ޒިކްރާ މިސްކިތް ހުރި ބިމުގައި ރޯދަޔަށް ވަގުތީ މިސްކިތެއް ހަދަން އުޅުމުގެ ތެރެއިން އެ ބިމުން މިނިކަށި ފެނިފައިވާ ކަމަށާއި ނަމަވެސް އެތަނުގައި މިސްކިތް އަޅާނެ ކަމަށް އިސްލާމިކް މިނިސްޓްރީން މިއަދު ބުނެފި އެވެ.
ސިފައިންގެ ވިޔަފާރި ކޯޕަރޭޓިވް "ސިފްކޯ" އާ ހަވާލުކޮށްގެން މިސްކިތް ހަދަން ކޮނުމުގެ ތެރެއިން އިއްޔެ ވަނީ އެ ބިމުން އިންސާނެއްގެ ބޮލުގެ ކަށިގަނޑާއި ހަށިގަނޑުގެ ކަށިތަކެއް ފެނިފަ އެވެ.
އިސްލާމިކް މިނިސްޓްރީގެ މީޑިއާ އޮފިޝަލް، އިސްމާއިލް އަފްރާހް، "އަދަދު" އަށް ވިދާޅުވީ އެގޮތަށް މިނިކަށި ފެނުމުން އަމަލު ކުރާނެ އުސޫލެއް އޮންނަ ކަމަށެވެ. އެގޮތުން އެކަށިތައް ނަގައި ސަހަރާއެއްގައި ވަޅުލުމަށް ފަހު އެ ބިމުގައި މިސްކިތް އަޅާނެ ކަމަށް އޭނާ ވިދާޅުވި އެވެ.
އެއީ ގަބުރުސްތާނެއް ނޫން. އެހެންވީމައި އެތަނުގައި މިސްކިތް އަޅާނެ. މިސްކިތް އެޅުމުގެ ކުރިން އަދިވެސް އިތުރު ކަށި ހުރިތޯ ބަލާނެ،: އަފްރާހް
ޓިނުން ހަދާ އެ މިސްކިތުގެ މަސައްކަތް ރޯދައިގެ ކުރިން ނިންމާލެވޭތޯ މަސައްކަތް ކުރަމުން އަންނަ ކަމަށް ވެސް އަފްރާހް ވިދާޅުވި އެވެ.
ޒިކްރާ މިސްކިތް ރައީސް އަބްދުﷲ ޔާމީންގެ ސަރުކާރުގައި ތަޅާލީ މިސްކިތަކާއެކު 10 ބުރީގެ އިމާރާތެއް އެޅުމަށެވެ. އެ މަސައްކަތް އެސްޖޭ ކޮންސްޓްރަކްޝަނަށް 130 މިލިއަން ރުފިޔާއަށް ހަވާލު ކުރިނަމަވެސް މަސައްކަތެއް ކޮށްފައިނުވާތީ އެ އެއްބަސްވުން ފަހުން ވަނީ އުވާލައިފަ އެވެ.
