އިންސާނީ ހައްގުތަކަށް އަރައިގަތުމުން މަދަނީ ބަދަލު ނަގައި ދޭން ފަށަން ކުރަން ޖެހޭ މަސައްކަތްތައް މިހާރު ކުރަމުން އަންނަ ކަމަށް ހިއުމަން ރައިޓްސް ކޮމިޝަނުން ބުނެފި އެވެ.
އެޗްއާރްސީއެމްގެ ގާނޫނަށް ގެނައި ދެ ވަނަ އިސްލާހުގައި ބުނެފައި ވަނީ އިންސާނީ ހައްގެއް ނިގުޅައިގެންފައިވާ ކަމަށް ކޮމިޝަނަށް ސާބިތުވެއްޖެ ހިނދެއްގައި މަދަނީ ފިޔަވަޅުއެޅުމާއި އަނިޔާ ލިބުނު ފަރާތަށް މަދަނީ ބަދަލު ނަގައިދެވޭނެ ކަމަށެވެ. އެހެންކަމުން އެ ބަދަލު ނަގައި ދޭނެ އުސޫލު ހެދުމުގެ މަސައްކަތް އެޗްއާރުސީއެމުން މިހާރު އަންނަނީ ކުރަމުންނެވެ.
އެޗްއާރުސީއެމްގެ މެމްބަރު ޑރ. އަހުމަދު އަދުހަމް އަބްދުالله، "އަދަދު" އަށް ވިދާޅުވީ އިންސާނީ ހައްގެއް ގެއްލިގެން މަދަނީ ބަދަލު ނަގައި ދިނުމުގެ ބާރު އެޗްއާރުސީއެމްއަށް ލިބިފައިވާއިރު ގިނަ މައްސަލަތަކެއް އެގޮތަށް ހުށަހެޅޭނެ ކަމަށް ބެލެވޭ ކަމަށެވެ. އެހެންކަމުން އެކަން ކުރާނެ ގޮތްތަކެއް އެކުލަވާ ލަމުން އަންނަ ކަމަށް ވިދާޅުވި އެވެ.
އޭރުން އަޅުގަނޑުމެން ހިންގާނީ ޓްރެބިއުނަލްއެއްގެ ގޮތުގައި. ހަމަ ވަޒީފާއާ ބެހޭ ޓްރެބިއުނަލްއިން ބަދަލު ނަގައިދޭ ގޮތަށް އަޅުގަނޑުމެން ވެސް އެ މަސައްކަތް ކުރިއަށް ދާނީ
މަދަނީ ބަދަލު ނަގައިދޭން ފެށުމާއެކު ހައްގު ގެއްލޭ މީހުންނަށް އެ މީހުންނަށް ލިބުނު ގެއްލުމުގެ ބަދަލު ހޯދަން އެދެވޭނެ އެވެ. އެގޮތުން އެ ހައްގު ދިނުމުގައި އިހުމާލުވި މީހުންގެ ކިބައިން މަދަނީ ބަދަލެއް ނަގައިދޭނެ އެވެ.
މަދަނީ ބަދަލު ނަގައި ދިނުމަކީ އެޗްއާރުސީއެމްއިން އަލަށް ފަށާ ކަމެކެވެ. މިހާތަނަށް އެ ކޮމިޝަނުން ބަލާ މައްސަލަތައް ބެލުމަށް ފަހު ރަނގަޅު ކުރަން ޖެހޭ ކަންކަން ދައުލަތުގެ މުއައްސަސާތަކަށް އަންގަ އެވެ. އަދި ދައުވާ ކުރަން ޖެހޭ ހާލަތުގައި ޕްރޮސިކިއުޓާ ޖެނެރަލްއަށް ވެސް ފޮނުވަ އެވެ.
އަދުހަމް ވިދާޅުވީ މަދަނީ ބަދަލު ނަގައި ދިނުމަށް މުވައްޒަފުން ތަމްރީން ކުރުމާއި އުސޫލުތައް އެކުލަވާލުމުގެ މަސައްކަތް ކުރަމުން އަންނަ ކަމަށެވެ. ނަމަވެސް އެކަން ކުރަން ފަށާނެ ވަކި ދުވަހެއް އަދި ނުނިންމަ އެވެ.
