ޓެކްނޯ ސާފް ޗެމްޕިއަންޝިޕް 2026 ގެ ސެމީ ފައިނަލުގައި ބޫޓާންގެ މައްޗަށް 2-1 އިން ކުރިހޯދައި އިންޑިއާ އިން ސާފް ޗެމްޕިއަންޝިޕް ފުޓްބޯޅަ މުބާރާތުގެ ފައިނަލުން ޖެހިޖެހިގެން 10 ވަނަ މުބާރާތުގައި ހޯދައިފަ އެވެ.
މިއީ، ސާފް ޗެމްޕިއަންޝިޕް ބާއްވާ 15 ވަނަ ފަހަރެވެ. ނުވަ ފަހަރު ތަށި ހޯދާފައިވާ އިންޑިއާ އިން ޖެހިޖެހިގެން 10 ވަނަ ފައިނަލުގައި ކުޅޭއިރު، އެ ޓީމު ނެތި ސާފް ޗެމްޕިއަންޝިޕެއްގެ ފައިނަލު ކުޅެފައިވަނީ، 2003 ވަނަ އަހަރު ބަންގްލަދޭޝްގަ އެވެ. އެ ފަހަރުގެ ފައިނަލުގައި ޕެނަލްޓީ ޖަހައިގެން ރާއްޖެ ބަލިކޮށް ތަށި އުފުލާލީ ބަންގްލަދޭޝް އެވެ. އެއީ، ސާފް ޗެމްޕިއަންޝިޕްގެ ފައިނަލަކަށް އިންޑިއާ އަށް ނުދެވުނު ހަމައެކަނި ފަހަރެވެ.
އޭގެ ފަހުން ކުޅުނު ނުވަ ފައިނަލުގައި އިންޑިއާ އިން ވާދަކޮށް، ހަ ފަހަރު ތަށި ހޯދި އެވެ. ތަށި ގެއްލުނީ، 2008 އާއި 2018 ވަނަ އަހަރު ރާއްޖެ އަތުން އަދި 2013 ވަނަ އަހަރު އަފްގާނިސްތާން އަތުން ބަލިވުމުންނެވެ.
ޑާކާ ނެޝަަނަލް ސްޓޭޑިއަމްގައި ކުޅުނު މެޗުގެ އަށް ވަނަ މިނިޓްގައި އިންޑިއާ އިން ލީޑުނެގީ އޭރިއާބޭރުން ޕީވީ ވިޝްނޫ ތިރީ ކަނަށް ޖެހި ގޯލުންނެވެ. އިންޑިއާގެ ފޯވާޑް ސުހައިލް އަހުމަދު ބަޓް ޖެހި ބޯޅައެއް ބޫޓާން ކީޕަރު، ގެޔެލްސްޓެން ޒަންގްޕޯ ވަނީ މަތަކޮށްފަ އެވެ.
މެޗުގެ 27 ވަނަ މިނިޓްގައި އިންޑިއާގެ ދެ ވަނަ ލަނޑު ޖެހީ ކޯނަރަކުން ލިބުނު ފުރުސަތެއްގައި ޗިންގްލެންސަނާ ސިންގް އެވެ. ލިބުނު ފުރުސަތުގައި އޭނާ ވަނީ ގޯލަށް ބޯޅަ ފޮނުވާލައިފަ އެވެ. ތިން ވަަނަ ލަނޑެއް ޖަހަން އިންޑިއާ އަށް ލިބުނު ފުރުސަތުތަކުގެ ބޭނުމެއް ނުހިފުނެވެ.
ދެ ވަނަ ހާފު ފެށިގެން ފަސް މިނިޓް ތެރޭ ބޫޓާނުން ލަނޑެއް ޖެހި އެވެ. އެކަމަކު، ލައިންސްމަން އޮފްސައިޑް ކަމަށް ދިދަ ނަގައިގެން ހުރުމުން ބެލެވުނީ ގޯލެއް ނޫން ކަމަށެވެ، އެކަމަކު، މި ފަހަރުގެ ސާފް ޗެމްޕިއަންޝިޕްގެ ސެމީ ފައިނަލާއި ފަައިނަލުގައި ވީޑިއޯ އެސިސްޓަންޓް ރެފްރީ (ވީއޭއާރް) ބޭނުންކުރާތީވެ، އެ ގޯލު ވީއޭއާރުން ބެލިއިރު، އޮފްސައިޑް ކަމަށް ނުވާތީވެ، ގޯލު ބަލައިގަަންނަން ނިންމީ އެވެ.
އިތުރު ލަނޑެއް ޖަހައި ބޫޓާނުން އެއްވަރުކުރެވޭތޯ ކުރި މަސައްކަތް ކާމިޔާބެއްނުވި އެވެ. މިއީ، ބޫޓާނުން ސާފް ޗެމްޕިއަންޝިޕްގެ ސެމީގައި ކުޅުނު ދެ ވަނަ ފަހަރެވެ. މީގެ 18 އަހަރު ކުރިން އެ ޓީމުން ފުރަތަމަ ފަހަަރަށް ސެމީގައި ކުޅުނުއިރު ވެސް ބައްދަލުކުރީ އިންޑިއާއާ އެެވެ. އެ ގޮތުން، 2008 ގެ ސެމީ ފައިނަލުގައި ބޫޓާނުން އިންޑިއާއާ ކުޅެގެން ބަލިވީ ވެސް 2-1 އިންނެވެ. އެއީ، ފުރިހަމަ ވަގުތުގައި އެއްވަރުވެފައި އޮތުމުން 120 މިނިޓް ކުޅެގެންނެވެ.
އެންމެ ފަހުން ބޭއްވި ސާފް ޗެމްޕިއަންޝިޕް ދެ މުބާރާތުގެ ތަށި އުފުލާލި އިންޑިއާ އިން މި ފަހަރު ސާފަށް ފޮނުވާފައިވަނީ، 23 އަހަރުން ދަށުގެ ކުޅުންތެރިންނާއި ސީނިއާ ބައެއް ކުޅުންތެރިން ހިމެނޭ ޓީމެކެެވެ. އިންޑިއާގެ ސީނިއާ ޓީމު މި ވަގުތު ތިބީ ނިއު ޒީލެންޑާ ދެކޮޅަށް މެޗުތަކެއް ކުޅެން އެ ގައުމުގަ އެވެ. ފުރަތަމަ މެޗުން ނިއު ޒީލެންޑު އަތުން އިންޑިއާ ބަލިވީ 5-0 އިންނެވެ.
ސާފް ޗެމްޕިއަންޝިޕް ފައިނަލުގައި އިންޑިއާ ކުޅޭނީ މިރޭ ކުޅޭ ދެ ވަނަ ސެމީ ފައިނަލުން ޕާކިސްތާނާއި ބަންގްލަދޭޝް ކުޅެގެން މޮޅުވާ ޓީމަކާ އެވެ. ފައިނަލް އޮތީ އަންގާރަ ދުވަހުގެރޭގަ އެވެ.
