ގެވެށި އަނިޔާ ހުއްޓުވުމުގެ ގާނޫނަށް މީގެ ނުވަ އަހަރު ކުރިން ފެށިގެން އަމަލުކުރަމުން އައި ނަމަވެސް އެ ގާނޫނު އެންމެ ފުރިހަމައަށް ތަންފީޒުކޮށް އަނިޔާ ހުއްޓުވުމާއި ޝިކާރައަކަށްވާ މީހުންނަށް ރައްކާތެރިކަން ދޭން ބޮޑެތި ގޮންޖެހުންތަކެއް އެބަހުރި ކަމަށް ފެމިލީ ޕްރޮޓެކްޝަން އޮތޯރިޓީން ބުނެފި އެވެ.
ގެވެށި އަނިޔާ ހުއްޓުވުމުގެ ގާނޫނަށް އަމަލުކުރަން ފެށިތާ އިއްޔެއަށް ނުވަ އަހަރު ފުރުނީކަން ފާހަގަކޮށް އެ އޮތޯރިޓީން ނެރުނު ބަޔާނުގައި ރާއްޖޭގައި އަނިޔާގެ ހާލަތާއި އިންސާފަށް ހުރި ގޮންޖެހުންތައް ކިޔައިދީފައިވެ އެވެ.
އެ ގާނޫނު ހެދީ އަނިޔާ ހުއްޓުވައި އަނިޔާ ލިބޭ މީހުންނަށް ރައްކާތެރިކަންދީ އެހީތެރިވެދިނުމުގެ އުސޫލާއި މުއައްސަސާތަކުގެ ދައުރު ކަނޑައެޅުމަށާއި މުއައްސަސާތައް ގުޅިގެން މަސައްކަތް ކުރެވޭނެ ގޮތްތަކެއް ކަނޑައެޅުމަށެވެ.
އެ އޮތޯރިޓީން ބުނީ ގެވެށި އަނިޔާގެ ޝިކާރައަކަށްވާ މީހުންނަށް ފޯރުކޮށްދޭން ޖެހޭ އިޖުތިމާއީ އަދި ނަފްސާނީ ހިދުމަތް ދޭން ބޭނުންވާ ވަސީލަތްތައް މަދުކަމީ މިފަދަ ހިދުމަތްތައް އެކަށީގެންވާ ގޮތެއްގައި ފޯރުކޮށްދޭން ދިމާވެފައިވާ ގޮންޖެހުމެއް ކަމަށެވެ. ގެވެށި އަނިޔާކުރާ މީހުން އިސްލާހުކޮށް އަނބުރާ މުޖުތަމައަށް ގެންނަން ބޭނުންވާ ކައުންސިލިން ފަދަ ހިދުމަތްތައް ދޭން ފަންނީ މީހުން ރާއްޖޭގައި މަދުވުން ވެސް ހުރަހެއްގެ ގޮތުގައި ފާހަގަކޮށްފައިވެ އެވެ.
"ގާނޫނީ ގޮތުން މުއައްސަސާތަކަށް ލިބިދޭ ބާރުތަކުގައި ފުށުއެރުންތަކެއް ހުރުމަކީ ވެސް މި ގާނޫނު އެންމެ ފުރިހަމަ ގޮތުގައި ތަންފީޒުކުރުމަށް އޮތް ގޮންޖެހުމެކެވެ،" ބަޔާނުގައިވެ އެވެ.
އެކަމަކު ގާނޫނު އިސްލާހު ކުރުމުގެ މަސައްކަތް ފަށާފައިވާކަން ފާހަގަކުރަމުން އެ އޮތޯރިޓީން ބުނީ އެއީ މި ގޮންޖެހުންތައް ނައްތާލަން އެޅޭނެ މުހިއްމު ފިޔަވަޅެއް ކަމަށެވެ.
