އިންފޮމޭޝަންސުޕްރީމް ކޮމިޝަނަރުގެ ނިންމުންތައް ހައިކޯޓުގައި އިސްތިއުނާފު ނުކުރެވޭނެ ކަމަށް އެ ކޯޓުން ނިންމި ނިންމުމާމެދު ހިތްހަމަނުޖެހި، ބަންޑާރަ ނައިބުގެ ފަރާތުން ސުޕްރީމް ކޯޓުގައި މައްސަލަ އިސްތިއުނާފުކޮށްފި އެވެ.
އިންފޮމޭޝަން ކޮމިޝަނަރުގެ ނިންމުންތައް ބެލުމުގެ އިހްތިސޯސް ހައިކޯޓުގައި ނެތް ކަމަށް ބުނެ އެ ކޯޓުން ހުކުމް ކުރީ އެމްޑަބްލިއުއެސްސީއިން އިސްތިއުނާފު ކުރި މައްސަލައެއްގަ އެވެ. އެއީ، އިންފޮމޭޝަން ކޮމިޝަނަރު، އެ ކުންފުނިން އަމިއްލަ މީހަކަށް މައުލޫމާތެއް ހާމަކުރުމަށް އެންގި ނިންމުމަކާމެދު ހިތްހަމަނުޖެހިގެން ހުށަހެޅި މައްސަލައެކެވެ.
ހައިކޯޓުގެ ހުކުމްގައި ފާހަގަކޮށްފައި އޮތް ގޮތުން، ކޯޓުތަކުގެ ގާނޫނުން ހައިކޯޓަށް ލިބިދީފައިވާ އިސްތިއުނާދީ އިހްތިސޯސްއަށް ބަލާއިރު އެ އިހްތިސޯސް ލިބިދީފައިވަނީ ދަށު ކޯޓުތަކުންނާއި ޓްރައިބިއުނަލުން ނިންމާ ނިންމުންތަކުގެ މައްޗަށެވެ. އިންފޮމޭޝަން ކޮމިޝަނަރަކީ ދަށު ކޯޓެއް އަދި ޓްރިބިއުނަލެއް ވެސް ނޫންކަން ހުކުމްގައި ފާހަގަކުރި އެވެ.
ހައިކޯޓުން އިއްވި ހުކުމްގައި ބުނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ މަގުސަދަކީ އިސްތިއުފާނު ކުރުމުގެ ފުރުސަތު ހޯދައިދިނުން ނޫން ކަމަށާއި އެއާ ހިލާފަށް މަގުސަދަކީ މައުލޫމާތު ހޯދައި ލިބިގަތުމުގެ ހައްގު ކޮންމެ މީހަކަށްމެ ގާނޫނުގައި ކަނޑައަޅާ ގޮތެއްގެ މަތިން ލިބިދިނުން ކަމަށެވެ.
މި ހުކުމްގައި މިގޮތަށް ކަނޑައެޅުމުން، އިންފޮމޭޝަން ކޮމިޝަނަރުގެ ނިންމުންތަކާމެދު ހިތްހަމަނުޖެހުނު ކަމުގައިވީ ނަމަވެސް އެ މައްސަލައެއް އިސްތިއުނާފު ކުރުމުގެ ފުރުސަތެއް ނުލިބޭނެ އެވެ. ނަމަވެސް މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 64 ވަނަ މާއްދާގެ "ހ" ގައި ބުނެފައިވަނީ އިންފޮމޭޝަން ކޮމިޝަނަރު ނިންމާ ނިންމުމަކާމެދު ހިތްހަމަނުޖެހޭނަމަ އެ ނިންމުމަކާ ގުޅޭ ގޮތުން ހިތްހަމަނުޖެހޭ ފަރާތަކަށް އެ މައްސަލައެއް އިސްތިއުނާފު ކުރުމުގެ ފުރުސަތު ލިބޭ ކަމަށެވެ.
އިސްތިއުނާފު އޮތީ ހަ ނުކުތާއެއް މައްޗަށް
ބަންޑާރަ ނައިބުގެ ފަރާތުން ސުޕްރީމް ކޯޓަށް ހުށަހެޅި އިސްތިއުނާފީ މައްސަލާގައި މައިގަނޑު ގޮތެއްގައި ފާހަގަކޮށްފައިވަނީ ހަ ނުކުތާ އެވެ.
އެގޮތުން، ފުރަތަމަ ނުކުތާއަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގައިވާ ގޮތުން އިންފޮމޭޝަން ކޮމިޝަނަރުގެ ނިންމުމަކާމެދު ހިތްހަމަނުޖެހޭނަމަ އިސްތިއުނާފީ ކޯޓެއްގައި އެ ނިންމުން ތައުނުކުރުމުގެ ފުރުސަތު ލިބޭ ކަމެވެ.
ދެވަނަ ނުކުތާއަކީ، އިންފޮމޭޝަން ކޮމިޝަނަރުގެ ނިންމުމަކާމެދު ހިތްހަމަނުޖެހޭނަމަ، އެކަން ބެލުމުގެ އިހްތިސޯސް ލިބިފައިވަނީ ހައި ކޯޓަށްކަން ގާނޫނުގައި ބުނެފައިވާ ކަމާއި ހައި ކޯޓުން އެ މާއްދާ މާނަ ކޮށްފައިވަނީ އެ ފުރުސަތު ބަންދުވާ ގޮތަށް ކަމަށެވެ.
ހައިކޯޓުން "އިންފޮމޭޝަން ކޮމިޝަނަރު" މާނަ ކުރައްވާފައިވަނީ، މައުލޫމާތު ހޯދައި ލިބިގަތުމުގެ ހައްގުގެ ގާނޫނުން ހާސިލުކުރަން ބޭނުންވާ މަގުސަދުު ހާސިލުނުވާ ގޮތަށް ކަމަށް ތިންވަނަ ނުކުތާގައިވެ އެވެ. ހަތަރުވަނަ ނުކުތާގައި ބުނީ، ގާނޫނު އަސާސީން ކަށަވަރު ކޮށްދީފައިވާ އިސްތިއުނާފުކުރުމުގެ ހައްގު ގެއްލޭ ގޮތަށް ހައިކޯޓުން މައްސަލަ ނިންމަވާފައިވުމެވެ.
ކޯޓުތަކުގެ ގާނޫނުގައިވާ ގޮތުން، ގާނޫނަކުން މައްސަލަ ބެލުމުގެ އިހްތިސޯސް ހައިކޯޓަށް ދޭނަމަ، ހައިކޯޓަށް މައްސަލަ ބެލޭނެ ކަމަށް ފަސްވަނަ ނުކުތާގައި ފާހަގަކޮށްފައިވެ އެވެ. ފަހު ނުކުތާއެއްގެ ގޮތުގައި ފާހަގަކުރީ، އިންފޮމޭޝަން ކޮމިޝަނަރުގެ ނިންމުމެއް ހައިކޯޓަށް ބެލިދާނެކަމާމެދު އޮޅުމެއް ނެތް ކަމެވެ.
