މިއަދު ބޭއްވި ލޯކަލް ކައުންސިލްތަކުގެ އިންތިހާބުގެ ވަގުތީ ނަތީޖާ އަންނަ ހޯމަ ދުވަހުގެ ނިޔަލަށް އިއުލާންކޮށް ނިމޭނެ ކަމަށް އިލެކްޝަންސް ކޮމިޝަން (އީސީ) އިން މިރޭ ބުނެފި އެވެ.
އީސީގެ އިސް އޮފިޝަލަކު "އަދަދު" އަށް ވިދާޅުވީ ދާއިރާތައް ވަކިން މިއަދު އިއުލާން ކުރަން ފެށޭނެ ކަމަށެވެ.
"އަޅުގަނޑުމެން މި ބަލަނީ ރޯދައިގެ ކުރިން ވަގުތީ ނަތީޖާ އިއުލާންކޮށް ނިމޭނެ ކަމަށް،" އޮފިޝަލް ވިދާޅުވި އެވެ.
އެހެން ލޯކަލް ކައުންސިލްތަކުގެ އިންތިހާބެކޭ އެއްގޮތަށް މިފަހަރުގެ އިންތިހާބުގައި ވެސް ވޯޓުލާން ނުކުންނަ މީހުންގެ އަދަދު މަދުވާނެ ކަމަށް ބެލެވުނު ނަމަވެސް ފަހުން ގިނަ އަދަދެއްގެ ބަޔަކު ނުކުމެ ވަނީ ވޯޓުލައިފަ އެވެ. އެގޮތުން ވޯޓު ލުމުގެ ހައްގު ލިބިގެންވާ މީހުންގެ ތެރެއިން 63.67 ޕަސެންޓް މީހުން ވަނީ ވޯޓުލައިފަ އެވެ. އެއީ 173،909 މީހުންނެވެ. ވޯޓު ނުލަނީ 99،219 މީހުންނެވެ.
މިފަހަރުގެ ވަގުތީ ނަތީޖާތައް ދައްކާގޮތުން އިދިކޮޅު ކޯލިޝަނުން އަންނަނީ ބޮޑު ކާމިޔާބީއެއް ހޯދަމުންނެވެ. އެންމެ ބޮޑު ދެ ސިޓީގެ ކައުންސިލްގެ ސުޕަ މެޖޯރިޓީ ގެއްލި، އެމްޑީޕީއަށް ބޮޑު ނާކާމިޔާބީއަކާ ވަނީ ކުރިމަތިލާން ޖެހިފަ އެވެ.
އެގޮތުން، މާލޭ ސިޓީގެ 18 ގޮނޑީގެ ތެރެއިން އެމްޑީޕީއަށް މިހާތަނަށް ޔަގީން ކުރެވިފައިވަނީ ހަތް ގޮނޑި އެވެ. އިދިކޮޅު، ޕީޕީއެމްއިން ވަނީ މިހާތަނަށް ނުވަ ގޮނޑި ކާމިޔާބުކޮށްފަ އެވެ.
އެންމެ ވާދަވެރި، އަދި ބާރުގަދަ މޭޔަރުގެ މަގާމަށް، އެމްޑީޕީގެ އެސްޖީކަން ކުރިން ކުރެއްވި އަނަސް އަބްދުއްސައްތާތު ބަލި ކުރައްވައި ވަޑައިގެންނެވީ ކުރީގެ ހައުސިން މިނިސްޓަރު ޑރ. މުހައްމަދު މުއިއްޒެވެ.
އައްޑޫ ސިޓީ ކައުންސިލަށް ބަލާއިރު، މޭޔަރުގެ މަގާމު އެމްޑީޕީގެ އަލީ ނިޒާރު ވަނީ ކާމިޔާބު ކުރައްވާފަ އެވެ. އެހެން ނަމަވެސް، ކައުންސިލްގެ 12 ގޮނޑީގެ ތެރެއިން އެމްޑީޕީއަށް ޔަގީން ކުރެވުނީ ހަ ގޮނޑި އެވެ. އިދިކޮޅު ޕީޕީއެމްއިން ތިން ގޮނޑި ހޯދިއިރު އަމިއްލަ ތިން ކެންޑިޑޭޓަކު ވެސް އިންތިހާބުވެފަ އެވެ.