ރިޕޯޓްކުރުން އިތުރު: މިދިޔަ އަހަރު 615 މައްސަލަ
ފެމިލީ ޕްރޮޓެކްޝަން އޮތޯރިޓީގެ ތަފާސްހިސާބުތަކުން ދައްކާ ގޮތުގައި ގެވެށިއަނިޔާ ރިޕޯޓްކުރުން އަންނަނީ އިތުރުވަމުންނެވެ. ވޭތުވެދިޔަ އަހަރުގެ ތެރޭގައި އަނިޔާގެ އެކި ބާވަތުގެ ޖުމްލަ 615 މައްސަލަ ހުށަހަޅާފައިވެ އެވެ.
މީގެތެރޭގައި ނިސްބަތުން ގިނައީ އަންހެނުންނާއި ކުޑަކުދިންނަށް އަނިޔާކޮށްގެން ރިޕޯޓްކޮށްފައިވާ މައްސަލަތެކެވެ.
- މިދިޔަ އަހަރު 184 އަންހެން ކުދިންނާއި 432 އަންހެނުން އަނިޔާގެ ޝިކާރައަށް ވި ކަމަށް ރިޕޯޓްކުރި.
- 102 ފިރިހެން ކުދިންނާއި 91 ފިރިހެނުންނަށް އަނިޔާ ލިބުނު ކަމަށް ރިޕޯޓްކުރި.
- އެންމެ ގިނައިން ހުށަހެޅީ ބަހުގެ ހަމަލާ ދިނުމާއި ނަފްސާނީ ގޮތުން އަނިޔާކުރުމުގެ މައްސަލަތައް.
- ގެވެށީ އަނިޔާގެ މަންޒަރު ގަސްތުގައި ކުޑަކުއްޖަކަށް ދެއްކުން، އަޑުއިއްވުން ނުވަތަ އެފަދަ އަމަލެއް ފެންނާނެ ނުވަތަ އަޑުއިވޭނެ ހާލަތަަކަށް ކުއްޖަކު ގެންދިއުމުގެ 146 މައްސަލަ ހުށަހަޅާފައިވޭ.
އޮތޯރިޓީން ބުނިގޮތުގައި ގެވެށި އަނިޔާގެ ގާނޫނު ހުއްޓުވުމުގެ ބެލެނިވެރި މުއައްސަސާގެ ގޮތުގައި އެ އޮތޯރިޓީ އުފެދުނު ފަހުން އަނިޔާ ހުއްޓުވުގެ ގާނޫނު ތަންފީޒުކުރަން ގިނަ މަސައްކަތްތަކެއް މިހާތަނަށް ވަނީ ކޮށްފަ އެވެ. އޭގެތެރޭގައި އަނިޔާއާ ގުޅުން ހުރި ދިރާސާތާއް ކުރަން ހިތްވަރު ދިނުމާއި ގަވާއިދު އެކުލަވާލުމާއި ގަވާއިދުގައި ބުނާ ކޮމިޓީތަކުގެ މަސައްކަތް ފެށުން ހިމެނޭ ކަމަށް ބުންޏެވެ.
އެ އޮތޯރިޓީން ބުނީ ގާނޫނަށް އަހުލުވެރި ކުރުވުމާއި ގާނޫނު ތަންފީޒުވެފައިވާ މިންވަރު ބެލުމަށް ރިވިއުއެއް ވެސް ތައްޔާރުކުރި ކަަމަށެވެ. މީގެ އިތުރުން ގާނޫނަށް އަހުލުވެރިކުރުމަށް "ހޭލާ! ހޭލައްވާ!" ކެމްޕޭން ފެށުމަށް ވަނީ ނިންމައިފަ އެވެ.
އަނިޔާއަކީ އޭގެ ސަބަބުން އާއިލާތަކާއި މުޖުތަމައަށް އިޖުތިމާއީ ގޮތުންނާއި ސިއްހީ ގޮތުންނާއި އިގްތިސާދީ ގޮތުން ވެސް ބޮޑު ގެއްލުންތަކެއް ލިބޭނެ ކަމެއް ކަން ފާހަގަކޮށް މިފަދަ އަމަލުތައް ސިއްރުނުކޮށް އެންމެވެސް ރިޕޯޓްކުރަން އެ އޮތޯރިޓީން އިލްތިމާސްކޮށްފައިވެ އެވެ.
