މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)ގެ މާކެޓިން ކޮންސަލްޓަންޓަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަނބިކަނބަލުން ފަޒްނާ އަހުމަދުގެ ކޮއްކޯފުޅު ނަޒީހާ އަހުމަދު ހަމަޖައްސައިފި އެވެ.
ނަޒީހާއަކީ ޕޮލިސް ކޮމިޝަނަރު މުހައްމަދު ހަމީދު (އެމްސީ ހަމީދު) ގެ އަނބިކަނބަލުންނެވެ.
މާކެޓިން ކޮންސަލްޓަންޓެއްގެ ގޮތުގައި އެ ކުންފުނީގައި ނަޒީހާ މަސައްކަތް ކުރައްވަމުން ގެންދަވާ ކަން މިފްކޯގެ ޖެނެރަލް މެނޭޖަރު ހުސެއިން ޝުއާޒް ވަނީ ޔަގީންކޮށްދެއްވައިފަ އެވެ.
"މިތަނުގައި އަޅުގަނޑުމެންނާ އެކު މަސައްކަތް ކުރާނެ ވަރަށް ގިނަ ކޮންސަލްޓަންޓުން. އެއީ އިންޓަނޭޝަނަލް ބައިވަރު މަސައްކަތް ވެސް ކުރަންޖެހޭތީ،" ޝުއާޒް ވިދާޅުވި އެވެ.
ނަމަވެސް ނަޒީހާގެ ވަޒީފާއާ ގުޅޭ އިތުރު މައުލޫމާތެއް އޭނާ ނުދެއްވަ އެވެ. އެ މަގާމަށް ނަޒީހާ ހަމަޖައްސާފައި ވަނީ އިއުލާނުކޮށްގެންތޯ ނުވަތަ ނޫންތޯ ވެސް ޝުއާޒް ވިދާޅެއްނުވި އެވެ.
ދިވެހި ސަރުކާރުގެ ގެޒެޓުގައި މިފްކޯ އިން މިދިޔަ ހަ މަސް ދުވަހުގެ ތެރޭގައި ކޮށްފައިވާ އިއުލާނުތަކަށް ބަލާއިރު މާކެޓިން ކޮންސަލްޓަންޓެއް ހޯދުމަށް އިއުލާން ކޮށްފައެއް ނުވެ އެވެ. އެކަމަކު މާކެޓިން މެނޭޖަރެއް ހޯދުމަށް މިދިޔަ ޑިސެމްބަރު 28، ގައި އިއުލާނެއް ކޮށްފައިވެ އެވެ.
އެކަމާ ގުޅޭ ގޮތުން ނަޒީހާއަށް ގުޅުމުން ކޮމެންޓެއް ދެއްވަން ވަނީ ދެކޮޅު ހައްދަވައިފަ އެވެ.
ނަޒީހާގެ ލިންކްޑް-އިން ޕްރޮފައިލްގައި އޭނާ ލިޔުއްވާފައި ވަނީ މިފްކޯގެ ވަޒީފާއަށް ނިކުންނެވީ މިދިޔަ ފެބްރުއަރީ މަހު ކަމަށެވެ. މީގެ ކުރިން މާކެޓިން ދާއިރާގެ ބައެއް މަސައްކަތްތައް ކުރައްވާފައިވާ ކަމަށް ވެސް ލިޔުއްވާފައިވެ އެވެ.
އެގޮތުން މޯލްޑިވްސް ސްޓޮކް އެކްސްޗޭންޖުގެ ބޯޑު މެންބަރެއްގެ ގޮތުގައި އަށް އަހަރު ނަޒީހާ އުޅުއްވިއިރު މާކެޓް ޑެވެލޮޕްމަންޓަށް ސްޓްރެޓެޖިކް ޕްލޭނިންގެ މަސައްކަތްތަކެއް ކުރައްވާފައިވާ ކަމަށްވެ އެވެ. އަދި އޭނާގެ އާއިލީ ކުންފުންޏެއް ކަމަށްވާ ސޯލްޓް ކެފޭ އެންޑް ރެސްޓޯރަންޓްގެ މާކެޓިންގެ މަސައްކަތްތަކެއް ދެ އަހަރަށް ވުރެ ގިނަ ދުވަހު ކުރައްވާފައިވެ އެވެ.
ނަޒީހާއަކީ މާކެޓިން އެންޑް ކޮމިނިއުކޭޝަންސްގެ ރޮނގުން އިނގިރޭސިވިލާތުގެ ލަންޑަނުން ޑިގްރީއެއް ހާސިލް ކުރައްވާފައިވާ ބޭފުޅެކެވެ.
