ހުޅުމާލެ ދެ ވަނަ ފިޔަވަހީގައި އަޅާފައިވާ ހިޔާ ފްލެޓްތައް 7500ރ. އަށް ދޫކުރުމަށް ނިންމާފައިވާތީ އެއަގު ބޮޑު ކަމަށް ވިދާޅުވެ ކުރީގެ ހައުސިން މިނިސްޓަރު އަދި މާލޭ މޭޔަރަކަށް ވާދަ ކުރައްވާ ޑރ. މުހައްމަދު މުއިއްޒު އެކަން ކުށްވެރި ކުރައްވައިފި އެވެ.
މުއިއްޒުގެ ހައުސިން މިނިސްޓަރު ކަމުގައި ކުރީގެ ސަރުކާރުން އިމާރާތްކުރި ފްލެޓްތަކުގެ މަހު ކުލީގެ ގޮތުގައި ހަމަޖެއްސީ 5،600ރ. ކަމަށް ތަކުރާރުކޮށް އޭނާ ގެންދަވަނީ ވިދާޅުވަމުންނެވެ. ފްލެޓްތަކުގެ އަގާ ގުޅޭ ގޮތުން މުއިއްޒު އަނެއްކާވެސް ހިތްހަމަނުޖެހުން މި ފާޅުކުރެއްވީ ހައުސިން މިނިސްޓަރު މުހައްމަދު އަސްލަމް އިއްޔެ ދެއްކެވި ވާހަކަތަކާ ގުޅިގެންނެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި ހައުސިން މިނިސްޓަރު މުހައްމަދު އަސްލަމް ވިދާޅުވީ، 25 ބުރިއަށް ނަގާފައިވާ 16 ޓަވަރުގައި ހަދާފައިވާ 6,720 ފްލެޓްތަކުގެ ހަގީގަތުގައި އެންމެ ކުޑަކޮށް ކުއްޔަށް ދެވޭނީ 11،000ރ. އަށް ކަމަށެވެ.
ނަމަވެސް އެއީ ސޯޝަލް ހައުސިން ސްކީމަކަށް ބޮޑު އަގަކަށް ވާތީވެ، މުށި ނުޖައި، ދޮރު ހަރުނުކޮށް އަދި ފަންކަލާއި ދޮރު ނުލައި ހުރި އެ ފްލެޓުތައް އެގޮތަށް ބަހައްޓައިގެން 7500ރ. އަށް ކުއްޔަން ދޭން ނިންމާފައިވާ ކަމަށް އަސްލަމް ވިދާޅުވި އެވެ.
އެއަށް ރައްދު ދެއްވައި މިއަދު މުއިއްޒު ވިދާޅުވީ ފްލެޓުތަކުގެ އަގަކީ 7500ރ. ކަމަށް ކަނޑައެޅުމަކީ "ރައްޔިތުންނަށް ދެވުނު އިތުރު ހިތްދަތި ކަމެއް" ކަމަށެވެ.
"ދޮރާއި ޓައިލްސާ އެއްކޮށް ނިންމައި 5600ރ. އަށް [ފްލެޓުތައް] ދެވޭނެ. އަދި 25 އަހަރަށް ބަހާލާ ނަމަ 3800ރ. އަށް ދެވޭނެ،" މުއިއްޒު އޭނާ ކުރެއްވި ޓުވީޓެއްގައި ލިޔުއްވާފައިވެ އެވެ.
ހިޔާ ފްލެޓުތައް އަގުހެޔޮޮކޮށް ދެވޭނެ ކަމަށް އިދިކޮޅުން އަޑުއުފުލަމުންދާއިރު މި ސަރުކާރުން އަބަދުވެސް ބުނެފައި ވަނީ ފްލެޓަކަށް 62،000 ޑޮލަރުގެ މަގުން، 434 މިލިއަން ޑޮލަރު ހަރަދުކޮށްގެން ހަދާފައިވާ އެ ފްލެޓްތަކަށް ސޯޝަލް ހައުސިން ސްކީމަކަށް އެކަށީގެންނުވާ ކަމަށެވެ.
ހިޔާ މަޝްރޫއުގައި 16 ޓަވަރު ހަދާފައިވާއިރު، ކޮންމެ ފްލޯއެއްގައި، 20 ފްލެޓް ހުރެ އެވެ. އަދި ކޮންމެ ފްލެޓެއްގައި މަދުވެގެން ފަސް މީހުން ދިރިއުޅޭނެ ކަމަށް ހައުސިން ޑެވެލޮޕްމަންޓް ކޯޕަރޭޝަނުން ލަފާކުރެ އެވެ. އެހެންކަމުން އެއީ ފްލޯއެއްގައި 100 މީހުންނެވެ.
އެ އަދަދުން ބަލާ ނަމަ ކޮންމެ ޓަވަރެއްގައި، ގާތްގަނޑަކަށް 2،400 މީހުން ދިރިއުޅުން އެކަށީގެންވެ އެވެ. މުޅި 16 ޓަވަރަށް ބަލާ ނަމަ އެ އަދަދު 40،000 އާ ކައިރިކުރާނެ އެވެ.
