ފިއުލް ސަޕްލައި މޯލްޑިވްސް (އެފްއެސްއެމް) ގެ މެނޭޖިން ޑިރެކްޓަރުގެ މަގާމުގައި ހުންނެވި އިސްމާއިލް ސުހައިލް މިއަދު އެ މަގާމުން އިސްތިއުފާ ދީފި އެވެ.

"އަދަދު" ނޫހަށް މައުލޫމަތު ލިބިފައިވާ ގޮތުގައި ސުހައިލް އިސްތިއުފާ ދިނީ އޭނާގެ މައްޗަށް ތުހުމަތު ކުރެވޭ މައްސަލަތަކެއް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ބަލަމުން ދަނިކޮށެވެ.

އެފްއެސްއެމްއަކީ އެސްޓީއޯގެ ސަބްސިޑަރީ ކުންފުންޏެކެވެ. ތެޔޮ އިމްޕޯޓުކޮށް ރާއްޖޭގެ އެކި ކަންކޮޅުތަކަށް އެ ތެޔޮ ފޯރުކޮށްދެނީ އެފްއެސްއެމްއިންނެވެ.

އޭނާގެ މައްޗަށް ތުހުމަތު ކުރެވޭ މައްސަލަތަކާ ގުޅޭ މައުލޫމާތު މިހާތަނަށް އެނގިފައި ނުވެ އެވެ. ނަމަވެސް, އެސްޓީއޯއިން ވަނީ އޭނާ މަގާމުން އިސްތިއުފާ ދިންކަން ކަށަވަރު ކޮށްދީފަ އެވެ.

ސުހައިލް އެ މަގާމަށް އައްޔަނުކުރީ ޑިސެމްބަރު 5, 2023 ގަ އެވެ. އޭނާ ވަނީ ވެރިކަން ކުރާ ކޯލިޝަނުގައި އޮތް ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ޑެޕިއުޓީ ޓްރެޝަރާގެ މަގާމު ވެސް ފުރުއްވާފަ އެވެ.