ރާއްޖެއަށް ޕޭޕަލް ގެނައުމަށް އެ ކުންފުންޏަށް ފޮނުވަން ޖެހޭ މުހިންމު މައުލޫމާތު ހިއްސާކޮށް، ޔޫޓިއުބް މަނިޓައިޒް ކުރުމަށް ޕްރޮޕޯޒަލްއެއް ފޮނުވަން ތައްޔާރުވެއްޖެ އެވެ.

ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ މީގެ ދެ ދުވަހެއް ކުރިން ޕޭޕަލްއާ އެކު މަޝްވަރާ ބައްދަލުވުމެއް ބާއްވައި، އެ ބައްދަލުވުމުގައި ޕޭޕަލް އިން އެދުނު މުހިންމު މައުލޫމާތުތައް ހިއްސާކޮށްފައިވާ ކަމަށެވެ.

"މިހާރު މީގެ ދެ ދުވަސް ކުރިން އަޅުގަނޑުމެން އަނެއްކާ ވެސް ޕޭޕަލްއާ އެކު މަޝްވަރާތައް ގެންގޮސް އެ ބޭފުޅުން ރާއްޖޭގެ ކްރޮސް ބޯޑަށް ޓްރާންސެކްޝަންއަށް ބޭނުންވި މުހިންމު މައުލޫމާތު އަޅުގަނޑުމެން ވާނީ ފޯރުކޮށްދީފައި،" ސައީދު ވިދާޅުވި އެވެ.

ޕޭޕަލް ރާއްޖެ ގެނައުމަށް ޓާގެޓް ކުރި ޝެޑިއުލްއާ އެއްގޮތަށް މަސައްކަތް ކުރިއަށްދާކަން ފާހަގަކުރައްވާ ސައީދު ވިދާޅުވީ ވަރަށް އަވަހަށް ޕޭޕަލްއާ އެކު ކްރޮސް ބޯޑާ ޓްރާންސެކްޝަން ހަދަން ފެށޭނެ ކަމަށެވެ.

އޭގެއިތުރުން, ޔޫޓިއުބް މަނިޓައިޒް ކުރަން ރާއްޖޭގެ ރައްޔިތުންނަށް ހުރި ދަތިތައް ހައްލު ކުރުމަށް ޔޫޓިއުބާ އެކު ބުރާސްފަތި ދުވަހު ބައްދަލުވުމެއް ބާއްވައި، ޕްރޮޕޯޒަލްއެއް ހުށަހަޅާނެ ކަމަށް ސައީދު ވިދާޅުވި އެވެ.

"އެހެންވީމަ ޔޫޓިއުބާއެއްކޮށް އަޅުގަނޑުމެން އިރާދަކުރެއްވިއްޔާ ދެވަނަ ޑިސްކަޝަންއެއް މިއޮތީ 19 ވަނަ ދުވަހު މި މަހުގެ [ސެޕްޓެމްބަރު]. 19 ވަނަ ދުވަހު ޕްރޮޕޯޒަލް ހުށަހަޅަން އަޅުގަނޑުމެން ގަސްތުކުރަނީ. އެކަން ވެސް ވަރަށް ބާރަށް ކުރިއަށް އެބަދޭ،" ސައީދު ވިދާޅުވި އެވެ.

ދިވެހިންގެ އުފެއްދުންތައް ބައިނަލްއަގުވާމީ މާކެޓުތަކުގައި ވިއްކުމަށްޓަކައި ޕޭޕަލް އާއި އެހެނިހެން ޕޭމެންޓު ގޭޓުވޭތައް ގާއިމުކޮށްދިނުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.