ހަމްޕު އަށް ހެޓްރިކެއް، ނިއު ބަލިކޮށް މާޒިޔާ އިން ލީގު ކަޕްގެ ފުރަތަމަ މޮޅު ހޯދައިފި

May 5, 2025, 1:03 PM
ނިއު ކޮޅަށް ގޯލު ޖެހުމަށް ފަހު މާޒިޔާގެ ހަމްޕު އުފާފާޅުކުރަނީ.--- ފޮޓޯ: އަތޫފް އާތިފް / އަދަދު ސްޕޯޓްސް

ނިއު ކޮޅަށް ގޯލު ޖެހުމަށް ފަހު މާޒިޔާގެ ހަމްޕު އުފާފާޅުކުރަނީ.--- ފޮޓޯ: އަތޫފް އާތިފް / އަދަދު ސްޕޯޓްސް

ހަމްޒާ މުހައްމަދު (ހަމްޕު)ގެ ހެޓްރިކާ އެކު، ނިއު ރޭޑިއަންޓް ސްޕޯޓްސް ކްލަބް 5-1 އިން ބަލިކޮށް މާޒިޔާ ސްޕޯޓްސް އެންޑް ރެކްރިއޭޝަނުން އެފްއޭއެމް ލީގު ކަޕް ފުޓްބޯޅަ މުބާރާތުގެ ފުރަތަމަ މޮޅު ހޯދައިފި އެވެ.

މިއީ މިދިޔަ ޖެނުއަރީ މަހު މާޒިޔާގެ ކޯޗުކަމާ ހަވާލުވި ސްޕެއިނުގެ ލުއިސްމާ ހެނާންޑޭޒްގެ ކޯޗުކަމުގައި އެ ޓީމުން ކުޅުނު ފުރަތަމަ މެޗެވެ.

ފީފާގެ އެހީއާ އެކު ރާއްޖޭގެ ފުޓްބޯޅައިގެ ހަރަކާތްތައް ކުރިއަށްގެންދިއުމަށް ކުޅޭ ލީގު ކަޕްގެ ފުރަތަމަ މެޗުގައި ރޭ ޓީސީ ސްޕޯޓްސް ކްލަބާއި އޮޑި ސްޕޯޓްސް ކްލަބް ވަނީ ލަނޑެއް ނުޖެހި 0-0 އިން އެއްވަރުވެފަ އެވެ. ދެން، މި މުބާރާތުގައި ވާދަކުރަނީ މަހިބަދޫ ސްޕޯޓްސް ކްލަބް އެވެ.

ގަލޮޅު ދަނޑުގައި މިއަދު ހަވީރު ކުޅުނު މެޗު ފަށައިގެން ފަސް ވަނަ މިނިޓްގައި މާޒިޔާ އިން ލީޑުނެގި އެވެ. މިއީ، އޭރިއާބޭރުން ލިބުނު ހިލޭޖެހުމަކުން ހަމްޕު ޖެހި ގޯލެކެެވެ. ހަމްޕު އަށް ކުރި ފައުލަކަށް އޭރިއާ ރޮނގުކައިރިން ލިބުނު ހިލޭޖެހުމުން އޭނާ ފޮނުވާލި ބޯޅަ ގޯލަށް ވަނީ ނިއުގެ ގޯލުގައި ހުރި ކީޕަރު، އަހުމަދު ރަމީޒު އަތްމަތިން ގޮހެވެ.

ނިއުގެ ކޯޗު ސޮބާހު މުހައްމަދު ނެތި، އެ ޓީމަށް އިރުޝާދުދިނީ އެސިސްޓަންޓް ކޯޗު، އާދަމް އަބްދުއްލަތީފް (ލައްޗޭ) އެެވެ.

ނިއު އިން 10 ވަނަ މިނިޓްގައި އެއްވަރުކުރުމާ ގާތަށް ޖެހިލި އެވެ. އެ ގޮތުން، މާޒިޔާގެ އޭރިއާތެރެއިން ނިއުގެ ގާނާ މިޑްފީލްޑަރު، ތޯރިގު ޖެބްރިން އަށް ލިބުނު ފުރުސަތުގައި ޖެހި ބޯޅަ މާޒިޔާގެ ކީޕަރު ހުސެއިން ޝަރީފް (ހުސެން) ވަނީ މަތަކޮށްފަ އެވެ.

