ޓޫރިސްޓު ފެސިލިޓީތަކުން ރާއްޖޭގެ ބޭންކުތަކަށް ޑޮލަރު މާރު ކުރަން މަޖުބޫރުކޮށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭރު ފައިސާގެ ގަވާއިދަށް ގެނައި ބަދަލަށް އަމަލު ނުކުރާނެކަން، ރާއްޖޭގައި ގިނަ ރިސޯޓުތަކެއް ހިންގާ ޔުނިވާސަލް ގްރޫޕުންވެސް އަންގައިފި އެވެ.

ޔުނިވާސަލް އިން ރާއްޖޭގައި އަށް ރިސޯޓެއް ހިންގަ އެވެ. އެއީ ކުރުނބާ މޯލްޑިވްސް، ވެލައްސަރު މޯލްޑިވްސް، ބަރޮސް މޯލްޑިވްސް، ހުވަފެންފުށި މޯލްޑިވްސް، ކުރަމަތި މޯލްޑިވްސް، މިލައިދޫ މޯލްޑިވްސް، އަދި ދިގަލި މޯލްޑިވްސް އެވެ.

މި ހުރިހާ ރިސޯޓަކުން ވެސް އެމްއެމްއޭގެ ގަވާއިދަށް އަމަލުނުކުރާނެކަން ހާމަކޮށް އެމްއެމްއޭގެ ގަވަރުނަރު އަހުމަދު މުނައްވަރު އަށް ފޮނުއްވި ސިޓީގައި ސޮއިކުރައްވާފައި އޮތީ ޔުނިވާސަލް އެންޓަޕްރައިސަސްގެ ޗެއާމަން، މުހައްމަދު އުމަރު މަނިކު (އެމްޔޫ މަނިކު) އެވެ.

އެ ސިޓީގެ ކޮޕީއެއް "އަދަދު" އަށް ވަނީ ލިބިފަ އެވެ. ސިޓީގައި އޭނާ މައިގަނޑު ގޮތެއްގައި ފާހަގަކުރައްވާފައިވަނީ އެމްއެމްއޭގެ ގަވާއިދަކީ ޓޫރިޒަމް އިންޑަސްޓްރީގެ ހަގީގަތްތަކާ ދުރު، މަޝްވަރާކުރުމެއް ނެތި ހަދާފައިވާ ގަވާއިދެއް ކަމެވެ.

ސިޓީގައި ފާހަގަކޮށްފައިވާ މައިގަނޑު ވާހަކަތައް

• ރިސޯޓުތަކުގެ ރޫމް ރޭޓަށް ބެލުމެއް ނެތި 500 ޑޮލަރު މާރުކުރަން ކަނޑައެޅުމަކީ ސަބަބުވެރި ނިންމުމެއް ނޫންކަން
• ރިސޯޓުތަކުން ކުރާ ހަރަދުގެ 90 އިންސައްތަ ހަރަދު ކުރަނީ ޑޮލަރުންކަމާއި އެމްއެމްއޭގެ ގަވާއިދުގައި އެކަމަށް ރިއާޔަތްކޮށްފައި ނުވާކަން
• މިސާލަކަށް 250 ޑޮލަރަށް ވިއްކާ ރޫމެއްގައި ހަތަރު ރޭ ތިބޭ ފަތުރުވެރިންނަށް ލިބޭ 1000 ޑޮލަރުގެ އާމްދަނީ އަށް ބަލާ 2000 ޑޮލަރު މާރުކުރަން ޖެހޭ ގޮތަށް އޮތް އޮތުން ދެކޮޅު ނުޖެހޭކަން
• ޔުނިވާސަލްގެ ހުރިހާ އެކައުންޓެއް ހުޅުވާފައި ހުރީ ރާއްޖޭގައި ކަން.
• ކޮންމެ ރިސޯޓެއްގެ އަހަރީ އާމްދަނީ 30 އިންސައްތަ އަށްވުރެ މަތީ އަދަދެއް ޓެކްސްގެ ގޮތުގައި ދައުލަތަށް ދައްކާކަން

މި ސަބަބުތަކަށް ރިއާޔަތްކޮށް އެމްއެމްއޭ އިން ގަވާއިދާމެދު ދެވަނަ ވިސްނުމަކަށް ގޮސް އިންޑަސްޓްރީގެ މަޝްވަރާއެކު ދެމެހެއްޓެނިވި ގޮތުގައި ފައިދާ ކުރަނިވި އުސޫލެއް ގާއިމުކުރުމަށް މަނިކު ވަނީ ސަރުކާރަށާއި އެމްއެމްއޭ އަށް ގޮވާލައްފަ އެވެ.

ޔުނިވާސަލްގެ އިތުރުން، ރާއްޖޭގައި ގިނަ ރިސޯޓުތަކެއް ހިންގާ މަހުޖަނު ޗަމްޕާ މުހައްމަދު މޫސާ (އުއްޗު) ވެސް ވަނީ ސޮއިކުރައްވައި އޭނާގެ ރިސޯޓުތަކުން ގަވާއިދަށް އަމަލުނުކުރާނެ ކަމަށް ބުނެ ސިޓީއެއް ފޮނުއްވާފަ އެވެ. އެ ސިޓީގައިވެސް މައިގަނޑު ގޮތެއްގައި ފާހަގަކޮށްފައިވަނީ އެއް ވާހަކަތަކެކެވެ.

"މި ސިޓީގައި ރިއާޔަތް ކޮށްފައިވާ ކަންކަމަށް ބަލާ، ވަގުތުން ވަގުތަށް މި ގަވާއިދު އުވާލުމަށް ސަރުކާރަށް ގޮވާލަން. އަދި ދުރު ރާސްތާގައި އިގުތިސޯދަށް ފައިދާ ކުރާނެ ނިޒާމެއް ގާއިމުކުރުމަށާއި އެ މަސައްކަތުގައި އިންޑަސްޓްރީގެ ބައިވެރިވުން އިތުރުކުރުމަށްވެސް ގޮވާލަން،" އުއްޗުގެ ސިޓީ ނިންމާލަމުން ލިޔުއްވާފައިވެ އެވެ.

ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކަށް އަންނަ ކޮންމެ ޓޫރިސްޓަކަށް 25 ޑޮލަރުގެ މަގުން ބޭންކަށް ޑޮލަރު މާރު ކުރަން މަޖުބޫރުކޮށް އެމްއެމްއޭ އިން އޮކްޓޯބަރު 1 ގެޒެޓުކުރި ގަވާއިދުގެ ދަށުން އެ ފަދަ ތަންތަން އެމްއެމްއޭގައި ރަޖިސްޓްރީވުމަށް ދީފައި އޮތް ސުންގަޑިއަކީ އޮކްޓޯބަރު 30 އެވެ.

"އަދަދު" އާ ވާހަކަ ދައްކަމުން ޓޫރިޒަމް އިންޑަސްޓްރީގެ އިސް ބޭފުޅަކު ރޭ ވިދާޅުވީ އެ ގަވާއިދަށް އަމަލު ނުކުރާނެ ކަމަށް ބުނެ މިހައިތަނަށް 50 އަށްވުރެ ގިނަ ރިސޯޓު އޮޕަރޭޓަރުން އެމްއެމްއޭއަށް ސިޓީ ފޮނުވާފައިވާ ކަމަށެވެ.