"މިހާރު" ނޫހުގެ އެޑިޓަރު އަދި ތަޖުރިބާކާރު ނޫސްވެރިޔާ މޫސާ ލަތީފް މިއަދު އެ ނޫހުން އިސްތިއުފާ ދެއްވައިފި އެވެ.
މޫސަ ވަނީ މިއަދު އެކަން "އަދަދު" ނޫހަށް ކަށަވަރުކޮށްދެއްވައިފަ އެވެ. އަދި އިސްތިއުފާ ދެއްވިކަން އެތަނުގެ މުވައްޒަފުންނާ ވެސް ވަނީ މިއަދު ހިއްސާކުރައްވައިފަ އެވެ.
މޫސަ އިސްތިއުފާ ދެއްވި ސަބަބެއް ކަށަވަރެއް ނޫނެވެ. އެކަމަކު އެނގިފައިވާ ގޮތުގައި މޫސަ ނޫސްވެރިކަމާ ދުރަށް ވަޑައިނުގަންނަވާނެ އެވެ.
"މިހާރު" ނޫސް 2016 ވަނަ އަހަރުގެ މޭ މަހު ވުޖޫދުވި ހިސާބުން މޫސަ އައީ އެޑިޓަރުކަމުގެ ޒިންމާ ނަންގަވަމުންނެވެ. އޭގެ ކުރިން 2010 އިން ފެށިގެން 2016 ގައި "ހަވީރު" ނޫސް ހުއްޓާލަން ޖެހުމާ ހަމަޔަށް އެ ނޫހުގެ އެޑިޓަރުކަން މޫސަ ކުރެއްވި އެވެ.
"ހަވީރު" ގެ ޕާޓްޓައިމް ލިޔުންތެރިއެއްގެ ގޮތުގައި 1989 ވަނަ އަހަރު އެ ނޫހާ ގުޅިވަޑައިގެންނެވި މޫސަ ފުލްޓައިމް ނޫސްވެރިއެއްގެ ގޮތުގައި ކެރިއަރު ފެއްޓެވީ 1990 ގަ އެވެ. އޭނާ ފާހަގަވީ "ހަވީރު" ގެ ކުޅިވަރު ރިޕޯޓަރުގެ ގޮތުގަ އެވެ. އެކަމަކު އޭނާގެ ގަލަން ތަފާތު އެހެން ދާއިރާތަކުގައި ވެސް ހިނގި އެވެ. އަދި "ހަވީރު" އިން ނެރުނު "ހުވާސް" މަޖައްލާގެ ޑެޕިއުޓީ އެޑިޓަރުކަން ވެސް ކުރެއްވި އެވެ. "ހުވާސް" އިން ގެނެސްދިން ތަފާތު މޮޅު ކަވަރޭޖްތަކާއި ފީޗާ ސްޓޯރީސްތަކުގައި މޫސަ ބޮޑު ހިއްސާއެއްވި އެވެ.
މޫސަ އަށް ދިވެހި ސަރުކާރުން ވަނީ ނޫސްވެރިކަމުގެ ރަންޔޫބީލް އަހަރު، 1993 ގައި "ރިހި ގަލަން" ދީފަ އެވެ. އަދި މީޑިއާ ކައުންސިލުން ވަނީ އަލިމަސް ޔޫބީލް އަހަރު، 2018 ގައި "އަލިމަސް ގަލަން" ދީފަ އެވެ. މީގެ އިތުރުން ހަބަރާއި މައުލޫމާތު ފެތުރުމުގެ ދާއިރާއިން ނޫސްވެރިކަމުގެ ރޮނގުން 2001 ވަނަ އަހަރު ސަރުކާރުން ވަނީ އާއްމު ހިދުމަތުގެ އިނާމް ދީފަ އެވެ.
މޫސަ އަކީ ނޫސްވެރިއެއްގެ އިތުރުން ރާއްޖޭގައި އުފެދުނު އާދަޔާހިލާފު މޮޅު ލިޔުންތެރިއެއް ވެސް މެ އެވެ. އެގޮތުން "އަނދިރި ފަރާތް"، "އަނިޔާ" އަދި "އެކަނި" ނަމުގައި ގިނަ ބަޔެއްގެ މަގުބޫލުކަން ހޯދި ދިގު ވާހަކަތަކެއް ލިޔުއްވި އެވެ. މޫސަގެ ބައެއް ވާހަކަތަކަށް ފިލްމް ވެސް ހަދާފައިވެ އެވެ. އަދި 2012 ވަނަ އަހަރުގެ ފެބްރުއަރީ 7 ގައި ހިނގި ސިޔާސީ ހާދިސާ އަށް "ހަތެއް ފެބްރުއަރީ" ގެ ނަމުގައި ފޮތެއް ލިޔުއްވި އެވެ.
