ވެރިކަމަށް އައުމަށް ރައްޔިތުންނަށް ވެފައިވާ ވައުދުތައް ނުފުއްދައި، ދެވަނަ ދައުރަކާމެދު ނުވިސްނަވާނެކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މިދިޔަ ބުރާސްފަތި ދުވަހު ރައީސް އޮފީހުގައި ވާޗުއަލްކޮށް ބޭއްވި ނޫސްވެރިންގެ ބައްދަލުވުމުގައި، ވެރިކަމުގެ ދެ ވަނަ ދައުރަކަށް ކުރިމަތިލެއްވުމާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ވިދާޅުވީ އެމަނިކުފާނަށް މި ވަގުތު އެންމެ މުހިއްމީ ރައްޔިތުންނަށް ވެވަޑައިގަތް ވައުދުތައް ފުއްދެވުން ކަމަށެވެ.
"އަޅުގަނޑު މި މަސައްކަތް ކުރަނީ ވީ ވައުދުތައް އިހަށް ފުއްދޭތޯ. އެ ނޫން ވިސްނުމެއް އަޅުގަނޑުގެ ނެތް. ވެރިކަމުގެ ވާހަކަ ދައްކަން އަޅުގަނޑު ހެޔޮނުވާނެ ވީ ވައުދުތައް ނުފުއްދައިދީ، ރައްޔިތުން ގަބޫލެއް ނުކުރާނެ،" ރައީސް ވިދާޅުވި އެވެ.
ވެރިކަމަށް އައުމަށްފަހު ޖެހިގެން އަންނަ ދުވަހު ދެވަނަ ދައުރަކާމެދު ވިސްނާނަމަ، މަޝްރޫއުތައް ހިންގައި، ރައްޔިތުންނަށް ހިދުމަތްކުރުމަށް ހުރަސްއެޅޭކަމަށް އެމަނިކުފާނު ވިދާޅުވި އެވެ.
ރާއްޖެއަށް ފުރިހަމަ ތަރައްގީ ގެންނަން ވެރިކަމުގެ ދެ ދައުރު ލިބެން ޖެހޭ ކަމަށް ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒް ދާދިފަހުން ވިދާޅުވި ވާހަކައަށްވެސް ތާއީދުކުރައްވައި، ރައީސް ސޯލިހު ވަނީ ވާހަކަ ދައްކަވައިފަ އެވެ.
މިގޮތުން، ފަސް އަހަރު ދުވަހުގެ ދައުރަކީ ސިޔާސީ ގޮތުން ބަލާއިރު ރަނގަޅު މުއްދަތެއް ނަމަވެސް، ރައްޔިތުން ބޭނުންވާ ތަރައްގީ ގެންނަން އެއީ އެކަށީގެންވާ މުއްދަތެއް ނޫންކަން އެމަނިކުފާނު ފާހަގަކުރެއްވި އެވެ.
ސަބަބަކީ، ރައީސް ވިދާޅުވި ގޮތުގައި ސަރުކާރު ބަދަލުވާ ކޮންމެ ފަހަރަކު އެއް ސިޔާސަތުން އަނެއް ސިޔާސަތަށް ބަދަލުވުން ކަމަށާއި، އެކަމުގެ ސަބަބުން ރައްޔިތުންނަށާއި ގައުމަށް ބޮޑެތި ގެއްލުންތައް ލިބެމުންދާ ކަމަށެވެ.
ކުރީގެ ރައީސް އަބްދުﷲ ޔާމީން އަބްދުލްގައްޔޫމް ގެންގުޅުއްވި އެއްފަސްކުރުމުގެ ސިޔާސަތު މިސާލެއްގެ ގޮތުގައި ނަންގަވަމުން، ރައީސް ވިދާޅުވީ މި ސަރުކާރުގެ ލާމަރުކަޒުކުރުމުގެ ސިޔާސަތަކީ އެއާ ދިމާ އިދިކޮޅު ސިޔާސަތެއް ކަމަށެވެ.
"އެންމެން ގަބޫލުކުރާ ތަރައްގީގެ ސިޔާސަތެއް ނެތި ފަސް އަހަރުން ފަސް އަަހަރުން ބަދަލުކުރަން ވެއްޖިއްޔާ ވަަރަށް ބޮޑެތި ގެއްލުންތަކެއް ލިބޭނެ. އެހެންނެއް ނޫން، ސިޔާސީ ގޮތުން ބަލާއިރުގައި އަޅުގަނޑު ގަބޫލުކުރަނީ ފަސް އަހަރަކީ ދިގު މުއްދަތެއް ކަަމަށް ވެރިކަން ކުރަން،" ރައީސް ވިދާޅުވި އެވެ.
އެހެންކަމުން، ތަރައްގީގެ ސިޔާސަތުތަކަކީ، އެންމެންނަށް ގަބޫލުކުރެވޭ، ކޮންމެ ސަރުކާރަކާއެކު ބަދަލުނުވާނެ ސިޔާސަތުތަކަކަށް ވާން ޖެހޭ ކަމަށް އެމަނިކުފާނު ތަކުރާރުކޮށް ވިދާޅުވި އެވެ.
