ހދ. ކުޅުދުއްފުށީ ޕޮލިސް ސްޓޭޝަނުގައި މިދިޔަ ހަފުތާގައި މީހަކު ދަންޖެހުނު ފަހުން، ހަމަ އެ ސްޓޭޝަނުގައި އަނެއްކާ ވެސް އިތުރު މީހަކު ދަންޖެހިގެން އަމިއްލައަށް މަރުވާން މަސައްކަތްކުރުމުން ހޮސްޕިޓަލުގައި ފަރުވާ ދިނުމަށްފަހު ދޫކޮށްލައިފި އެވެ.
އަދަދު އަށް އެނގިފައިވާ ގޮތުގައި ކުޅުދުއްފުށި ފުލުހުންގެ ގޮޅީގައި އޭޕްރީލް 4، ގައި މީހަކު ދަންޖެހުނުތާ ތިން ދުވަސް ފަހުން، އިތުރު މީހަކު ދަންޖެހުނީ އޭޕްރީލް 7، ގަ އެވެ.
މި ނޫހާ ވާހަކަ ދައްކަވަމުން ކުޅުދުއްފުށި ރީޖަނަލް ހޮސްޕިޓަލުގެ މީޑިއާ އޮފިޝަލް މުހައްމަދު މޫސާ ވިދާޅުވީ ދަންޖެހިގެން ގެނައި ދެވަނަ މީހާއަށް ފަރުވާ ދިނުމަށްފަހު އެ ދުވަހު ދޫކޮށްލާފައިވާ ކަމަށެވެ.
ކުޅުދުއްފުށި ފުލުހުންގެ ގޮޅީގައި ބަންދުކޮށްފައި ހުއްޓައި އޭޕްރީލް 4، ގައި ދަންޖެހުނު މީހާއަށް ފަރުވާ ދެމުން ދަނިކޮށް މަރުވީ އޭޕްރީލް 6، ގަ އެވެ.
ކުޅުދުއްފުށި ފުލުހުންގެ ގޮޅީގައި މިދިޔަ ހަފްތާގައި އިތުރު މީހަކު ދަންޖެހުނުކަން ހާމަވީ ހިއުމަން ރައިޓްސް ކޮމިޝަން (އެޗްއާރްސީއެމް) އިން ރޭ ނެރުނު ބަޔާނަކުންނެވެ. ފަހުން ދަންޖެހުނު މީހާގެ ތަފުސީލެއް ފުލުހުން ހާމައެއް ނުކުރެ އެވެ.
އެޗްއާރްސީއެމް އިން ނެރުނު ބަޔާނުގައި ބުނީ އޭޕްރީލް 4، ގައި ދަންޖެހުނު މީހާގެ ތަހުގީގަށް އެ ރަށުގައި ހަރަކާތްތެރިވަމުން ދަނިކޮށް އިތުރު މީހަކު އަމިއްލަ ނަފްސަށް ގެއްލުންދޭން މަސައްކަތްކުރި ކަމަށް މައުލޫމާތު ލިބިގެން ދެ މައްސަލަ ވެސް ތަހުގީގު ކުރަމުންދާ ކަމަށެވެ.
"ކޮމިޝަނުގެ ތަހްގީގު ޓީމުން، ހދ. ކުޅުދުއްފުށީގައި ހަރަކާތްތެރި ވަމުންދަނިކޮށް، ހދ. ކުޅުދުއްފުށީ ޕޮލިސް ކަސްޓޯޑިއަލްގައި ހުރި އިތުރު މީހެއް އަމިއްލަ ނަފްސަށް ގެއްލުންދިނުމަށް މަސައްކަތްކުރި ހަބަރު ލިބުމާއި ގުޅިގެން، މިކަމުގައިވެސް ކަން ހިނގާފައިވާ ގޮތް ކޮމިޝަނުން ވާނީ ބަލާފައި،" އެޗްއާރްސީއެމް އިން ބުންޏެވެ.
ކުޅުދުއްފުށި ޕޮލިސް ސްޓޭޝަނުގެ ގޮޅިއެއްގައި 2022 ވަނަ އަހަރު ވެސް މީހަކު ދަންޖެހުނެވެ. އެގޮތުން މިހާތަނަށް އެ ގޮޅީގައި ތިން މީހަކު ދަންޖެހިފައިވާއިރު، ދެ މީހުން ވަނީ މަރުވެފަ އެވެ. އެކަމަކު، އެޗްއާރްސީއެމްގެ ރެކޮމެންޑޭޝަނާ އެއްގޮތަށް ގޮޅިތައް ފެންނަ ގޮތަށް އަދިވެސް ކެމެރާ ހަރުކޮށްފައެއްނުވެ އެވެ.
ސީސީޓީވީ ކެމެރާ ނެތް ބަންދު މަރުކަޒުތަކުގެ ގޮޅިތަކުގައި ކެމެރާ ހަރުކުރެވެންދެން އެ ގޮޅިތައް ގަވާއިދުން މޮނިޓާ ކުރެވޭނެ އިންތިޒާމު ހަމަޖެއްސުމަށް ކަމާ ގުޅުންހުރި އިދާރާތަކަށް އެޗްއާރްސީއެމްއިން އިއްޔެ ވަނީ އަންގައިފަ އެވެ.
