މެދު ރާސްތާގައި ރާއްޖޭގެ އިގުތިސޯދު ރަނގަޅުވާން ފަށާފައިވީ ނަމަވެސް، ދަރަންޏަށް ސަމާލުވާން ޖެހޭ ކަމަށް ވާލްޑް ބޭންކުން ބުނެފި އެވެ.
ވާލްޑް ބޭންކުގެ މޯލްޑިވްސް ޑިވެލޮޕްމަންޓް އަފްޑޭޓް ރިޕޯޓުގައި ފާހަގަކޮށްފައިވާ ގޮތުގައި، ރާއްޖޭގެ އިގުތިސޯދީ ހާލަތު އޮތީ ކޮވިޑް-19ގެ ބަލިމަޑުކަމުގެ ހާލަތުގައި އައި ހީނަރު ކަމަށް ފަހު ރަނގަޅު ހާލަތަކަށް އައުމުގެ މަގުމަތީގައި ކަމަށެވެ.
އަދި، މި އަހަރު އިގުތިސޯދީ ދުވެލި ހުންނާނީ 17.1 ޕަސެންޓުގައި ކަމަށް ބުންޏެވެ.
މިއީ ރާއްޖެއިން ލަފާކޮށްފައިވާ އަދަދަށް މި އަހަރުގެ ތެރޭގައި އެއް މިލިއަން ފަތުރުވެރިން އައިސްފިނަމަ، އިގުތިސޯދަށް އަންނާނެ ކުރިއެރުމެއް ކަން ވާލްޑް ބޭންކުން ފާހަގަކުރި އެވެ. އަހަރުގެ މިހާތަނަށް ފަތުރުވެރިން ޒިޔާރަތްކުރި އަދަދަށް ބަލާއިރު، މި އަމާޒަށް ވާސިލުވެވޭނެ ކަމަށް އެ ބޭންކުން ވެސް ލަފާކުރެ އެވެ.
އެންމެ ފަހުގެ ތަފާސްތަކުން ދައްކާ ގޮތުގައި އިއްޔެއާ ހަމައަށް 350،000 އަށް ވުރެ ގިނަ ފަތުރުވެރިން ވަނީ ރާއްޖެ އައިސްފަ އެވެ.
ބަލިމަޑުކަމުގެ ހާލަތުގައި ރާއްޖެ ރައްކާތެރި މަންޒިލެއްގެ ހުޅުވާލަން ނިންމި ނިންމުމަށް ވާލްޑް ބޭންކުން ތައުރީފުކުރި އެވެ.
"ރައްކާތެރި ގޮތެއްގައި ފަތުރުވެރިކަން ހުޅުވާލުމަކީ ކުރެވިދާނެ ކަމެއް ކަމަށް ދިވެހި ސަރުކާރުން ވަނީ ދައްކައިދީފައި" ވާލްޑް ބޭންކުން ރާއްޖެއަށް ކަނޑައަޅާފައި ހުންނަ ކަންޓްރީ ޑިރެކްޓަރު، ފާރިސް ހަދާދު-ޒާވޯސް ވިދާޅުވި އެވެ.
މެދުރާސްތާގައި ރާއްޖޭގެ އިގުތިސޯދީ ހާލަތު ރަނގަޅު ނަމަވެސް، ރާއްޖޭގެ އުފުލިފައިވާ ދަރަންޏަށް ސަމާލުވުމަށް ވާލްޑް ބޭންކުން އިލްތިމާސްކުރި އެވެ. އަދި، ދަރަނީގެ ގޮންޖެހުންތައް ހައްލުކުރުމުގެ މުހިއްމުކަން ބޮޑުކަމަށް ބުންޏެވެ.
ވާލްޑް ބޭންކުގެ ރިޕޯޓަށް ބަލާއިރު، މިދިޔަ އަހަރު އެކަނިވެސް ރާއްޖޭގެ ފިސްކަލް ޑެފިސިޓް ގާތްގަނޑަކަށް 900 މިލިއަން ޑޮލަރު އިތުރުވި އެވެ. މިއީ އެ އަހަރަށް ލަފާކުރި ޖީޑީޕީގެ ނިސްބަތުން 20 ޕަސެންޓެވެ. މިއާ އެކު ރާއްޖޭގެ ޖުމްލަ އަދި ގެރެންޓީ ދީގެން ނަގާފައިވާ ދަރަނީ 5.6 ބިލިއަން ޑޮލަރަށް އަރާފަ އެވެ. މިއީ ޖީޑީޕީގެ ނިސްބަތުން 140 ޕަސެންޓެވެ.
މި މައްސަލަތައް ހައްލުކޮށްފި ނަމަ، ކުރިމަގުގައި ކުރިމަތިވެދާނެ ގޮންޖެހުންތަކާ ކުރިމަތިލުމުގައި ރާއްޖެ ތައްޔާރުވެފައި އޮންނަ މިންވަރު އިތުރުވެގެން ދާނެ -- ވާލްޑް ބޭންކް
ކޮވިޑު ބަލިމަޑުކަމުގެ ސަބަބުން ރާއްޖޭގެ އިގުތިސޯދަށް ކޮށްފައިވާ ނޭދެވޭ އަސަރުތަކުގެ ސަބަބުން ރާއްޖޭގެ ފަގީރުންގެ ނިސްބަތް ވަގުތީ ގޮތުން އިތުރުވެފައިވާ ކަމަށް ވާލްޑް ބޭންކުން ލަފާކުރެ އެވެ.
މިދިޔަ އަހަރު ރާއްޖޭގެ މައި އިގުތިސޯދީ ހަރަކާތް ކަމުގައިވާ ފަތުރުވެރިކަން ހުއްޓާލުމުގެ ސަބަބުން، ފަތުރުވެރިން އަންނަ އަދަދު 70 ޕަސެންޓް ދަށަށް ދިޔަ އެވެ. އަދި އޭގެ ސަބަބުން އިގުތިސޯދު 30 ޕަސެންޓް ދަށަށް ދިޔަ ކަމަށް ވާލްޑް ބޭންކުން ފާހަގަކުރި އެވެ.
