މާތް ﷲ ގެ ވާގިފުޅާއެކު، ދިވެހިރާއްޖޭގެ ނޫސްވެރިކަމުގެ ޖައްވަށް އަނެއްކާ ވެސް އާ ނޫހެއް "އަދަދު" ގެ ނަމުގައި އުފަންވީ އެވެ. މި ނޫހަކީ މި ވަގުތު ރާއްޖޭގައިވާ އެންމެ ހަގު ނޫހެވެ. އެހެނަސް އެޑިޓަރުންނާއި ނޫސްވެރިންނާއި ލިޔުންތެރިންގެ ޓީމަކީ ވަރަށް ތަޖުރިބާކާރު ޓީމެކެވެ. އެހެންކަމުން، ޒިންމާދާރުކަމާ އެކު މި ނޫސް މަސައްކަތްކުރާނީ، ދިވެހި ނޫސްވެރިކަމުގެ އާއިލާގެ ދޮށީ މެންބަރެއްގެ ގޮތުގަ އެވެ.
ޒަމާނީ ޑިމޮކްރަސީއެއްގައި ނޫސްވެރިކަމަކީ، ވަރަށް މުހިންމު ބިލާދަރެކެވެ. ރައްޔިތުންގެ ހައްގުތައް ހޯދުމުގައެވެ. އެކަމަށްޓަކައި ސަރުކާރުގެ އިސް ފަރާތްތަކަށް ރައްޔިތުންގެ އަޑު އިއްވުމުގައެވެ. އަދި ރައްޔިތުންގެ ހައްގުގައި ވަކާލާތުކޮށް، ސަރުކާރު ޖަވާބުދާރީ ކުރުވުމުގައެވެ. މި ކަންކަމާ އެކު މި ނޫސް އަދާކުރާނެ އެންމެ ބޮޑު އެއް ޒިންމާއަކީ، ޅަފަތުގައި އޮތް މިރާއްޖޭގެ ޑިމޮކްރަސީ ކުރިއެރުވުމެވެ. ރާއްޖޭގެ ސިޔާސީ ތާރީހަށް ބަލާއިރު، މިނިވަން ނޫސްވެރިކަމެއް ނެތުމުގެ އުނިކަން އޮތް ދުވަސްތަކެއްގެ ހިތިކަން ދިވެހިން ވަނީ ބަރުދާސްތުކޮށްފަ އެވެ. އެ ދުވަސްތައް މާޒީވެ، މިނިވަން ނޫސްވެރިކަމުގެ ޒަމާނަކަށް މި އަދު މިވަނީ ވާސިލުވެވިފަ އެވެ. "އަދަދު" ވުޖޫދަށް މިއައީ، ކުޅަދުންވަންތަ ރައްބުގެ އިރާދަފުޅާ އެކު، މިއަދު ފަހިވެފައިވާ ތަނަވަސް މިނިވަން ފުރުސަތުގެ ބޭނުން އޭގެ އެންމެ ފުޅާމިނުގައި ހިފުމަށެވެ.
އެހެން ނޫސްތަކެކޭ ވެސް އެއްފަދައިން، ރައްޔިތުންނަށް ހަބަރާއި މައުލޫމާތު ފޯރުކޮށްދިނުމަކީ މި ނޫހުން ކުރާނެ އަސާސީ މަސައްކަތެކެވެ. އެހެނަސް، ހަމައެކަނި ހިނގަމުންދާ ހާދިސާތަކުގެ ތަސްވީރުތައް ކުރަހައިދިނުމަށްވުރެ، މި ނޫހުގެ އިންތަކާއި މިންތައް ފުޅާވާނެއެވެ. މި ނޫހުން އަމާޒު ހިފާފައިވަނީ، ކަންކަމާމެދު ނޫސްވެރިކަމުގެ ނަޒަރުން ފާރަވެރިވެ، ފޮލޯއަޕް ހަދައި، ދިރާސާކޮށްގެންނާއި ތަހުގީގުކޮށްގެން، ހަގީގަތް ގެނެސްދިނުމަށެވެ. މިއަދު މިރާއްޖޭ ހޭލުންތެރި ރައްޔިތުން އެދިއެދި ވަނީ، މި ފަދަ ހަރުދަނާ ނޫސްވެރިކަމަކަށް ކަމުގައި ވާތީއެވެ.
މި ނޫހުން ރާއްޖޭގެ ހުރިހާ ދާއިރާތަކެއްގެ ހަބަރުތައް ގެނެސްދޭނެއެވެ. ސިޔާސީ ހަބަރާއި އިގުތިސާދީ ހަބަރެވެ. އާންމު ހަބަރާއި ކުޅިވަރުގެ ހަބަރެވެ. މި މޭރުމުން ގިންތިކޮށް ހުރިހައި ދާއިރާއެއްގެ ނަންތައް ނުކީކަމުގައި ވިޔަސް، ހަބަރުގެ ފަންތީގައި ހިމެނޭ ހުރިހައި ބާވަތެއް މި ނޫހުން ގެނެސްދޭނެ އެވެ. އޭގެތެރޭގައި ދުނިޔޭގެ ހަބަރުތައް ވެސް ނިކަން ތާޒާކޮށް ފަތުރައިލެވޭނެ އެވެ.
ހަބަރު ފެތުރުމުގެ މުހިންމަތުގެ އިތުރަށް، ތައުލީމުޔާފުތާ ރައްޔިތެއް އިންތިޒާރުކުރާނެ އަދަބިއްޔާތުގެ ބާބުތައް ވެސް މި ނޫހުގައި ވާނެއެވެ. އޭގެ ތެރޭގައި ދީނާއި ސިއްހަތާއި ތާރީހާއި މުނިފޫހިފިލުވުމާއި ގެވެހިދިރިއުޅުމަށް ހާއްސަ ބައިތައް ވެސް ހިމެނޭނެއެވެ. މިފަދަ ސަބަބުތަކަށްޓަކައި، މި ނޫސް ވެގެންދާނީ، ނޫސްވެރިކަމުގެ އިތުރަށް ދިވެހި ލިޔުންތެރިކަމާއި އަދަބިއްޔާތަށް ވެސް އާރޯކަން ގެނެސްދޭނެ އާޒާދީ އުފަކާރައެއް ކަމުގަ އެވެ.
ނުރަނގަޅު ނުފޫޒުތަކުން އެއްކިބާވެފައިވާ މި ނޫހުގެ އެޑިޓަރުންނާއި ނޫސްވެރިންނާއި ލިޔުންތެރިން ބަރޯސާވާނެ ބަހާއަކީ ދިރިހުރި ޒަމީރެވެ. އަޅުގަނޑުމެންގެ އާރުކާޓީއަކީ އެއީ އެވެ. ވަކި އަތަކަށް ނުޖެހި، މިނިވަން ނޫސްވެރިކަމެއް ކުރުމަށް މަގުދައްކައިދޭނެ އާރުކާޓީއަކީ އެއީ ކަމުގައި ގަބޫލުކުރެވޭތީ އެވެ.
މި ނޫހުން އަބަދުވެސް އެދޭނީ، ތިޔަ ބޭފުޅުންނަށް ދާއިމީ ލާބަ އާއި މަންފާ އެވެ.
