މި ސީޒަނުގެ ޕްރެޒިޑެންޓްސް ކަޕްގެ ކުޅޭނެ ފޯމެޓެއްގެ ގޮތުގައި، މިހާރު ކުރިއަށްދާ ދިރާގު ދިވެހި ޕްރިމިއާ ލީގުގެ ގަދަ ހަތަރަކަށް ސީދާ ޖާގައެއް ދޭ ގޮތަށް ކަނޑައަޅައިފި އެވެ.

އެފްއޭއެމްގެ ހިންގާ ކޮމިޓީން އިއްޔެ ބޭއްވި ބައްދަލުވުމުގައި ނިންމާފައިވަނީ، ޕްރެޒިޑެންޓްސް ކަޕް ދެ ގްރޫޕަކަށް ބަހާލައިގެން ކުރިއަށްގެންދާ ގޮތަށެވެ.

އެ ގޮތުން، ދިވެހި ޕްރިމިއާ ލީގުގެ ތާވަލްގެ އެންމެ ކުރީގައިވާ ހަތަރު ޓީމު ދެ ގްރޫޕަކަށް ބަހާލައި ތާވަލްގައި ޕޮއިންޓް ލިބިފައިވާ ތަރުތީބުން ސީޑްކުރާނެ އެވެ. އަދި، ލީގު ތާވަލުގެ ފަސް ވަނައިން ފެށިގެން އަށް ވަނަ އާ ދެމެދުގެ ހަތަރު ޓީމުގެ މެދުގައި ނޮކައުޓް މެޗްތައް ކުޅެގެން މޮޅުވާ ޓީމުތައް ގްރޫޕްތަކަށް ކޮލިފައިވާނެ ކަމަށެވެ.

އެހެންކަމުން، ކޮލިފައިން އަށް ފަހު، ޕްރެޒިޑެންޓްސް ކަޕް ކުޅޭނީ ހަ ޓީމު ދެ ގްރޫޕަށް ބަހައިގެންނެވެ. ކޮންމެ ގްރޫޕެއްގެ އެންމެ މޮޅު ދެ ޓީމު ކްރޮސް ކޮށް ސެމީ ފައިނަލް ކުޅުމަށް ފަހު ފައިނަލް މެޗު ކުޅޭ ގޮތަށް މުބާރާތުގެ ފޯމެޓް ވަނީ އެކުލަވާލައިފަ އެވެ.

އެފްއޭއެމް އިން އިއުލާނުކުރި ކަލަންޑަރުގައިވާ ގޮތުން، ޕްރެޒިޑެންޓްސް ކަޕް ފަށާނީ އަންނަ މަހު ނުވަ ވަނަ ދުވަހު އެވެ.

މީގެ ކުރިން ވެސް ލީގުގެ ގަދަ ހަތަރަކަށް ޕްރެޒިޑެންޓްސް ކަޕްގެ ޖާގަ ލިބޭ ގޮތަށް އޮތް ނަމަވެސް، އެފްއޭއެމް އިން މި ފަހުން މި މުބާރާތުގެ ފޯމެޓް އެކި ގޮތްގޮތަށް ވަނީ ބަދަލުކޮށްފަ އެވެ. އަދި، ފުޓްބޯޅަ ސީޒަން ފަށާ މުބާރާތެއްގެ ގޮތުގައި، ފުރަތަމަ ޑިވިޝަނުގެ އަށް ޓީމަށް ފުރުސަތު ދީގެން ވެސް ކުޅެފައިވެ އެެވެ.