މާޗް މަހު ރާއްޖެ އަށް ޒިޔާރަތް ކުރި ފަތުރުވެރިންގެ އަދަދު އެއް ލައްކަ އަށް އަރައިފި އެވެ.
މިއީ ކޮވިޑް ހާލަތުގެ ފަހުން ރާއްޖެ އަށް މަސް ދުވަހުގެ ތެރޭގައި އެއް ލައްކަ ފަތުރުވެރިން ޒިޔާރަތް ކުރި ފުރަތަމަ ފަހަރެވެ. ކޮވިޑް-19 ގެ ބަލިމަޑުކަމުގެ ކުރިން ރާއްޖޭއަށް ޒިޔާރަތް ކުރާ ފަތުރުވެރިންގެ އަދަދު އެވަރެޖްކޮށް މަހަކު އުޅެނީ އެއް ލައްކަ އަށް ވުރެ މަތީގަ އެވެ.
އެންމެ ފަހުން ރާއްޖޭގެ މަހަކު ޓުއަރިސްޓުން ލައްކައަކަށް ވުރެ އިތުރުވެފައި ވަނީ މިދިޔަ އަހަރުގެ ފެބްރުއަރީ މަހުގެ ތެރޭގަ އެވެ. އެ މަހު ރާއްޖެ އަށް 149,785 ފަތުރުވެރިން ޒިޔާރަތް ކުރި އެވެ. އަދި ރާއްޖޭގެ ފަތުރުވެރިކަމުގެ ހައި ސީޒަން ޑިސެމްބަރު މަހު ފެށުނު ފަހުން ކޮންމެ މަހަކު އަންނަ ފަތުރުވެރިންގެ އަދަދުތައް ހުރީ 90،000 ގެ އަދަދުތަކުގައި ހިފެހެއްޓިފަ އެވެ.
މި މަހު ރާއްޖެ އަށް ޒިޔާރަތް ކުރި އެއް ލައްކަ ވަނަ ފަތުރުވެރިޔާއަކީ، މިސްރުގެ ރައްޔިތެއް ހަނާ މުހައްމަދު އަހުމަދާއި ކާމިލް މުސްތަފާ އެވެ. އެމިރޭޓްސް އެއާލައިންގެ ފްލައިޓެއްގައި އޭނާ ރާއްޖެ އަށް އައީ މިއަދުގެ ހެނދުނުގެ ވަގުތެއްގަ އެވެ. އޭނާ އައީ އިންޓަކޮންޓިނެންޓަލް މޯލްޑިވްސް މާމުނަގައު ގައި ޗުއްޓީ އެއް ހޭދަ ކޮށްލުމަށެވެ.
