އޭލެވެލް އަދި އޭއެސްލެވެލް އިމްތިހާނުގެ ތާވަލަށް އެޑެކްސެލް އިން ގެނައި ބަދަލާއި ގުޅިގެން މިހާރު އިމްތިހާނު ބާއްވަން ހަމަޖެހިފައިވަނީ 26 އޭޕްރިލް ގައި ކަމަށް އެޑިއުކޭޝަން މިނިސްޓްރީ އިން ބުނެފި އެވެ.
އެޑިއުކޭޝަން މިނިސްޓްރީއިން ނެރުނު ނޫސް ބަޔާނުގައި ވަނީ މި ބަދަލު ގެނެވިފައިވަނީ މިނިސްޓްރީ އާއި ޑިޕާޓްމަންޓް އޮފް ޕަބްލިކް އެގްޒެމިނޭޝަންއާ މަޝްވަރާ ކުރުމެއް ނެތި ކަމަށެވެ. އަދި މި ތާރީހް ބަދަލު ކުރުމަށް އެޑެކްސެލް އާއި ކުރެވުނު މަޝްވަރާތަކުން އަލިމަގެއް ފެނިފައި ނުވާ ކަމަށެވެ.
މި ބަދަލާއި ގުޅިގެން އެޗްއެސްސީ އިމްތިހާނު އޮންނާނީ އޭލެވެލް އަދި އޭއެސްލެވެލް އިމްތިހާނު ނިމުމަށް ފަހު އެއް މަސް ފަހުން 13 ޖޫން އިން 17 ޖޫން އަށެވެ.
އޭ ލެވެލް އިމްތިހާނު މެއި/ޖޫން ގައި ނުބާއްވާނެކަން އެޑެކްސެލްއިން މިދިޔަ ފެބްރުއަރީ މަހު ރާއްޖެއަށް އެންގި އެވެ. ނަމަވެސް އެޑިއުކޭޝަން މިނިސްޓްރީ އިން ކުރި މަސައްކަތުން މެއި/ޖޫން ގައި އިމްތިހާނު ބާއްވަން އެޑެކްސެލް އިން ވަނީ ހުއްދަ ދީފައި އެވެ.
ދުނިޔޭގައި ކޮވިޑް ފެތުރުން ކޮންޓްރޯލް ވެފައިނުވާތީ މިދިޔަ އަހަރު އޯ ލެވެލް އަދި އޭލެވެލް އިމްތިހާނު ބާއްވާފައިނުވެ އެވެ.
