އިންޑިއާގެ މެޑްރާސް އިންސްޓިޓިއުޓް އޮފް އޯތޯޕެޑިކްސް އެންޑް ޓްރޯމަޓޮލޮޖީ (މިއޮޓް) ގެ މައުލޫމާތު ދިނުމަށް ރާއްޖޭގައި ސެމިނާއެއް ބާއްވައިފި އެވެ.
ހޮޓެލް ޖެންގައި ބޭއްވި އެ ސެމިނާގައި މިއޮޓްއަށް ރާއްޖެއަށް ތައާރަފް ކުރެވިދާނެ ހިދުމަތްތައް ކިޔައިދީ، އެ ތަނުން ފޯރުކޮށްދެމުން އަންނަ ހިދުމަތްތަކުގެ މައުލޫމާތު ވެސް ވަނީ ހިއްސާ ކޮށްފަ އެވެ.
މިއޮޓްއިން ވަނީ ފާއިތުވި އަހަރުތަކުގައި އައިޖީއެމްއެޗްގައި އެކި ހިދުމަތްތައް ގާއިމުކުރުމަށް އެހީތެރިކަން ފޯރުކޮށްދީފަ އެވެ.
މިއޮޓްގެ އެމްޑީ ޕްރިތުވީ މޯހަންދާސް "އަދަދު" އަށް ވިދާޅުވީ އެ ތަނުން ފާއިތުވި އަހަރުތަކުގައި ރާއްޖޭގެ ގިނަ ރައްޔިތުންނަށް ހިދުމަތްތައް ދީފައިވާ ކަމަށާއި ބޭނުންވަނީ ކުރިއަށް އޮތް ދުވަސްތަކުގައި ވެސް ރާއްޖޭގެ ރައްޔިތުންނަށް ރަނގަޅު ހިދުމަތެއް ދޭން ކަމަށެވެ.
"އަޅުގަނޑުމެން ބޭނުންވަނީ އަތްފޯރާ އަގުގައި ރައްޔިތުންނަށް ހިދުމަތް ދޭން. މިއޮޓްއިން ދޭ ހިދުމަތްތަކަކީ ކޮލިޓީ ރަނގަޅު އަތްފޯރާ އަގެއްގައި ދޭ ހިދުމަތް. ދިވެހިންނަށް ފާއިތުވެދިޔަ ދުވަސްތަކުގައި ވެސް ދިން ގޮތަށް ހިދުމަތް ދޭން ބޭނުންވަނީ. ރާއްޖޭގައި ވެސް ދެވޭނެ ހިދުމަތްތައް ބަލަން ބޭނުންވޭ،" އޭނާ ވިދާޅުވި އެވެ.
މިއޮޓްއިން ވަނީ ރާއްޖޭގެ އެކި ރަށްރަށުގައި މެޑިކަލް ކޭމްޕްތައް ހިންގުމުގެ އިތުރުން އައިޖީއެމްއެޗް އާއި އައްޑޫ އިކުއެޓޯރިއަލް ހޮސްޕިޓަލުގެ ސިއްހީ ހިދުމަތްތެރިން ތަމްރީން ކުރުމުގެ ޕްރޮގްރާމްތައް ވެސް ހިންގާފަ އެވެ.
މިއޮޓްއަކީ 1999 އިން ފެށިގެން ހިދުމަތް ދެމުން އަންނަ އޯތޯޕެޑިކްސް އަދި ޓްރޯމާއަށް ހާއްސަ ހޮސްޕިޓަލެކެވެ. 70 އެނދުގެ ހޮސްޕިޓަލަކުން އޭރު ފެށި މިއޮޓްގައި މިހާރު 1،000 އަށްވުރެ ގިނަ އެނދު އެބަހުއްޓެވެ.
އޭގެއިތުރުން އެތަނުގައި 63 ސްޕެޝަލިސްޓުންނާއި، 250 ފުލްޓައިމް ޑޮކްޓަރުން އަންނަނީ ހިދުމަތް ދެމުންނެވެ.
މިއޮޓްއިން ހިދުމަތް ހޯދަން ބޭނުންވާ ފަރާތްތަކުން 9326772 ނަންބަރަށް ނުވަތަަ mhic-maldives@miotinternational.com އަށް މެއިލް ކުރުމަށް އެތަނުން އެދެ އެވެ.
