މި އަހަރުގެ ދެވަނަ ކުއާޓަރުގައި އިގްތިސާދު ކުރި އަރާތަން ފެންނާނެ ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް އިއްޔެ ވިދާޅުވެއްޖެ އެެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މަބްރޫކް ވިދާޅުވީ، ކޮވިޑް-19 އާ ގުޅިގެން ރާއްޖެ ހިމެނޭ ގޮތަށް ގިނަ ގައުމުތަކެއްގެ ބޯޑަރު ބަންދު ކުރުމާ ގުޅިގެން، މިދިޔަ އަހަރު ނިމުނު އިރު ރާއްޖޭގެ އިގްތިސޯދީ ހާލަތު އޮތީ މީގެ ކުރިން ދުވަހަކުވެސް ތަހައްމަލް ކުރަން ނުޖެހޭ ވަރުގެ އުނދަގޫ ހާލަތަކަށް ވެއްޓިފައި ކަމަށެވެ.
" ރާއްޖޭގެ އިގްތިސޯދީ ހާލަތް 2020 އަހަރު ނިމުން އިރުގައި 26 އިންސައްތަ އާއި 29 އިންސަތަ އާއި ދެމެދުގެ އަދަދަކަށް ވަނީ ދަށަށް ގޮސްފައި،" އޭނާ ވިދާޅުވި އެވެ.
މަބްރޫކް އިތުރަށް ވިދާޅުވީ މި އަހަރުގެ އެކޮނޮމިކް ގްރޯތު ހުންނާނީ 13 ޕަސެންޓްގައި ކަމަށް މިދިޔަ އަހަރު ނިމުނުއިރު ލަފާ ކޮށްފައިވާ ކަމަށެވެ.
ނަމަވެސް ޓުއަރިޒަމް އިންޑަސްޓްރީ ގެ އެނދުތައް 85 ޕަސެންޓަށް ވުރެ ބޮޑަށް ހުޅުވާފައިވާތީ ކުއާޓަރު އެކެއް ނިމުނު އިރު ރާއްޖެ މި އޮތީ ފާސްޓް ފޭސް ރިކަވަރީ އެއްގައި ކަމަށް މަބްރޫކް ވިދާޅުވި އެވެ. އެހެންކަމުން މިހާރު ލަފާ ކުރެވޭ ގޮތުގައި ކުއާޓާ ދޭއް ނިމޭ އިރު ރާއްޖެ ގްރޯތު ޕާތަކަށް އަރާނެ ކަމަށް ވެސް އޭނާ ވިދާޅުވި އެވެ.
މި އަހަރުގެ ޖެނުއަރީ އަދި ފެބްރުއަރީ މަހު ނުވަދިހަ ހާހަށް ވުރެ ގިނަ ޓުއަރިސްޓުން ރާއްޖެއަށް ޒިޔާރަތް ކުރިއިރު މާޗް މަހު އެއް ލައްކަ އަށް ވުރެ ގިނަ ޓުއަރިސްޓުން ވަނީ އައިސްފަ އެވެ.
ޓޫރިޒަމް މާކެޓް ޝެއާ ގެ ބޮޑު ޕަސެންޓެއް ހިއްސާ ކުރާ ޔޫރަޕް އަދި ޗައިނާގެ މާކެޓާ ނުލައި އަންދާޒާ ކުރި ވަރަށް ވުރެ ބޮޑަށް ކޮންމެ މަހަކު ވެސް ރާއްޖެ އަށް ޓޫރިސްޓުން އައުމާއި ގުޅިގެން، މިލިއަނުން ޓޫރިސްޓުން އަންނާނެ ކަމަށް މިހާރު ބެލެވޭ ކަމަށް މަބްރޫކް ވިދާޅުވި އެވެ.
