ކުޅުދުއްފުށީގައި އަލަށް އުފެދޭ، ސިޓީ ކައުންސިލްގެ މޭޔަރު ކަމުގެ މަގާމަށް އެމްޑީޕީގެ ކެންޑިޑޭޓް މުހައްމަދު އާތިފް އިންތިހާބުވެއްޖެ އެވެ.
އާތިފަކީ މީގެކުރިން ކަސްޓަމްސްގައި މަސައްކަތް ކުރައްވައި، ރަށުގެ އިޖުތިމާއީ ކަންކަމުގައި ހަރަކާތްތެރިވި ޒުވާނެކެވެ.
އޭނާއާ އެންމެ ގާތުން ވާދަކޮށްފައިވަނީ ޕީޕީއެމްގެ ކެންޑިޑޭޓް އަބްދުﷲ އިގުބާލެވެ. ދެން ވާދަ ކުރި އަމިއްލަ ދެ ކެންޑިޑޭޓުންނަށް މާބޮޑު ތަރުހީބެއް ނުލިބެ އެވެ.
އާތިފް، މީގެ ދުވަސްކޮޅެއް ކުރިން "އަދަދު"އަށް ދެއްވި އިންޓަވިއުއެއްގައި ވިދާޅުވި ގޮތުގައި، އޭނާގެ އެންމެ ބޮޑު ތަސައްވުރަކީ ރައްޔިތުންގެ ލަފާއާއެކު ސިޓީގެ ތަރައްގީގެ ޕްލޭނަކާއި ލޭންޑް ޔޫސް ޕްލޭނެއް ހެދުން ކަމެވެ. އެ ޕްލޭންގެ ދަށުން އޭނާ ވިދާޅުވާ ގޮތުގައި، ކައުންސިލް ލެވެލްގަ ހައުސިން ސްކީމެއް ވެސް ތައާރަފް ކުރައްވާނެ އެވެ.
"ލޭންޑް ޔޫސް ޕްލޭން ހެދިގެން ދާނީ ވިޔަފާރިތަކަށް ވެސް ހަމަހަމަ ފަހި ފުރުސަތެއް އޮންނާނެ ގޮތުގެ މަތިން ޕަބްލިކް އޭރިޔާތަކާ ގްރީން ޒޯންތައް ވެސް ކަނޑައެޅި ތަރުތީބު ވާނެ ގޮތަށް، ދިރިއުޅުމަށް ފަހި ހިތްގައިމު ފެހި ސިޓީއެއްގެ ގޮތުގައި، ރައްޔިތުންގެ ފުދުންތެރިކަން އިތުރު ކުރުމަށް ވެސް އިސްކަން ދޭނަން،" އާތިފް، ރަށަށް އޮތް އުއްމީދުތައް ހާމަ ކުރެއްވި އެވެ.
ޒުވާނުންގެ ބޮޑު ތާއިދެއް ހޯއްދެވި، އާތިފް ވިދާޅުވި ގޮތުގައި ރައްޔިތުންގެ ބައިވެރިވުން ހިމެނޭ ގޮތަށް ޒިންމާދާރުކަމާއެކު ދެފުށް ފެންނަ ސިޔާސަތެއްގެ ތެރެއިން ހިނގާނެ ޒަމާނީ ސިޓީ ކައުންސިލެއް އުފެއްދުމަކީ އަމާޒެވެ. ސްމާޓް ސިޓީ ކޮންސެޕްޓަށް ކައުންސިލް އޮޓޮމޭޓް ކުރެވިގެންދާނެ ކަމަށް ވިދާޅުވެ އެވެ.
ކުޅުދުއްފުއްޓަށް ވެސް ލިބިގެން މި ދަނީ މައި ސަރުކާރަށް ބަރޯސާނުވެ ރައްޔިތުންގެ ބޭނުންތައް ފުއްދައި މާލީ ބާރުވެރިކަން ހޯދުމުގެ ފުރުސަތުކަން ފާހަގަ ކުރައްވަމުން، އާތިފު ވިދާޅުވި ގޮތުގައި ސިޓީ ކައުންސިލަށް ކުރެވޭނެ ބައިވަރު ކަންކަން އެބަހުރި ކަމަށެވެ.