މާޒިޔާ އަށް ލީޑުފުޅާކޮށްދޭން ކޯނަރެއްގައި ހުރަސްވި ބޯޅައަކުން އެ ޓީމުގެ ހަސަން ރާއިފް (ހަންނަ) ބޮލުން ފޮނުވާލި ބޯޅަ އަމާޒުވީ ކީޕަރު، ރަމީޒް އަތަށެވެ.

ފުރަތަމަ ހާފު ނިމުމުގެ ކުރިން މާޒިޔާ އަށް ލީޑުފުޅާކޮށްދިނީ ވެސް ކުރިން ނިއު އަށް ކުޅުނު ހަމްޕު އެވެ. މެޗުގެ 39 ވަނަ މިނިޓްގައި ނިއު އޭރިއާތެރެއިން ހަމްޕު އަށް ލިބުނު ފުރުސަތުގައި، އޭނާ ފޮނުވާލި ބޯޅަ އަމާޒުވީ ގޯލުގެ ދުރު ކަނަށެވެ.

މާޒިޔާ އިން ދެ ވަނަ ހާފުގައި ފޮނުވާލި ފުރަތަމަ ހަމަލާ އަކީ އަލީ ފާސިރު (ސެންޓޭ) އޭރިއާތެރެއިން ޖެހި ބޯޅަ އެވެ. މެޗުގެ 49 ވަނަ މިނިޓްގައި ސެންޓޭގެ އެ ޝޮޓް ދިޔައީ ހުރަސްދަނޑިމަތިންނެވެ. އޭގެ ހަަތަރު މިނިޓް ފަހުން، ސެންޓޭ ހުސްކޮށްލާފައި އޭރިއާތެރެއިން ހަންނަ އަށް ދިން ބޯޅަ ފޮނުވާލިއިރު، ކީޕަރު ރަމީޒް ވަނީ އެ ބޯޅަ މަތަކޮށްފަ އެވެ.

މެޗުގެ 60 ވަނަ މިނިޓްގައި މާޒިޔާގެ އައިހަމް އަހުމަދު (ފަތޯ) އޭރިއާބޭރުން ފޮނުވާލި ބޯޅަ ދިޔައީ ދަނޑިކައިރިން ބޭރުންނެވެ. އޭގެ ދެ މިނިޓް ފަހުން، މާޒިޔާގެ ނާއިޒު ހަސަން (ދާދު) މުޅިން ހުސްކޮށްލާފައި ދިން ބޯޅަ އޭރިއާތެރޭގައި ހުސްކޮށް ހުރެފައި، ސެންޓޭ ފޮނުވާލި ބޯޅަ ދިޔައީ ހުރަސްދަނޑިމަތިންނެވެ.

މާޒިޔާގެ ތިން ވަނަ ގޯލު ޖަހައި، ހަމްޕު ވަނީ މެޗުގެ 65 ވަނަ މިނިޓްގައި އޭނާގެ ހެޓްރިކް ފުރިހަމަކޮށްފަ އެވެ. ހަމްޕު ފޮނުވާލި ބޯޅަ މި ފަހަރު ވެސް އަމާޒުވީ ގޯލުގެ ދުރު ކަނަށެވެ.

ނިއު އަށް ދެ ވަނަ ހާފުގައި ލިބުނު ފުރަތަމަ ފުރުސަތުގައި، މެޗުގެ 67 ވަަނަ މިނިޓްގައި މާޒިޔާ އޭރިއާތެރެއިން ތޯރިގު ފޮނުވާލި ބޯޅަ ދިޔައީ ހުރަސްދަނޑިމަތިންނެވެ. އޭގެ ހަތަރު މިނިޓް ފަހުން، މާޒިޔާގެ ހަތަރު ވަނަ ގޯލު ޖެހީ ބަދަލަކަށް ކުޅެން އެރި ހަސަން ނަޒީމް ގާސިމް (ޗޯޓު) އެވެ. ދެ ކުޅުންތެރިން ކައިރިން ދެމިގަތުމަށް ފަހު ޗޯޓު ފޮނުވާލި ބޯޅަ ގޯލަށް ވަނީ ތިރިތިރިން ގޮހެވެ.

މެޗުގެ 82 ވަނަ މިނިޓްގައި، މާޒިޔާ އިން ފަސް ވަނަ ގޯލެއް ޖެހި އެވެ. މި ލަނޑު ޖަހައިދިނީ، ބަދަލަކަށް ކުޅެން އެރި ޒުވާން ފޯވާޑް، މުހައްމަދު އިލާން އިމްރާން އެވެ. ކީޕަރު ރަމީޒް އަށް ހެދުނު ގޯހެއްގެ ފައިދާނަގައި އިލާން ވަނީ ހުސްކޮށް އޮތް ގޯލުގެ ތެރެއަށް ބޯޅަ ފޮނުވާލައިފަ އެވެ.

