މާލެ ސަރަހައްދުގައި ދިރިއުޅޭ މީހުންގެ ތެރެއިން ކޮވިޑް-19 އާ ދެކޮޅަށް ވެކްސިން ނުޖަހާ މީހުން ރޯދައިގެ ކުރިން ފުރަތަމަ ޑޯޒް ޖެހުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސް ކޮށްފި އެވެ.
މިއަދު ނެރުނު ބަޔާނެއްގައި އެޗްޕީއޭއިން ބުނެފައި ވަނީ ކުރިއަށް އޮތް ރޯދަ މަހު ވެކްސިން ދޭ ގަޑިތައް މަދު ވާނެ ކަމަށެވެ. އެހެންކަމުން ރޯދަ މަހު ވެކްސިން ޖަހަން އުނދަގޫތަކެއް ކުރިމަތިވެދާނެތީ އޭގެ ކުރިން ފުރަތަމަ ޑޯޒް ޖެހުމަށް އެ ބަޔާނުގައި އިލްތިމާސް ކޮށްފައިވެ އެވެ.
ދިވެހި ކަލަންޑަރުގައިވާ ގޮތުން މިއަހަރުގެ މުލަ ރޯދަ ދުވަހަކީ އަންނަ އޭޕްރީލް މަހުގެ 13 ވަނަ ދުވަހެވެ.
އެޗްޕީއޭއިން މިހާރު ޖަހަމުން އަންނަނީ ސިނޮފާމް ވެކްސިނެވެ. ކުރިން ދެމުން ގެންދިޔަ ކޮވިޝީލްޑް ވެކްސިންގެ ދެން ޖަހާނީ ދެ ޑޯޒެވެ.
ޗައިނާގެ ކުންފުންޏަކުން އުފައްދާފައިވާ ސިނޮފާމް ވެކްސިން އަކީ ކޮވިޑް 19 އަށް ދެމުން ގެންދާ އެހެން ވެކްސިންތަކެކޭ އެއް ފަދައިން ރައްކާތެރި ވެކްސިނެކެވެ. މި ވެކްސިންގެ ދެ ވަނަ ޑޯޒް ޖަހަން ޖެހޭނީ ފުރަތަމް ޑޯޒް ޖަހާތާ ހަތަރު ހަފްތާ ފަހުންނެވެ.
ސިނޮފާމް އުފައްދާފައި ވަނީ ކޮރޯނާ ވައިރަހަށް ބަދަލުތަކެއް ގެނެސްގެނެވެ. ކޮރޯނާ ވައިރަހަށް ކެމިކަލެއް އަޅާލުމުން އެ އިންއެކްޓިވްވެ އެވެ. ނަމަވެސް އޭގެ ބޭރު ފަށަލައިގަ ހުންނަ ކަށިތަކަށް ގެއްލުމެއް ނުވެ އެވެ. މިހެން ހެދުމުން ވައިރަހަށް ރެޕްލިކޭޓް ކުރުމުގެ ބާރު ކެނޑެ އެވެ. އަދި ހަށިގަނޑަށް މި ވެކްސިން ވަނުމުން ދިފާއީ ނިޒާމުން ކޮރޯނާ ވައިރަހަށް އެންޓިބޮޑީސް އުފައްދަން ދަސްވެ އެވެ.
ޕޯލިއޯ އާއި ރޭބީސް ފަދަ ވެކްސިންތައް ވެސް ތައްޔާރު ކޮށްފައި ވަނީ މިގޮތަށެވެ. މި ވެކްސިން 25 ގައުމެއްގައި މިހާރު ބޭނުން ކުރެ އެވެ.
މާލެ ސަރަހަށްދުން އިއްޔެ 776 މީހުން ވެކްސިން ޖަހާފައިވާ އިރު އަތޮޅުތަކުން 1،269 މީހުން ވަނީ ވެކްސިން ޖަހާފަ އެވެ. މިހާތަނަށް 232،175 މީހުން ވަނީ މުޅި ރާއްޖެ އިން ވެކްސިން ޖަހާފަ އެވެ.
