ކޮވިޑް-19 ކޮންޓްރޯލް ކުރަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އަޅާފައިވާ ފިޔަވަޅުތަކާއި ހިލާފު ވެގެން އިދިކޮޅު ކޯލިޝަން 50،000 ރުފިޔާއިން އަދި ވެރިކަން ކުރާ އެމްޑީޕީ 5،000 ރުފިޔާއިން އިއްޔެ ޖޫރިމަނާ ކޮށްފި އެވެ.
ފުލުހުންގެ މީޑިއާ އޮފިޝަލް، "އަދަދު" އަށް ވިދާޅުވީ އިދިކޮޅު ކޯލިޝަންގައި ހިމެނޭ ޕީޕީއެމް/ޕީއެންސީ، ކޮންމެ ޕާޓީއެއް 25،000ރ. އިން ޖޫރިމަނާ ކުރީ މުޒާހަރާ ކުރުމުގައި އެޗްޕީއޭގެ މިންގަނޑުތަކާ ތަކުރާރުކޮށް ހިލާފު ވެފައިވާތީ ކަމަށެވެ.
އޭނާ ވިދާޅުވި ގޮތުގައި ސަރުކާރު ކޯލިޝަންގެ މައި ޕާޓީ، އެމްޑީޕީ 5،000 ރުފިޔާއިން ޖޫރިމަނާ ކުރީ އެޗްޕީއޭގެ މިންގަނޑުތަކާ ހިލާފަށް ޕާޓީގެ ހަރަކާތްތައް ކުރިއަށް ގެންގޮސްފައިވާތީ އެވެ. ސުވާލު ކުރުމުން ވެސް އެއީ ސީދާ ކޮން ހަރަކާތެއް ކަމެއް މީޑިއާ އޮފިޝަލް ވިދާޅެއް ނުވި އެވެ.
އިދިކޮޅު ކޯލިޝަނުން ގެންދަނީ ކޮންމެ ހުކުރު ދުވަހަކު ސިލްސިލާ މުޒާހަރާތަކެއް ބާއްވަމުންނެވެ. މާލޭގައި ކޮވިޑް-19 ހަލުވި ކަމާއެކު ފެތުރެމުން ދާއިރު އެ މުޒާހަރާތަކުގައި އެޗްޕީއޭގެ ގައިޑްލައިންތަކަށް އަމަލެއް ނުކުރެ އެވެ. މާލޭގައި ފަސް މީހުންނަށް ވުރެ ގިނަ މީހުން އެއްވެ ނޫޅުމަށް އެޗްޕީއޭއިން ވަނީ އަންގައިފަ އެވެ.
އެމްޑީޕީ ޖޫރިމަނާ ކޮށްފައިވާއިރު އެ ޕާޓީވެސް އަންނަނީ ކުރިއަށް އޮތް ލޯކަލް ކައުންސިލް އިންތިހާބަށް ތައްޔާރުވުމަށް ގިނަ ހަރަކާތްތަކެއް ބާއްވަމުންނެވެ. މިދިޔަ ހުކުރު ދުވަހު ހުޅުމާލޭގައި ޖަގަހައެއް ހުޅުވުމަށް އެ ޕާޓީން ގިނަ ބަޔަކާއެކު ބޭއްވި ހަރަކާތަށް އާއްމުންގެ ފާޑުކިޔުން ވަނީ އަމާޒުވެފަ އެވެ. އެކަމަށް ރައްދު ދެމުން އެމްޑީޕީއިން ބުނީ އެ ހަރަކާތް ބޭއްވީ އެޗްޕީއޭގެ ހުއްދަ ނަގައިގެން ކަމަށެވެ.
