މާފުށީ ޖަލު، ޔޫ-12،
ވެދުން ސަލާމަށްފަހު،
ލޮބުވެތި ދިވެހި ރައްޔިތުންނޭވެ! އަހަރުމެން ދެ މީހުންގެ ހާލުވެސް އިރާދަކުރެއްވިއްޔާ ރަނގަޅެވެ. އަހަރުމެން މިތިބީ ނުހަނު ސާބިތުކަމާއެކުގައެވެ. އަހަރުމެން އަޒުމަކަށް ކުޑަވެސް ބަދަލެއް ނާދެ އެވެ. އަދި ޒައްރެއްގެ މިންވަރަށްވެސް އަހަރުމެން ފަހަތަކަށް ނުޖެހޭނަމެވެ. އަހަރުމެންގެ ހައްގުގައި، ވަކިން ހާއްސަކޮށް ނޫސްވެރިކަމުގެ މިނިވަންކަމަށްޓަކައި އަޑުއުފުލައި ވަކާލާތުކުރާ ހުރިހާ ފަރާތްތަކަށް އިހުލާސްތެރި ޝުކުރު ދަންނަވަމެވެ. ތިޔަ ކުރައްވާ ހިތްވަރުގަދަ މަސައްކަތުގައި ސާބިތުވެ ތިއްބަވާށެވެ. އަހަރުމެންގެ ހިތްވަރަކަށް އެއްވެސް ބަދަލެއް ނާދެ އެވެ. އަދި ނުވެސް ގެނެވޭނެ އެވެ.
އެކުވެރި ނޫސްވެރިންނޭވެ! މިއަދު ނޫސްވެރިކަން ހަނިކޮށް، ނޫސްވެރިކަށް މަރާލުމަށްފަހު ވަޅުލުމަށް، މިއަދުގެ ސަރުކާރާއި ރައީސް މުއީޒް އެ ކުރެވެމުންދާ މަސައްކަތްތަކާ ދެކޮޅަށް އެންމެހާ ނޫސްވެރިން އެކަތިގަނޑަކަށްވެ ތެދުވާންޖެހެ އެވެ. އަހަރުމެން މިއަދު މި އުފުލަނީ ނޫސްވެރިކަމުގެ ހައްގުގައިވާ ގުރުބާނީއެކެވެ. މި ގުރުބާނީ ބޭކާރުވިޔަ ނުދެއްވާށެވެ.
އަހަރުމެންގެ ލޭ ހިނގާ "އަދަދު" ނޫހުގެ ހީވާގި ނޫސްވެރިންނާއި، ސީއީއޯ ފިޔާޒް އަދި މެނޭޖިން އެޑިޓަރު ހަސަންއަށް ސާބަސް ދަންނަވަމެވެ. އެންމެ އިންޗިއެއްވެސް ފަހަތަށް ނުޖެހި ސާބިތުވެ ތިއްބަވާށެވެ. މާފުށީ ޖަލުގައި ތިބި ގައިދީންވެސް ތިބީ ނޫސްވެރިންނާ އެކުގައިކަން އަޅުގަނޑުމެންނަށް އިހުސާސްކޮށްދެ އެވެ. އެ މީހުން އަޅުގަނޑުމެންނާ ދޭތެރޭ ދެކެނީ ކުށްވެރިންގެ ގޮތުގައެއް ނޫނެވެ. އެކަމަކު، މިއީ ގައުމަށްޓަކައި ވެވޭ ބޮޑު ގުރުބާނީއެއްގެ ގޮތުގަ އެވެ.
އަހަރުމެންގެ ލޯބިވާ މައިންބަފައިންނާއި، އަނބިދަރިންނޭވެ! ކެތްތެރިވާށެވެ. އަޅުގަނޑުމެން މިތަނުގައި މިތިބީ އެއްވެސް ކުށެއް ކޮށްގެންނެއް ނޫނެވެ. އަނިޔާވެރިކަމުގެ ކުރިމަތީގައި އަބަދުވެސް ކެތްތެރިކަން އިސްކުރަންވާނެ އެވެ. އަނިޔާވެރިންގެ ކުރިމަތީގައި އިސްޖަހައި، އެ މީހުން އުފާވާނެ ފަދަ އެއްވެސް މާޔޫސްކަމެއް ނުދައްކަވާށެވެ. ތިޔަ ލޮލުން އޮހޭ ކަރުނައަކީ އަނިޔާވެރިންނަށް ލިބޭނެ އުފަލަކަށް ވިޔަނުދެއްވާށެވެ.
ނޫސްވެރިކަމާ ދެކޮޅަށް މަސައްކަތްކުރާ ފަރާތްތަކަށް ބުނެލަން އޮތީ، ގަދަބާރުން ހުރުމަތާއި އިއްޒަތެއް ނުހޯދޭނެ ކަމެވެ. ދަންނާށެވެ! ކިތަންމެ ވަރުގަދައަށް ޗޭނުޖަހާ ބަންދުކޮށް ކުޑަގޮޅިއަކަށް ލިޔަސް، ސިންގާއެއް ވާނީ ހަމަ ސިންގާއަކަށެވެ. އަދި ރަންތާޖެއް އަޅުވައި ބޮޑު ތަހުތެއްގައި ބޭންދިޔަސް، ހިމާރެއް ވާނީ ހަމަ ހިމާރަކަށެވެ.
ލީވާން އަދި ޝަހުޒާން
އެޑިޓަރުގެ ނޯޓް: މިއީ މިވަގުތު ނޫސްވެރިކަން ކޮށްގެން ޖަލުގެ ތޭރިތަކު ތެރޭ ބަންދުކޮށްފައި ތިބި އަހަރުމެންގެ ނޫހުގެ ދެ ނޫސްވެރިން ކަމަށްވާ ލީވާން އަދި ޝަހުޒާންގެ ވަކީލު މެދުވެރިކޮށް ގެނެސްދީފައިވާ ލިޔުމެކެވެ.
