ހުޅުމާލެއިން މާލެ އަންނަން އޮންނަ ހައިވޭއަށް އަރާ ސަރަހައްދު ބަންދުކޮށް، މުޒާހަރާ ކުރި ޓެކްސީ ޑްރައިވަރުންތަކެއް ފުލުހުން ހައްޔަރު ކޮށްފި އެވެ.
ހައިވޭއަށް އަރަން އޮންނަ މަގު ބަންދުވާ ގޮތަށް މަގު މެދުގައި ކާރުތައް ޕާކު ކޮށް އެ ސަރަހައްދު ޓެކްސީ ޑްރައިވަރުން ބަންދު ކުރީ ހުޅުމާލެ ރުއްގަނޑު ސަރަހައްދުގައި މިއަދު ހަވީރު 4:00 އިން ފެށިގެން ކުރަމުންދިޔަ ސުލްހަވެރި އިހުތިޖާޖު ނިންމައިލުމަށްފަހު އެވެ.
އެ ސަރަހައްދު މިހާރު ފުލުހުންގެ ކޮންޓްރޯލްގެ ދަށަށް ގެންގޮސްފައިވާއިރު، ފުލުހުން ހައްޔަރު ކުރީ މަގު ބަންދު ކުރުމުގައި އިސްކޮށް ހަރަކާތްތެރިވި ބައެއް މީހުންނެވެ.
އެ ސަރަހައްދުން ހައްޔަރު ކުރި މީހުންގެ އަދަދު އަދި ސީދާ ޔަގީން ނުވި ނަމަވެސް ޓެކްސީ ޑްރައިވަރުންގެ ތެރެއިން ދެ މީހަކު ހައްޔަރު ކުރިތަން ފެނުނު ކަމަށް އެ ސަރަހައްދުގައި ތިބި "އަދަދު" ގެ ނޫސްވެެރިން ބުންޏެވެ.
އޭގެތެރެއިން އެކަކަކީ މިއަދުގެ އިހުތިޖާޖު އިންތިޒާމުކޮށް ހިންގުމުގައި އެންމެ އިސްކޮށް ރުއްގަނޑު ސަރަހައްދުގައި ވެސް ހަރަކާތްތެރިވި ޑްރައިވަރެކެވެ.
އެކަމާ ގުޅޭގޮތުން ފުލުހުން އަދި ރަސްމީކޮށް އެއްޗެއް ނުބުނެ އެވެ.
ހައިވޭއަށް އަރަން އޮންނަ މަގު ޓެކްސީ ޑްރައިވަރުން ގޮސް ބަންދު ކުރީ މިރޭ 9:00 ޖަހަން އުޅެނިކޮށެވެ. ނަމަވެސް ދާދި ކުޑަ ވަގުތުކޮޅެއްގެ ތެރޭގައި އެ ސަރަހައްދަށް ފުލުހުން ގޮސް އެ ސަރަހައްދު ކޮންޓްރޯލްގެ ދަށަށް ގެންދަން މަސައްކަތް ފެށި އެވެ.
އެއާއެކު އެ ސަރަހައްދުގަައި މުޒާހަރާ ކުރަމުންދިޔަ ޓެކްސީ ޑްރައިވަރުންނާއި ފުލުހުންނާ ދެމެދު ކޮންމެވެސް ވަރެއްގެ ހަމަނުޖެހުންތަކެއް ވެސް ހިނގި އެވެ. އެ ހަމަނުޖެހުންތަކުގައި އެއްވެސް މީހަކަށް އަނިޔާއެއް ވީކަމެއް އަދި ނޭނގެ އެވެ.
