މިއަދު ކުރިއަށްދާ ލޯކަލް ކައުންސިލްތަކުގެ އިންތިހާބުގައި މިހާތަނަސް 40،000 ވުރެ ގިނަ މީހުން ވޯޓުލާފައިވާ ކަމަށް އިލެކްޝަންސް ކޮމިޝަނުން ބުނެފި އެވެ.
އެ ކޮމިޝަނުގެ ރައީސް އަހުމަދު ޝަރީފް ވިދާޅުވީ މިހާތަނަށް ވޯޓުލެވޭ މީހުންގެ ޖުމްލަ 17 ޕަސެންޓު ވޯޓުލި ނަމަވެސް މިއީ ވޯޓުލުމަށް ތަރުހީބު މަދު އިންތިހާބެއް ކަމަށެވެ.
"ކުރީ އިންތިހާބުތަކުގެ މި ގަޑިއަށް ބަލާއިރު ވޯޓުލާން ނިކުތް މީހުންގެ ނިސްބަތް މަދު،" މިހާރު ކުރިއަށްދާ އިންތިހާބަށް ލާފާ ދޭ ކޮމެޓީގެ ބައްދަލުވުމެއްގައި އޭނާ ވިދާޅުވި އެވެ.
އިސީގެ ނައިބު ރައީސް އިސްމާއިލް ހަބީބް އަބްދުއްރަހީމް ކުރިން ވިދާޅުވީ ހެނދުނު 9:00 އާ ހަމައަށް މުޅި ރާއްޖެއިން ވޯޓުލާފައި ވަނީ 19،040 ފިރިހެނުންނާއި 10،485 ފިރިހެނުން ކަމަށެވެ.
"ތަރުހީބު ކުޑަ ކަމަށް ފެންނަނީ. މާލެގައި ބައެއް ފޮށިތައް އެބަހުރި އެއްވެސް މީހަކު ކިއުގައި ނެތް ތަންތަން ވެސް،" ހަބީބް ވިދާޅުވި އެވެ.
މިހާތަނަށް އިލެކްޝަނުން ބެހެއްޓި 713 ވޯޓު ފޮށީގެ ތެރެއިން 709 ވޯޓު ފޮށީގެ ވޯޓުލުން ފެށިގެން ކުރިއަށްދާ ކަމަށް ވެސް ހަބީބް ވަނީ ވިދާޅުވި އެވެ.
މި އިންތިހާބުގައި 273،128 މީހަކަށް ވޯޓުލުމުގެ ހައްގު ލިބިގެންވެ އެވެ.
ކޮވިޑް-19 ގެ ބަލިމަޑުކަމުގެ ތެރޭގައި އިންތިހާބު ކުރިއަށް ގެންދާއިރު އިލެކްޝަނުން ވަނީ ސިއްހީ ރައްކާތެރި ކަމާއެކު ވޯޓުލުން ކުރިއަށް ގެންދާނެ ގޮތެއް ކަނޑައަޅައިފަ އެވެ.
އެގޮތުން ވޯޓުލާންދާ މީހުން ތިބެންޖެހެނީ ހަ ފޫޓު ދުރުގަ އެވެ. އަދި ވޯޓުލާ ސަރަހައްދަށް ވަނުމުގެ ކުރިން އަތް ދޮންނަން ޖެހެ އެވެ.
ކޮވިޑް-19 އަށް ޕޮޒިޓިވްވެގެން އަދި ޕޮޒިޓިވް މީހާ ދިމާވެގެން ނަމަވެސް އެކަހެރިކޮށްފައިވާ މީހުން ވޯޓުލުމަށް ހާއްސަކޮށްފައި ވަނީ ހަވީރު 5:00-6:00 ހަމައަށެވެ. އެފަދަ މީހުންނަށް ވޯޓު ލެވޭނީ އާންމު ގޮތެއްގައި ވޯޓުލާން ދާ މީހުން ވޯޓުލުމުންނެވެ.
އެޗްޕީއޭ އިން ބުނާ ގޮތުގައި މުޅި ރާއްޖެއިން 265 މީހުން އެކަހެރިކޮށްފައި އެބަ ތިއްބެވެ.
