރަހައްދެއް ކަމުން ތެލުގެ އަސަރު ފެންނަ ނަމަ އެ މައުލޫމާތު ލިބޭނެ ކަމަށް ވިދާޅުވި އެވެ.
