މާފުށީ ޖަލުގައި ހުކުމް ތަންފީޒުކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން، މިއަދު ކުރިއަށްދާ ލޯކަލް ކައުންސިލް އިންތިހާބުގައި ވޯޓުލާން ރަޖިސްޓްރީވެވަޑައި ނުގަންނަވާކަން "އަދަދު" އަށް ކަށަވަރުވެއްޖެ އެވެ.
އިލެކްޝަންސް ކޮމިޝަނުން އާއްމުކޮށްފައިވާ މާފުށީ ޖަލަށް ވޯޓުލާ މީހުންގެ ލިސްޓުގައި އެމަނިކުފާނުގެ ނަންފުޅެއް ނެތެވެ. އެކަމަކު މައްޗަންގޮޅި މެދު-1 ފޮއްޓަށް ވޯޓުލުމުގެ ހައްގު ލިބިގެންވާ މީހުންގެ ތެރޭގައި ޔާމީންގެ ނަންފުޅު އެބައޮތެވެ.
ޖަލު ހުކުމުގައި ތިބޭ މީހުން ވޯޓުލާން މާލެ ގެނައުމަކީ ކަރެކްޝަންސުން ކުރާ ކަމެއް ނޫނެވެ. ކުރީގެ ރައީސަކަށްވާތީ ހާއްސަ އުސޫލެއްގެ ދަށުން ޔާމީނަށް އެ ފުރުސަތުދޭން ނިންމާފައި އޮތް ކަމެއް އަދި ޔަގީނެއް ނޫނެވެ.
އިންތިހާބަށް އެއް ދުވަހަށް ވެފައި ވަނިކޮށް ސަޕޯޓަރުންނަށް ދެއްވި އަސަރުގަދަ މެސެޖުގައި އެމަނިކުފާނާ ދޭތެރޭގައި ކަންކުރަމުންދަނީ އިންސާފުން ނޫން ކަމުގެ ކަންބޮޑުވުންފާޅުކުރައްވާފައިވެ އެވެ. ޖަލު ގޮޅީގައި "ފޮރުވާފައި ބޭއްވިޔަސް" ބޭއިންސާފުގެ މަތީގައި ކުޑަކަކޫ ނުޖައްސަވާނެ ކަަމަށާއި މައުސޫމް މީހެއްގެ ގޮތުގައި މިނިވަންވެ ރައްޔިތުންނާ ބައްދަލުކުރައްވާނެ ކަަމަށް ވިދާޅުވި އެވެ.