ބަދަލުތަކެއް ގެނެސްގެން ނިއު އިން މެޗުގެ ފަހުކޮޅުގައި އެޓޭކް ރަނގަޅުކުރިއިރު، އެ ޓީމުން މެޗުގައި ޖެހި ހަމައެކަނި ލަނޑު ކާމިޔާބުކުރީ މެޗުގެ 87 ވަނަ މިނިޓްގަ އެވެ. އެ ޓީމުގެ ގާނާގެ ފޯވާޑް ރަފީގް އަމީނޫ އަށް މާޒިޔާ އޭރިއާރެރެއިން ލިބުނު ފުރުސަތުގައި ފޮނުވާލި ބޯޅަ އަމާޒުވީ ގޯލުގެ ދުރު ކަނަށެވެ.

ލީގު ކަޕްގެ މެޗުތައް ދެން އޮންނާނީ އަންނަ ހުކުރު ދުވަހު އެވެ. އެ ދުވަހު، ހަވީރު 16:00 ގައި ކުޅޭ މެޗުގައި، އޮޑިން ބައްދަލުކުރާނީ މަހިބަދޫއާ އެވެ. އަދި އެރޭ ޓީސީން ނުކުންނާނީ މާޒިޔާއާ ދެކޮޅަށެވެ.

ކޮމެންޓް

ފަހުގެ ޚަބަރު

ބްރޭކްތައް އަންނަ ގޮތުން "ލީގުގެ ފީލްއެއް ނީނދޭ": އާތީ

ދިވެހި ޕްރިމިއާ ލީގު މެދުކަނޑާލަން ޖެހުމުން ކުޅުންތެރިންގެ ފިޓްނަސް އާއި ޕާފޯމަންސަށް އަސަރުކޮށް، ލީގުގެ އަސްލު ފޯރި ނުލިބޭ ކަމަށް ޓީސީގެ ކޯޗު އާތީ ބުނެފި. އާތީ ފާހަގަކުރި ގޮތުގައި ގިނަ ދުވަސްތަކެއްގެ ބްރޭކްތަކުގެ ސަބަބުން ޓީމުތަކުގެ ކޮންޓިނިއުޓީ ގެއްލި، މެޗުތަކަށް ތައްޔާރުވުމުގައި ބޮޑެތި ގޮންޖެހުންތަކެއް ކުރިމަތިވޭ

ފީފާގެ އިންތިހާބުގައި އަރަބިންގެ ތާއީދު އިންފަންޓީނޯ އަށް

އަންނަ އަހަރު ބާއްވާ ފީފާގެ އިންތިހާބުގައި މިހާރުގެ ރައީސް ޖިއާނީ އިންފަންޓީނޯއަށް ތާއީދުކުރުމަށް 22 ގައުމު ހިމެނޭ އަރަބް ފުޓްބޯޅަ ޔޫނިއަން (ޔޫއޭއެފްއޭ) އިން ނިންމައިފިއެވެ. އިންފަންޓީނޯއާ އެކު ޖުމްލަ ތިން ކެންޑިޑޭޓުން ވާދަކުރާ މި އިންތިހާބުގައި، އޭޝިއާ އާއި އެފްރިކާގެ ގައުމުތަކުގެ ބޮޑު ތާއީދަކާއެކު އޭނާއަށް މަގާމު ދިފާއުކުރުމުގެ ފުރުސަތު ބޮޑުކަމަށް ބެލެވެއެވެ. ފީފާގެ އާ ރައީސަކު ހޮވުމަށް ވޯޓުލުން އޮންނާނީ އަންނަ އަހަރުގެ މާޗް މަހު މޮރޮކޯގައި ބާއްވާ ފީފާ ކޮންގްރެސްގައެވެ.

