ފަހު ވަގުތު ލަނޑު ޖަހައި، މުބާރާތް ބާއްވާ ބަންގްލަދޭޝް 1-0 އިން ބަލިކޮށް، އެ ޓީމު ކަޓުވާލައި ޕާކިސްތާނުން ފުރަތަމަ ފަހަރަށް ސާފް ޗެމްޕިއަންޝިޕްގެ ފައިނަލުން ފުރުސަތު ހޯދައިފި އެވެ.
ޕާކިސްތާނުން އަންގާރަ ދުވަހު ކުޅޭ ފައިނަލުގައި ބައްދަލުކުރާނީ ޖެހިޖެހިގެން 10 ވަނަ ފައިނަލުގައި ކުޅޭ އިންޑިއާއާ ދެކޮޅަށެވެ. ޖުމްލަ އެކު، 12 ފައިނަލް މިހާތަނަށް ކުޅެފައިވާ އިންޑިއާ އިން ނުވަ ފަހަރު ތަށި ހޯދިއިރު، މި ފަހަރުގެ މުބާރާތުގެ ގްރޫޕް ސްޓޭޖުގައި، އިންޑިއާ އިން ވަނީ 3-2 އިން ޕާކިސްތާން ބަލިކޮށްފަ އެވެ.
މީގެ ކުރިން، ޕާކިސްތާނުން ސާފް ޗެމްޕިއަންޝިޕްގެ ސެމީ ފައިނަލުގައި ކުޅުނު ދެ ފަހަރު ނާކާމިޔާބުވި ނަމަވެސް މި ފަހަރު މި ވަނީ ކާމިޔާބު ހޯދައިފަ އެެވެ. މިއީ، މި އަހަރު ތެރޭ ޕާކިސްތާނުން ކުޅޭ ދެ ވަަނަ ފައިނަލެވެ. ރާއްޖޭގެ ފުޓްބޯޅަ އަށް 75 އަހަރު ފުރުން ފާހަގަކުރަން ބޭއްވި ޑައިމަންޑް ޖުބިލީ އިންޓަނޭޝަނަލް މުބާރާތުގެ ޗެމްޕިއަންކަން ޕާކިސްތާނުން ވަނީ ހޯދައިފަ އެވެ.
ބަންގްލަދޭޝްގެ ނެޝަނަލް ސްޓޭޑިއަމްގައި ކުޅުނު މިރޭގެ ސެމީ ފައިނަލް މެޗުގައި ޕާކިސްތާނުން ލަނޑު ޖެހީ މެޗުގެ 87 ވަނަ މިނިޓްގަ އެވެ. މި ލަނޑު ޖެހީ ޑެންމާކް ފުރަތަމަ ޑިވިޝަނުގައި ކުޅޭ އަބްދުލް އަރްޝަދު އެވެ. ގްރޫޕް ސްޓޭޖު ދެ މެޗުގައި ކްލަބުން ރިލީސް ނުދޭތީ ނުކުޅެވުނު އަރްޝަދު ވަނީ އޭރިއާތެރެއިން ލިބުނު ފުރުސަތުގައި ގޯލުގެ ކައިރީ ކަނަށް ބޯޅަ ފޮނުވާލައިފަ އެވެ.
އެކާވީސް އަހަރަށް ފަހު، ސާފް ޗެމްޕިއަންޝިޕްގެ ފައިނަލަށް ދިއުމުގެ އަމާޒުގައި ނުކުތް ބަންގްލަދޭޝް އިން މި މެޗުގައި ރަނގަޅު ހަމަލާތަކެއް ފޮނުވާލި އެވެ. އެ ގޮތުން، ފުރަތަމަ ހާފުގައި އެ ޓީމުގެ ރަކީބް ހުސެއިން ފޮނުވާލި ހަމަލާއެއް ޕާކިސްތާން ކީޕަރު، ޔޫސުފް ބަޓް އަތުގައި ޖެހިފައި އަމާޒުވީ ގޯލުގެ ދަނޑިއަށެވެ. އަދި، ފުރަަތަމަ ހާފުގައި ޕާކިސްތާންގެ އަރުޝަދު ޖެހި ޝޮޓެއް ވެސް ދަނޑީގައި ޖެހުނެވެ.
އަރުޝަދު ލަނޑު ޖެހީ ލިބުނު ކުޑަ ފުރުސަތެއްގެ ބޭނުންހިފައި ގޯލުގެ ކައިރީ ކަނަށް ބޯޅަ އަމާޒުކޮށްލައިގެންނެވެ. ބަންގްލަދޭޝްގެ ކީޕަރު ސްރަބޯން އަށް އެ ބޯޅަ ހުއްޓުވަން މާ ބޮޑު ކަމެއް ނުކުރެވުނެވެ. ފަހު ވަގުތާ ޖެހެންދެން ބޯޅަ ކުރިއަށްގެންގޮސް ބަންގްލަދޭޝް އިން ލަނޑު ޖަހައި އެއްވަރުކުރެވޭތޯ ބެލި ނަމަވެސް، ޕާކިސްތާންގެ ޑިފެންސްލައިން ފޫއަޅުވާލެވޭ ގޮތެއްނުވި އެވެ.
ބަންގްލަދޭޝް އިން ހަތަރު ވަނަ ފަހަަރަށް ސާފް ޗެމްޕިއަންޝިޕް ހޯސްޓްކުރިއިރު، ކާމިޔާބުވީ އެންމެ ފުރަތަމަ 2003 ވަނަ އަހަރު ހޯސްޓްކުރިއިރު އެވެ. އޭގެ ފަހުން، 2009، 2018 އަދި މި އަހަރު ވެސް މި ނިންމާލީ ތަށި ހޯދަން އަމާޒުކަނޑައަޅައި، ކާމިޔާބު ނުލިބި އެވެ. އެ ގޮތުން، 2009 ވަނަ އަހަރުގެ ސާފް ޗެމްޕިއަންޝިޕްގައި ސެމީގައި 1-0 އިން އިންޑިއާގެ 23 އަހަރުން ދަށުގެ ޓީމު އަތުން ބަލިވެ ކެޓީ އެވެ. އަދި، 2018 ވަނަ އަހަރުގެ މުބާރާތުގައި ކެޓީ ގްރޫޕް ސްޓޭޖުންނެވެ. އެއީ، ޕާކިސްތާނާ އެއްވަރުވި ނަމަވެސް ލަނޑުގެ ތަފާތުން ފަހަތަށް ދިއުމުންނެވެ. މި ފަހަރުގެ މުބާރާތުގައި ސެމީގައި ޕާކިސްތާން އަތުން ބަލިވީ އެވެ.
