ރާއްޖެއަށް އަންނަ ފަތުރުވެރިންނަށް އެއް އަހަރު ދުވަހަށް ހިލޭ ވިސާ ދޭން އުޅޭ ކަމަށް އަޑުފެތުރުމާއި ގުޅިގެން، ފާޅުކުރަމުންދާ ކަންބޮޑުވުންތައް ޓޫރިޒަމް މިނިސްޓަރު ޑރ. އަބްދުﷲ މައުސޫމް އޮޅުންފިލުވައި ދެއްވައިފި އެވެ.
މި މައްސަލާގައި ފަތުރުވެރިކަމުގެ ސިނާއަތުގައި ހަރަކާތްތެރިވާ މީހުންގެ ހިޔާލު ތަފާތުވުން ވަނީ އުފެދިފަ އެވެ. މިކަމަށް ތާއީދުކޮށް މަދު ފަރާތްތަކަކުން ވާހަކަ ދެއްކި ނަމަވެސް، ގިނަ ފަރާތްތަކުން މިފަދަ ބަދަލަކާ ދެކޮޅެވެ.
މި މައްސަލައާ ގުޅިގެން "އަދަދު" އިން ކުރި ސުވާލަކަށް ޖަވާބު ދެއްވަމުން ޑރ. މައުސޫމް ވިދާޅުވީ، ރާއްޖެ އަންނަ ކޮންމެ ފަތުރުވެރިއަކަށް އެއް އަހަރު ދުވަހުގެ ވިސާ ދިނުމުގެ ވިސްނުމެއް ނުގެންގުޅުއްވާ ކަމެށެވެ.
ނަމަވެސް، ރާއްޖޭގައި ދިގު މުއްދަތަކަށް ތިބެން ބޭނުންވާ ފަތުރުވެރިންނަށް ގާނޫނުގެ ތެރެއިން އެ ފުރުސަތު ހޯދައިދިނުމުގެ ވިސްނުން ގެންގުޅުއްވާ ކަމަށް ވިދާޅުވި އެވެ.
މުއްދަތު އިތުރުކުރާނީ ފީއެއް ނަގައިގެން، މަހުން މަހަށް އާކުރާ ގޮތަށް
މިހާރު ރާއްޖެއަށް އަންނަ ހުރިހާ ފަތުރުވެރިންނަށް 30 ދުވަހުގެ އޮން އެރައިވަލް ވިސާ ލިބެ އެވެ. އޮން އެރައިވަލް ވިސާ ތިން މަސް ދުވަހަށް ވިސާ ލިބެނީ އިންޑިއާ، ބަންގްލަދޭޝް އަދި ރަޝިއާއިން އަންނަ ފަތުރުވެރިންނަށެވެ.
އެކަށީގެންވާ ސަބަބަކާއި ހަރަދުކުރާނެ ފައިސާ ހުރިކަމުގެ ހެއްކާ އެކު އިިމިގްރޭޝަނަށް ހުށައަޅައިގެން ހުރިހާ ފަތުރުވެރިންނަށް 90 ދުވަހަށް މި މުއްދަތު އިތުރުކުރެވެ އެވެ.
މިހެން ގަވާއިދުތައް ހުރުމުގެ ސަބަބުން ރާއްޖޭގައި ދިގު މުއްދަތަށް ޗުއްޓީ ހޭދަކުރަން ބޭނުންވާ ފަރާތްތަކަށް އެ ފުރުސަތު ނުލިބެ އެވެ.
ޑރ. މައުސޫމް ވިދާޅުވީ ގޮތުގައި ކޮވިޑު ބަލިމަޑުކަމުގެ ތެރޭގައި ވިސާ މުއްދަތު އިތުރުކުރެވޭނެ ގޮތެއް އޮތްތޯ ބަލަން ބޭނުންވި ކަމަށެވެ. އެކަމަކު ގާނޫނުގެ ތެރެއިން އެކަން ކުރެވޭނެ ގޮތެއް ނެތުމުން، އެ ހުއްދަ ނުދެވުނު ކަމަށް ވިދާޅުވި އެވެ.
މިހާރު އުސޫލު އޮންނަ ގޮތުން، ރާއްޖެއަށް އަންނަ ފަތުރުވެރިން ޖެހެނީ 90 ދުވަސް ހަމަވުމުން ރާއްޖެއިން ބޭރުވުމަށް ފަހު އަނެއްކާ އަނބުރާ އަންނާށެވެ.
ޑރ. މައުސޫމް ވިދާޅުވީ، ވިސާ މުއްދަތު އިތުރުކުރުމުގެ މަސައްކަތް ފެށީ މި މައްސަލަ ހައްލުކުރަން ކަމަށެވެ. އެއްވެސް ގޮތަކަށް ރާއްޖެއަށް އަންނަ ހުރިހާ ފަރާތަކަށް ވިސާ ދިނުމަކަށް ނޫން ކަމަށެވެ. އަދި، ބޭނުމަކީ މިހާރު ލިބޭ 90 ދުވަސް ހަމަވުމުން ރާއްޖޭގައި ޗުއްޓީ ހޭދަކުރަން ބޭނުންވާ ނަމަ، އެ މަގު ފަހިކޮށް ދިނުން ކަމަށް ވިދާޅުވި އެވެ.
ހިލޭ ވިސާ ދިނުމާ ގުޅޭގޮތުން ދެކެވޭ ވާހަކަތަކާ ގުޅިގެން ޑރ. މައުސޫމް ވިދާޅުވީ، ވިސާ މުއްދަތު އިތުރުކުރާނީ ފީއެއް ނަގައިގެން ކަމަށެވެ.
އަދި އުސޫލު އެކުލަވާލުމުގެ މަސައްކަތް ކުރާނީ 90 ދުވަސް ހަމަވުމުން ކޮންމެ މަހަކު އެއް ފަހަރު ވިސާ އާ ކުރާ ގޮތަށް ކަމަށެވެ. ފީ ކަނޑައަޅާނީ ބަލަންޖެހޭ ކަންކަން ބެލުމަށް ފަހު ކަމަށް ޑރ. މައުސޫމް ވިދާޅުވި އެވެ.