އިންޑިއާގެ ލެޖެންޑުން ފުޓްބޯޅަ ރައީސްގެ ޝަކުވާ ސަރުކާރަށް

އިންޑިއާގެ ފުޓްބޯޅަ ފެޑެރޭޝަންގެ ރައީސް ކަލްޔާން ޗޯބޭގެ އިތުބާރު ނެތްކަމުގެ މައްސަލަ، ބައިޗުން ބުޓިއާ ހިމެނޭހެން އެ ގައުމުގެ 14 ލެޖެންޑުން ސްޕޯޓްސް މިނިސްޓަރަށް ހުށަހަޅައިފި. މި ސިޓީގައި ފާހަގަކޮށްފައިވަނީ ފެޑެރޭޝަންގެ މާލީ ހާލަތު ގޯސްވެ ބަނގުރޫޓުވަމުންދާ ކަމަށް

ސުޒޭނާއި މޯހަންގެ ދުލުން: ބަދުނަސީބާއި ހައްލެއްގެ ވާހަކަ!

ސަރަހައްދުގެ އެހެން ގައުމުތަކުން ބޭރުގައި އުޅޭ އެ ގައުމުތަކުގެ ދަރިފަސްކޮޅުގެ ކުޅުންތެރިންނަށް ރަށްވެހިކަން ދީގެން ގައުމީ ޓީމުތައް ވަރުގަދަކުރަމުންދާއިރު، ރާއްޖެއަށް އެ ފުރުސަތު ކުޑަކަމަށް ކުރީގެ ކޯޗުން ފާހަގަކުރެއެވެ. މިކަމުގެ ސަބަބުން ރާއްޖޭގެ ފުޓްބޯޅައަށް ކުރިމަތިވެފައިވާ ގޮންޖެހުންތަކަށް ހައްލެއް ހޯދުމަށް އެކަށީގެންވާ ނިޒާމެއް ނެތްކަމުގެ ކަންބޮޑުވުން ވަނީ ފާޅުކޮށްފައެވެ.

ވޭގާގެ ނަމެއް ނެތް، ފީފާ އިންތިހާބުގައި ތިން ކެންޑިޑޭޓުން!

އަންނަ އަހަރު ބާއްވާ ފީފާގެ އިންތިހާބުގައި ވާދަކުރާ ތިން ކެންޑިޑޭޓުންގެ ނަން އިއުލާނުކުރިއިރު، ކުރީގެ ކުޅުންތެރިޔާ ރަމޮން ވޭގާގެ ނަން ޝަރުތު ހަމަނުވުމުގެ ސަބަބުން ވަނީ ބާކީވެފައި. މި އިންތިހާބުގައި ވާދަކުރައްވަނީ މިހާރުގެ ރައީސް އިންފަންޓީނޯގެ އިތުރުން ފްރާންސްގެ ފިލިޕޭ ޑިއާލޯ އަދި ޖަޕާނުގެ ކޯޒޯ ޓަޝީމާ

އަނިޔާއިން ރަނގަޅުވެ އިލާން އެނބުރި އަންނަން ތައްޔާރު

ކަކުލަށް ލިބުނު އަނިޔާއަކާ ގުޅިގެން ދެ މަހެއްހާ ދުވަހު ކުޅުމާ ދުރުގައި ހުރުމަށްފަހު، މާޒިޔާގެ ފޯވާޑް މުހައްމަދު އިލާން އިމްރާން އަލުން ކުޅުމަށް އެނބުރި އަންނަން ތައްޔާރުވެއްޖެ. މި އަނިޔާގެ ސަބަބުން އިލާނަށް ސާފް ޗެމްޕިއަންޝިޕާއި ލީގުގެ މުހިންމު މެޗުތަކެއް ގެއްލުނު ނަމަވެސް، އޭނާ މިހާރު ވަނީ ފަރިތަކުރުންތަކުގައި ބައިވެރިވާން ފަށާފައި

ފީފާ އިން ނޭޕާލްގެ ސަސްޕެންޝަން އުވާލަނީ؟

ފީފާގެ އެންގުންތަކަށް ބޯނުލެނބުމުގެ ސަބަބުން ނޭޕާލް ފުޓްބޯޅަ ފެޑެރޭޝަނަށް ދީފައިވާ ސަސްޕެންޝަން، ކުރިއަށް އޮތް މަހެއްހާ ދުވަސް ތެރޭގައި އުވާލާނެ ކަމަށް ނޭޕާލުން ވަނީ ބުނެފައި. މި ސަސްޕެންޝަން އުވާލުމަށް ނޭޕާލް ސަރުކާރުގެ މަންދޫބުން ފީފާ އާއި އޭއެފްސީއާ އެކު މަޝްވަރާކޮށްފައި

Newsletter

Get the latest news delivered straight to your inbox