ދޯންޏެއްގެ ބަރަފަތީގައި ޖެހި، ޓޫރިސްޓަކު މިއަދު ހެނދުނު މަރުވެއްޖެ އެވެ.
ފުލުހުން މައުލޫމާތު ދިން ގޮތުގައި މި ހާދިސާ ހިނގީ އދ. އަތޮޅު މަންތާ ޕޮއިންޓުގަ އެވެ. މި ހާދިސާގައި މަރުވީ ޖަރުމަނު ވިލާތުގެ ފިރިހެނެއް ކަމަށް ފުލުހުން ބުނެ އެވެ.
މިއަދު ހެނދުނު 09:59 ހާއިރު ފުލުހުންނަށް ރިޕޯޓުކުރި މި މައްސަލަ މިހާރު އަންނަނީ ތަހުގީގު ކުރަމުންނެވެ.
އދ. އަތޮޅުގެ ހިމާޔަތްކޮށްފައިވާ ކަނޑުގެ ސަރަހައްދު، ސައުތުއަރި މެރިން ޕްރޮޓެކްޝަން އޭރިއާ (ސަމްޕާ) ގައި ދޭތެރެދޭތެރެއިން މިފަދަ ހާދިސާތައް ހިނގަ އެވެ.
ސަމްޕާ އަކީ އދ. ރަންގަލި ފަރުގެ ހުޅަނގު އުތުރު ކަނުން ފެށިގެން އެ އަތޮޅު ދިގުރަށުގެ އުތުރު ކަނާ ދެމެދު ހުރި ރަށްރަށުގެ ފަރުގެ ބޭރު ތޮށިން ފެށިގެން އެއް ކިލޯމީޓަރުގެ ސަރަހައްދެކެވެ. އެ ސަރަހައްދު ހިމާޔަތްކުރީ 2009 ގަ އެވެ.
އެފަދަ ހާދިސާތައް ހިނގާތީ އުޅަނދުތަކުގެ ބުރަފަތީގައި ސަލާމަތީ ގާޑެއް އަޅަން މަޖުބޫރުކޮށް މެނޭޖުމަންޓު ޕްލޭނެއް ހެދީ މިދިޔަ އަހަރުގެ ފެބްރުއަރީ މަހުގެ ތެރޭގަ އެވެ.
