ރިވައިވަލް ސްޕޯޓްސް ކްލަބާއި ގައުމީ ބެޑްމިންޓަން ޓީމުގެ ކުޅުންތެރިން ހިމެނޭ ސްކޮޑެއް، މެލޭޝިއާގެ އެމްބީއޭ އިންޓަނޭޝަނަލް މުބާރާތުގައި ވާދަކުރުމަށް އެ ގައުމަށް ގޮސްފި އެވެ.
ބީޑަބްލިއުއެފް އިން މެއި މަހު 16 ވަނަ ދުވަހު، ރާއްޖޭގެ ބެޑްމިންޓަން އެސޯސިއޭޝަން ސަސްޕެންޑް ކުރަން ނިންމައި، ރާއްޖެ ސަސްޕެންޑްކުރިކަން އަންގައި، އިއުލާނުކުރީ އެ މަހު 20 ވަނަ ދުވަހު އެވެ.
ބީއޭއެމް ސަސްޕެންޑްކުރިކަން އަންގައި، ބީޑަބްލިއުއެފް އިން ކުރި އިއުލާނުގައި ބުނެފައިވަނީ، ސަސްޕެންޝަނުގައި މި އޮތް މުއްދަތުގައި، ރާއްޖޭގެ އެއްވެސް ކުޅުންތެރިއަކަށް ބީޑަބްލިއުއެފް އިން ރުހުންދޭ އެއްވެސް މުބާރާތެއްގައި ނުކުޅެވޭނެ ކަމަށެވެ.
އަދި، ބީޑަބްލިއުއެފް އިން މަސައްކަތް ކުރަމުންދަނީ، އެންމެ ފަހުން ބީއޭއެމްގައި އޮތް އިންތިހާބީ ހިންގާ ކޮމިޓީ އާއި އޮލިމްޕިކް ކޮމިޓީ އަދި ސަރުކާރު ގުޅިގެން، ސަސްޕެންޝަން ހާލަތުން ރާއްޖެ އަރައިގަތުމަށް ކަމަށެވެ. ބީޑަބްލިއުއެފް އިން ރާއްޖޭގެ ސަސްޕެންޝަނާ އެއްގޮތަށް އަމަލުކުރަން ފަށައި، ޖޫން މަހު، ޗެކް ރިޕަބްލިކާއި އިޓަލީގައި އޮތް މުބާރާތްތަކުގައި ވާދަކުރަން އެންޓްްރީ ހަދައި، ބައިވެރިވުން ޔަގީންކޮށްފައި އޮތް ގައުމީ ބެޑްމިންޓަން ޓީމާއި ރިވައިވަލް ސްޕޯޓްސް ކްލަބްގެ ކުޅުންތެރިން ބާކީކޮށްފަ އެވެ.
އޭގެ ފަހުން، އިންޓަނޭޝަނަލް މުބާރާތެއްގައި ވާދަކޮށް، ފިޓްނަސް ރަނގަޅަށް ދެމެހެއްޓުމަށްޓަކައި، މި މަހު 25-27 އަށް މެލޭޝިއާގެ ޕޯޓް ޑިކްސަންގައި ކުރިއަށްދާ، އެމްބީއޭ އިންޓަނޭޝަނަލް މުބާރާތުގައި ވާދަކުރާނީ، ރިވައިވަލްގެ ކޮންޓްރެކްޓްގައި ހުރި، ނިބާލް އަހުމަދު، ޒަޔާން ޒަކީ، ހަސަން ޒަޔާން މުހައްމަދު އަދި ގައުމީ ސްކޮޑުގައި ހިމެނޭ އަދި ރިވައިވަލްއާ އެކު، ގިނަ މުބާރާތްތަކެއް ކުޅޭ، އައިމިނަތު ނަބީހާ އާއި ފާތުމަތު ނަބާހާ އެވެ.
މި ސްކޮޑާ އެކު، ރިވައިވަލްގެ ކޯޗު، ނަޝްފާން މުހައްމަދު ވެސް ވަނީ ދަތުރުކޮށްފަ އެވެ.
ބީޑަބްލިއުއެފް އިން ރާއްޖެ އަށް ދީފައި އޮތް ސަސްޕެންޝަން ހާލަތު އެއްކޮށް އުވައިނުލި ނަމަވެސް، ރާއްޖޭގެ ކުޅުންތެރިންނަށް ބީޑަބްލިއުއެފް ރުހުން ދޭ މުބާރާތްތަކުގައި ކުޅެވޭ ގޮތަށް ލުޔެއް ހޯދަން އަންނަނީ މަސައްކަތް ކުރަމުންނެވެ.
