ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުން ކްލަބް ވެލެންސިއާ އަތުން ފަހު ވަގުތު 2-1 އިން މޮޅުވެ، އޮޑި ސްޕޯޓްސް ކްލަބުން ލީގުގެ ދެ ވަަނަ މަގާމުގައި ލީޑު ދަމަހައްޓައިފި އެވެ.
ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނުން 15 މެޗުން 43 ޕޮއިންޓް ހޯދާފައިވާއިރު، ދެ ވަނައިގައި އޮތް އޮޑިން މި ވަނީ 15 މެޗުން 35 ޕޮއިންޓް ހޯދައިފަ އެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގައި، އޮޑިން ލީޑުނެގީ 38 ވަނަ މިނިޓްގައި އަޔާޒް އަހުމަދު (އަޔާ) ޖެހި ގޯލުންނެވެ. މިއީ، ވެލެންސިއާގެ ތިން ކުޅުންތެރިން ކައިރިން ދެމިގަތުމަށް ފަހު، އޭރިއާތެެރެއަށް ވަދެ، ގޯލުގެ ތެރެއަށް ބޯޅަ ފޮނުވާލައިގެން އަޔާ ޖެހި ގޯލެކެވެ. މިއީ، މި ފަހަރުގެ ޓްރާންސްފާ މާކެޓްގައި، އޮޑި އަށް ބަދަލުވި ފަހުން އަޔާ އެ ޓީމަށް ޖަހައިދިން ފުރަތަމަ ގޯލެވެ.
ދެ ވަނަ ހާފުގައި ކުޅެން އަރައި، އިތުރު ގޯލެއް ޖެހޭތޯ އޮޑިން ބަލަމުންދިޔަ ނަމަވެސް، ވެލެންސިއާ އިން ރަނގަޅަށް ޑިފެންސްކުރަމުންދިޔަ އެވެ. އަދި، ވެލެންސިއާ އިން ވަނީ ލަނޑު ޖަހައި އެއްވަރުކޮށްފަ އެވެ. މި ލަނޑު އެ ޓީމަށް ޖަހައިދިނީ އައިދު މުހައްމަދު ޖަވީޒް އެވެ. އޭރިއާތެރެއަށް ހުރަސްވި ބޯޅައަކުން އައިދު ބޮލުން ޖެހި ބޯޅަ ވަނީ ގޯލުގެ ކައިރީ ކަނަށެވެ.
މެޗުން މޮޅުވާން ގޯލެއް ޖަހަން މަސައްކަތް ކުރަމުންދިޔަ އޮޑިން މޮޅުވި ލަނޑު ޖެހީ އިތުރު ވަގުތުގެ ފަސް ވަނަ މިނިޓްގަ އެވެ. މި ލަނޑު އެ ޓީމަށް ޖަހައިދިނީ، ބިދޭސީ ޑިފެންޑަރު، ގާނިއު އަޓަންޑާ އޮގުންގްބޭ އެވެ. އޭރިއާތެރެއިން ލިބުނު ބޯޅަ ކޮންޓްރޯލް ކުރުމަށް ފަހު، އޭނާ ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.
