ވެރިކަންކުރާ ޕީއެންސީގެ ހިންގުމުގެ މަސައްކަތުން ޗެއާޕާސަން އަބްދުއްރަހީމް އަބްދުﷲ އެކަހެރިކޮށް، އެމަނިކުފާނުގެ މަޝްވަރާ ހޯދުން ރައީސް ޑރ. މުހައްމަދު މުއިއްޒު ހުއްޓާލައްވައިފި ކަމަށް މައުލޫމާތު ލިބިއްޖެ އެވެ.
މި ވާހަކަތައް ތިލަވީ ޓޫރިޒަމް މިނިސްޓަރު ކަމުގައި ހުންނެވި އަބްދުއްރަހީމުގެ ދަރިކަލުން އިބްރާހިމް ފައިސަލް މަގާމުން ވަކިކުރުމާ ގުޅިގެންނެވެ.
ފައިސަލް ވަކިކުރާ ކަމުގެ އަޑުތަކާއި އަބްދުއްރަހީމް އާއި ރައީސް ޑރ. މުހައްމަދު މުއިއްޒު އާ ދެމެދު އޮތް ގުޅުން ގޯސްވެފައިވާކަމުގެ އަޑުތައް މި ފަހުން ވަނީ އެކިފަހަރުމަތިން ގަދަވެފަ އެވެ. މިކަމާ ގުޅިގެން ޕީއެންސީގެ ބައެއް މަޖިލިސް މެންބަރުންނާއި ޕާޓީގެ އިސްވެރިން ވަނީ މި ނޫހާ ވާހަކަ ދައްކަވައިފަ އެވެ.
އޭގެތެރެއިން އެއް ބޭފުޅަކު ވިދާޅުވި ގޮތުގައި ރަސްމީ ހަފުލާތަކުގައި އެކުގައި ފެނުނު ނަމަވެސް ދެ ރައީސުންގެ ގުޅުން ހީނަރުވާން ފެށިތާ ދުވަސްތަކެއް ވެއްޖެ ކަމަށެވެ. އެގޮތުން މިނިސްޓަރުކަމުން ފައިސަލް ވަކި ކުރި މައްސަލާގައި އިޝާރާތެއް އަދި މަޝްވަރާއެއް ވެސް ރައީސް، އަބްދުއްރަހީމްއާ ނުކުރައްވާ ކަމަށް އޭނާ ވިދާޅުވި އެވެ.
"އެކަމުން އެބަ އެނގޭ ރައީސް މުއިއްޒު އާއި އަބްދުއްރަހީމާ ދެމެދު އޮތް މައްސަލާގެ ބޮޑުކަމާއި ފުންކަން. މިއީ މިއަދަކު އިއްޔެއަކު ހިނގައިގެން އުޅޭ ކަމެއް، ޖެހިގެން އުޅޭ މައްސަލައެއް ނޫން،" އޭނާ ވިދާޅުވި އެވެ.
އިތުރު ބޭފަޅަކު ވިދާޅުވީ މި ފަހުން ޕީއެންސީގެ ސެކްރެޓަރީ ޖެނެރަލްގެ މަގާމުގައި ހުންނެވި ޒީނާޒު އަދުނާން ވަކިކޮށް މުއާޒު ހަލީމު އެ މަގާމަށް އައްޔަނުކުރީ ވެސް، ޕާޓީގެ ޗެއާޕާސަން އާ މަޝްވަރާ ކުރުމެއްނެތި ކަމަށެވެ. އެކަމާ ގުޅިގެން އަބްދުއްރަހީމް ނުރުހުން ފާޅުކުރެއްވި ކަމަށް ވެސް ވެ އެވެ.
ފައިސަލް ވަކިކުރުމާ ގުޅިގެން، ރާއްޖޭގެ ނޫހަކާ ވާހަކަދައްކަވަމުން އަބްދުއްރަހީމް ވަނީ ދެ ރައީސުންގެ ދެމެދުގައި އޮތް ގުޅުން ރަނގަޅު ނަމަ މިކަން ނުވާނެ ކަމަށް ވިދާޅުވެފަ އެވެ. ފައިސަލް ވަކިކުރަން ޖެހޭ ސަބަބެއް ނެތް ކަމަށް ވެސް އެމަނިކުފާނު ވިދާޅުވި އެވެ.
